ഓൺലൈൻ വ്യാപാരം കുത്തനെ കൂടി; 55,000 തൊഴിലവസരങ്ങളുമായി ആമസോൺ

ലണ്ടൻ: ​മഹാമാരിയായി കോവിഡ്​ പടർന്നുകയറിയ കാലത്ത്​ ജനം ഓൺലൈനിലേക്ക്​ മാറിയതോടെ പുതിയ തൊഴിലവസരങ്ങൾ തുറന്നിട്ട്​ ഓൺ​ലൈൻ വ്യാപാര ഭീമനായ ആമസോൺ. നിലവിലുള്ള ജീവനക്കാരെ വെച്ച്​ കാര്യങ്ങൾ മുന്നോട്ടുകൊണ്ടുപോകാൻ പ്രയാസം നേരിടുന്ന സാഹചര്യത്തിലാണ്​ അരലക്ഷത്തിലേറെ പേരെ പുതുതായി എടുക്കുന്നത്​. ലോകം മുഴുക്കെ എല്ലായിടത്തും പുതിയ ജീവനക്കാരെ നിയമിക്കുമെന്ന്​ ജെഫ്​ ബെസോസിൽനിന്ന്​ ആമസോൺ ചുമതലയേറ്റെടുത്ത ചീഫ്​ എക്​സിക്യൂട്ടീവ്​ ആൻഡി ജാസി പറഞ്ഞു.

ആമസോൺ കൈകാര്യം ചെയ്യുന്ന ചില്ലറ വ്യാപാരം, ഡിജിറ്റൽ പരസ്യം, ക്ലൗഡ്​ കമ്പ്യൂട്ടിങ്​ മേഖലകളിലൊക്കെയും വൻ കുതിപ്പാണുണ്ടായത്​. ഈ സാഹചര്യത്തിൽ 40,000 തൊഴിലവസരങ്ങൾ യു.എസിലായിരിക്കും. ഇന്ത്യ, ജർമനി, ജപ്പാൻ, യു.കെ എന്നിവിടങ്ങളിലാകും അവശേഷിച്ച അവസരങ്ങൾ.

കമ്പനി കരിയർ ദിനമായ സെപ്​റ്റംബർ 15നാകും നിയമനം. നിലവിൽ 275,000 ജീവനക്കാരുള്ള ആമസോണിൽ ഇതോ​െട തൊഴിൽ ശേഷിയിൽ 20 ശതമാനം വർധനയുണ്ടാകും.