വെനസ്വേലയിൽ നിന്നും വൻ കുടിയേറ്റം; ബ്രസീൽ അതിർത്തി അടച്ചു​ 

ബ്രസീലിയ: രാഷ്​ട്രീയവും സാമ്പത്തികവുമായ പ്രതിസന്ധികൾ അലട്ടുന്ന വെനസ്വേലയിൽ നിന്നുമുള്ള വൻ കുടിയേറ്റം തടയാൻ വടക്ക്​ ഭാഗത്തുള്ള അതിർത്തി അടച്ച്​ ബ്രസീൽ. ഫെഡറൽ ജഡ്​ജിയുടെ തീരുമാനപ്രകാരമാണ്​ നടപടി. രണ്ട്​ വർഷത്തോളമായി വെനസ്വേലയിൽ നിന്നുള്ള ആയിരക്കണക്കിനാളുകൾ രാജ്യം വിട്ട്​ അഭയം തേടാനെത്തുന്നത്​ ബ്രസീലിലേക്കാണ്​.

ബ്രസീലുകാർക്കും അല്ലാത്തവർക്കും അതിർത്തിയിലൂടെ കടന്നുപോവാം. എന്നാൽ വെനസ്വേലയിൽ നിന്നുള്ളവർക്ക്​ അവരുടെ രാജ്യത്തേക്ക്​ തിരിച്ചുപോവുന്നതിന്​ മാത്രമാണ്​ അതിർത്തി ​േഗറ്റ്​ തുറന്നുകൊടുക്കുക. 

ബ്രസീലിലെ ജനസാന്ദ്രത കുറഞ്ഞ സംസ്ഥാനമായ റെറൈമയുടെ തലസ്ഥാനം ബോഅ വിസ്​തയിലാണ്​ ഏറ്റവും കൂടുതൽ കുടിയേറ്റക്കാരുള്ളത്​. 25,000 മുതൽ 330,000 വരെ കുടിയേറ്റക്കാർ ഇവിടെയുണ്ടെന്നാണ്​ കണക്ക്​. ദിവസം 500 വെനിസ്വേലക്കാർ വീതം ഇതുവരെ ബ്രസീലിലേക്ക്​ കുടിയേറുന്നുണ്ട്​. 

അതേസമയം ​​റൊറൈമ ഗവർണർ ഫെഡറൽ ജഡ്​ജിയുടെ തീരുമാനത്തെ അഭിനന്ദിച്ചു. അതിർത്തി അടക്കാൻ കഴിഞ്ഞ മെയ്​ മാസം മുതൽ ആവശ്യപ്പെട്ടുകൊണ്ടിരിക്കുകയാണ്​. രാജ്യത്തെ പൊതു സേവനങ്ങളെ ബാധിക്കാതിരിക്കാൻ കുടിയേറ്റക്കാർക്ക്​ നൽകുന്ന സാമ്പത്തിക സഹായം നിർത്തിവെക്കാനും ആവശ്യപ്പെട്ടിരുന്നതായി ​ഗവർണർ പറഞ്ഞു.