ജോണ്‍ കെറിയുടെ റഷ്യന്‍സന്ദര്‍ശനം അടുത്തയാഴ്ച

പാരിസ്: സിറിയയിലെ ആഭ്യന്തരപ്രശ്നങ്ങള്‍ അവസാനിപ്പിക്കുന്നതുമായി ബന്ധപ്പെട്ട് ചര്‍ച്ച ചെയ്യാന്‍ അടുത്തയാഴ്ച റഷ്യ സന്ദര്‍ശിക്കുമെന്ന് യു.എസ് സ്റ്റേറ്റ് സെക്രട്ടറി ജോണ്‍ കെറി. സിറിയയിലെ രാഷ്ട്രീയമാറ്റവും വ്യോമാക്രമണവും സംബന്ധിച്ച് ചട്ടക്കൂട് ആസൂത്രണം ചെയ്യുകയായിരിക്കും സന്ദര്‍ശനത്തിന്‍െറ പ്രധാന ലക്ഷ്യം. ഈ മാസം 18ന് ന്യൂയോര്‍ക്കില്‍ ഇന്‍റര്‍നാഷനല്‍ സിറിയന്‍ സപ്പോര്‍ട്ട് ഗ്രൂപ് സംഘടിപ്പിക്കുന്ന യോഗത്തെ സംബന്ധിച്ച ആശങ്കയും ചര്‍ച്ചാവിഷയമാകും. റഷ്യന്‍ പ്രസിഡന്‍റ് വ്ളാദിമിര്‍ പുടിനുമായും വിദേശകാര്യമന്ത്രിയുമായും ചര്‍ച്ച നടത്തും. യുക്രെയ്ന്‍ പ്രശ്നവും ചര്‍ച്ചാവിഷയമായേക്കും.