ബ്രസീൽ തെരഞ്ഞെടുപ്പ്​: ഒന്നാം ഘട്ടത്തിൽ വലതുപക്ഷത്തിന്​ മുന്നേറ്റം

സാവോപോളോ: നിർണായകമായ ബ്രസീൽ തെരഞ്ഞെടുപ്പി​​​െൻറ ഒന്നാംഘട്ടത്തിൽ തീവ്ര വലതുപക്ഷ സ്​ഥാനാർഥിക്ക്​ മുൻതൂക്കം. എന്നാൽ, 50 ശതമാനം ​വോട്ട്​ നേടാൻ കഴിയാത്ത സാഹചര്യത്തിൽ അന്തിമ വിധിക്ക്​ രണ്ടാംഘട്ട തെരഞ്ഞെടുപ്പ്​ നടക്കും. വലതുപക്ഷ കക്ഷിയായ സോഷ്യൽ ലിബർട്ടി പാർട്ടിയുടെ സ്​ഥാനാർഥി ജയർ ബൊൽസൊനാരോയാണ്​ ഞായറാഴ്​ചത്തെ വോ​െട്ടടുപ്പിൽ മുന്നേറ്റമുണ്ടാക്കിയത്​.

ആകെ പോൾ ചെയ്​തതി​​​െൻറ 47 ശതമാനത്തിലേറെ വോട്ടുകൾ ഇദ്ദേഹം നേടി. തൊട്ടടുത്ത എതിരാളിയായ ഇടതുപക്ഷാഭിമുഖ്യമുള്ള വർക്കേഴ്​സ്​ പാർട്ടി സ്​ഥാനാർഥി ഫെർണാണ്ടോ ഹദ്ദാദിന്​ 28 ശതമാനം വോട്ടാണ്​ ലഭിച്ചത്​. ഇൗ മാസം 28ന്​ നടക്കുന്ന രണ്ടാം ഘട്ട തെരഞ്ഞെടുപ്പിൽ ഇവർ തമ്മിലാണ്​ മത്സരിക്കുക. അതേസമയം, തെരഞ്ഞെടുപ്പി​ൽ കൃത്രിമം നടന്നതായ ആരോപണവുമായി ബൊൽസൊനാരോ രംഗത്തെത്തി​. ഇലക്​ട്രോണിക്​ വോട്ടുയന്ത്രത്തിൽ അവിശ്വാസം രേഖപ്പെടുത്തി നേരത്തേതന്നെ ഇദ്ദേഹം പ്രസ്​താവന നടത്തിയിരുന്നു.

മുൻകാല തെരഞ്ഞെടുപ്പുകളിൽനിന്ന്​ വ്യത്യസ്​തമായി രാജ്യത്ത്​ ധ്രുവീകരണവും സംഘർഷവും ശക്തമായ തെരഞ്ഞെടുപ്പാണ്​ ഇപ്രാവശ്യം നടന്നത്​. 63കാരനായ ബൊൽസൊനാരോയുടെ രംഗപ്രവേശനമാണ്​ കടുത്ത മത്സരത്തിന്​ കാരണമായത്​. സ്​ത്രീകൾക്കും ലൈംഗിക ന്യൂനപക്ഷങ്ങൾക്കും എതിരായ ഇ​േദ്ദഹത്തി​​​െൻറ പ്രസ്​താവനകളും മുൻ പട്ടാള ഭരണകൂടത്തെ ന്യായീകരിച്ചതുമടക്കം നിരവധി തവണ ജയർ ബൊൽസൊനാരോ വിവാദങ്ങളിലകപ്പെട്ടിരുന്നു.

യു.എസ്​ പ്രസിഡൻറ്​ ഡോണൾഡ്​ ട്രംപ്​ അടക്കമുള്ളവരുടെ ആരാധകനായ ഇദ്ദേഹം തന്നെയാവും വലിയ അട്ടിമറികൾ സംഭവിച്ചില്ലെങ്കിൽ രണ്ടാം ഘട്ടത്തിൽ ജയിച്ചുകയറുക. എന്നാൽ, ഒന്നാം ഘട്ടത്തിൽ പരാജയപ്പെട്ട പാർട്ടികളുടെ പിന്തുണ നേടാനായാൽ ഇടതുപക്ഷ സ്​ഥാനാർഥി ഫെർണാണ്ടോ ഹദ്ദാദ്​​ ജയിച്ചുകയറാനുള്ള സാധ്യതയും തള്ളിക്കളയാനാവില്ല.