കാനഡയിൽ ഇനി കഞ്ചാവ്​ നിയമവിധേയം

ഒാട്ടവ: കഞ്ചാവ്​ നിയമവിധേയമാക്കുന്ന രണ്ടാമത്തെ രാജ്യമായി കാനഡ. ബുധനാഴ്​ച അർധരാത്രിയോടെയാണ്​ കഞ്ചാവ്​ രാജ്യത്ത്​ നിയമവിധേയമാക്കി ഉത്തരവിറങ്ങിയത്​. ലാറ്റിനമേരിക്കയിലെ ഉറുഗ്വായിയാണ്​ കഞ്ചാവ്​ നിയമവിധേയമാക്കിയ ആദ്യ രാജ്യം. ഉല്ലാസ കേന്ദ്രങ്ങളിലായിരിക്കും കഞ്ചാവ്​ വിൽപന അനുവദിക്കുക. അതേസമയം, കഞ്ചാവ്​ ഉപയോഗിച്ച്​ വാഹനമോടിക്കുന്നത്​ ഒഴിവാക്കാൻ പൊലീസ്​ കർശന ഒരുക്കങ്ങൾ നടത്തും.

ഉത്തരവിറങ്ങുംവരെ അർധരാത്രിയിൽ ഉപഭോക്​താക്കൾ ഉറക്കമൊഴിച്ച്​ കാത്തിരുന്നിരുന്നു. കഞ്ചാവ്​ ഉൽപാദനത്തിനും വിതരണത്തിനും പ്രത്യേകം ലൈസൻസ്​ വേണം. നിലവിൽ മദ്യവിൽപനപോലെ കഞ്ചാവിനും നിയന്ത്രണങ്ങളുണ്ടാവുമെന്ന്​ അധികൃതർ അറിയിച്ചു.

നിരവധി പേർ തീരുമാനത്തെ സ്വാഗതംചെയ്​തെങ്കിലും ഗുരുതരമായ പ്രത്യാഘാതങ്ങൾക്കിടയാക്കുമെന്ന്​ വിമർശകർ പറയുന്നു. 2019ലെ ​തെരഞ്ഞെടുപ്പ്​ മുന്നിൽകണ്ടാണ്​ പ്രധാനമന്ത്രി ജസ്​റ്റിൻ ട്രൂഡോ കഞ്ചാവിന്​ അനുമതി നൽകി​യതെന്ന്​ പ്രതിപക്ഷം ആരോപിക്കുന്നു.