ആമസോണിലെ​ കോവിഡ്​ രോഗികൾക്ക്​ ആശുപത്രി പണിയും -പെറു

ലിമ: ഭൂമിയുടെ ശ്വാസകോശം എന്നറിയപ്പെടുന്ന ആമസോൺ കാടുകളിൽ കോവിഡ്​-19 സ്​ഥിരീകരിച്ച ഗോത്രവർഗ വിഭാഗക്കാരെ ചികിത്സിക്കാൻ ആശുപത്രി പണിയുമെന്ന്​ പെറു. എത്രയും വേഗം തലസ്​ഥാനമായ ലിമയിലെ പുകാൽപയിലെ 100 കിടക്കകളുള്ള ആശുപത്രി നിർമിക്കാനാണ്​ ഉദ്ദേശിക്കുന്നതെന്ന്​ ദേശീയ സാമൂഹിക സുരക്ഷ സമതി വ്യക്​തമാക്കി. 

ബ്രസീലുമായി അതിർത്തി പങ്കിടുന്ന മേഖലയാണിത്​. ആശുപത്രി നിർമാണം മൂന്നാഴ്​ചക്കുള്ളിൽ പൂർത്തിയാക്കാനാണ്​ തീരുമാനം. പെറുവി​​െൻറ അധീനതയിലുള്ള ആമസോണിൽ നിലവിൽ അടിയന്തരാവസ്​ഥ പ്രഖ്യാപിച്ചിരിക്കയാണ്​. 

രാജ്യത്തെ ആശുപത്രികളെല്ലാം കോവിഡ്​ രോഗികളെ കൊണ്ട്​ നിറഞ്ഞു. മരിക്കുന്നവരുടെ എണ്ണം കൂടുന്നതിനാൽ പ്രാദേശിക ശ്​മശാനങ്ങളിൽ പോലും മൃതദേഹങ്ങൾ സംസ്​കരിക്കാൻ കഴിയാത്ത അവസ്​ഥയിലാണ്​.  

220 ആരോഗ്യ പ്രവർത്തകരെ ആമസോണിലേക്ക്​ അയക്കുമെന്നും സർക്കാർ അറിയിച്ചു. ഓക്​സിജ​​െൻറയും മറ്റ്​ അവശ്യ മരുന്നുകളുടെയും ലഭ്യത ഉറപ്പാക്കും. പെറുവിലെ ആകെ കോവിഡ്​ കേസുകളിൽ 2250 എണ്ണം ആമസോണിൽ നിന്നാണ്​. ​ 95 പേർ മരിക്കുകയും ചെയ്​തു. പെറുവിൽ 88,541 പേർക്കാണ്​ രോഗം സ്​ഥിരീകരിച്ചത്​. 2,523 പേർ മരണത്തിന്​ കീഴടങ്ങി.