സിറിയ: റഷ്യക്കും യു.എസിനുമിടയില്‍ പൊതുവേദി വേണം –കെറി

മോസ്കോ: സിറിയയിലെ ആഭ്യന്തരയുദ്ധം അവസാനിപ്പിക്കാനും കിഴക്കന്‍ യുക്രെയ്ന്‍െറ സുസ്ഥിരത വീണ്ടെടുക്കാനും റഷ്യക്കും അമേരിക്കക്കുമിടയില്‍ പൊതുവേദി രൂപപ്പെടണമെന്ന് അമേരിക്കന്‍ വിദേശകാര്യ സെക്രട്ടറി ജോണ്‍ കെറി പറഞ്ഞു. മോസ്കോയില്‍ റഷ്യന്‍ വിദേശകാര്യമന്ത്രി സെര്‍ജി ലാവ്റോവുമായുള്ള കൂടിക്കാഴ്ചക്കുശേഷം സംസാരിക്കുകയായിരുന്നു അദ്ദേഹം. രൂക്ഷമായ പ്രതിസന്ധികളില്‍ വലിയരാജ്യങ്ങള്‍ ഒന്നിച്ചാല്‍ അതിന്‍െറ ഗുണം ലോകത്തിന് മൊത്തം ലഭിക്കും. സിറിയയുടെ വിഷയത്തില്‍ മോസ്കോ കൂടിക്കാഴ്ച വളരെ ശക്തമായ സംഭാവന നല്‍കുമെന്നും ഐ.എസിനെ തുടച്ചുനീക്കണമെന്ന കാര്യം അമേരിക്കയും റഷ്യയും ഒരുപോലെ ആഗ്രഹിക്കുന്നതായും കെറി പറഞ്ഞു. സിറിയയില്‍ ജനുവരി ആദ്യം പ്രസിഡന്‍റ് ബശ്ശാര്‍ അല്‍അസദിന്‍െറ പ്രതിനിധികളും വിമതരുമായി അനുരഞ്ജന ചര്‍ച്ചക്ക് മുന്‍കൈയെടുക്കുമെന്നും യുക്രെയ്ന്‍െറ കാര്യത്തില്‍ റഷ്യയുമായുള്ള പ്രശ്നപരിഹാരത്തിന് യു.എസ് ഇടപെടണമെന്നും സെര്‍ജി ലാവ്റോവ് ആവശ്യപ്പെട്ടു.