സമുദ്രനിരപ്പിന് റെക്കോഡ് ഉയര്‍ച്ച

വാഷിങ്ടണ്‍: കഴിഞ്ഞ ഒരുനൂറ്റാണ്ടിനിടെ സമുദ്രനിരപ്പ് അപകടകരമാംവിധം ഉയര്‍ന്നതായി ഒരുകൂട്ടം ശാസ്ത്രജ്ഞന്മാര്‍. ഈ നൂറ്റാണ്ടില്‍ 14 സെന്‍റിമീറ്റര്‍ ഉയര്‍ച്ചയാണ് സമുദ്രനിരപ്പില്‍ രേഖപ്പെടുത്തിയിരിക്കുന്നത്. 27 നൂറ്റാണ്ടുകള്‍ക്കിടയില്‍ ഏറ്റവുംകൂടിയ നിരക്കാണിത്. വാഷിങ്ടണിലെ റൂട്ട്ജേഴ്സ് ഡിപ്പാര്‍ട്ട്മെന്‍റ് ഓഫ് എര്‍ത്ത് ആന്‍ഡ് പ്ളാനറ്ററി സയന്‍സിലെ അസോസിയറ്റ് പ്രഫസര്‍ റോബര്‍ട്ട് കോപ്പിന്‍െറ നേതൃത്വത്തിലാണ് പഠനംനടന്നത്.
ആഗോളതാപനത്തിന്‍െറ ഫലമായി ധ്രുവപ്രദേശങ്ങളിലെ മഞ്ഞുരുക്കം ക്രമാതീതമായി വര്‍ധിച്ചതോടെയാണ് സമുദ്രനിരപ്പ് വര്‍ധിച്ചതെന്ന് പഠനം പറയുന്നു.
ഒന്നാംനൂറ്റാണ്ടിനും 14ാം നൂറ്റാണ്ടിനുമിടയില്‍ ആഗോളതാപനം രണ്ട് ഡിഗ്രി സെല്‍ഷ്യസ് കുറഞ്ഞെന്നും ഇതിന്‍െറ ഫലമായി സമുദ്രനിരപ്പില്‍ എട്ട് സെന്‍റിമീറ്റര്‍ കുറവ് വന്നെന്നും 19ാം നൂറ്റാണ്ടിനെ അപേക്ഷിച്ച് ആഗോള താപനില കഴിഞ്ഞ നൂറ്റാണ്ടില്‍ ഒരു ഡിഗ്രി സെല്‍ഷ്യസ് ഉയര്‍ന്നെന്നും പഠനത്തില്‍ പറയുന്നു.