You are here

സുഡാനിൽ കൂട്ടക്കൊല; വെടിവെപ്പിൽ 35 പ്രക്ഷോഭകർ കൊല്ലപ്പെട്ടു

09:07 AM
04/06/2019

ഖർത്തൂം: സുഡാൻ തലസ്ഥാനമായ ഖർത്തൂമിൽ സിവിലിയൻ പ്രക്ഷോഭകർക്കു നേരെയുണ്ടായ സുരക്ഷാ സേനയുടെ വെടിവെപ്പിൽ കുട്ടിയടക്കം 35 പേർ കൊല്ലപ്പെട്ടു. നൂറുകണക്കിന് പേർക്ക് പരിക്കേറ്റു. മരണസംഖ്യ ഉയർന്നേക്കുമെന്നാണ് റിപ്പോർട്ട്. തലസ്ഥാനമായ ഖർത്തൂമിലെ പ്രധാന പ്രക്ഷോഭ കേന്ദ്രത്തിലായിരുന്നു വെടിവെപ്പ്. പ്രസിഡൻറ് ഉമർ അൽ ബഷീർ പുറത്തായ ശേഷമുള്ള ഏറ്റവും രൂക്ഷമായ രക്തച്ചൊരിച്ചിലാണിത്. സംഭവത്തെ ഐക്യരാഷ്ട്ര സഭ അപലപിച്ചു.

നടന്നത് കൂട്ടക്കൊലയാണെന്ന് സുഡാനീസ് പ്രൊഫഷണൽസ് അസോസിയേഷൻ (എസ്.പി.എ.) പ്രതികരിച്ചു. ഭരണം ഇപ്പോൾ കൈയ്യാളുന്ന മിലിട്ടറി കൗൺസിലിനാണ് കൂട്ടക്കൊലയുടെ ഉത്തരവാദിത്തമെന്നും എസ്.പി.എ പറഞ്ഞു. ഡിസംബറിൽ രാജ്യവ്യാപക പ്രക്ഷോഭം ആരംഭിച്ചത് എസ്.പി.എയുടെ നേതൃത്വത്തിലാണ്. സംഭവത്തിൽ സ്വതന്ത്ര അന്വേഷണം വേണമെന്ന് യു.എൻ സെക്രട്ടറി ജനറൽ അന്‍റോണിയോ ഗുട്ടെറസ് ആവശ്യപ്പെട്ടു.

മൂന്ന് പതിറ്റാണ്ട് സുഡാൻ ഭരിച്ച പ്രസിഡൻറ് ഉമർ അൽ ബഷീറിനെ ജനകീയ പ്രക്ഷോഭത്തെ തുടർന്ന് പട്ടാളം പുറത്താക്കുകയും അധികാരമേറ്റെടുക്കുകയുമായിരുന്നു. തുടർന്ന് ജനകീയ ഭരണകൂടത്തിന് അധികാരം കൈമാറണമെന്ന് ആവശ്യപ്പെട്ടാണ് ഖർത്തൂമിലെ സൈനിക ഹെഡ്ക്വാർട്ടേഴ്സിന് മുമ്പിൽ ജനകീയ പ്രക്ഷോഭം ആരംഭിച്ചത്. നൈൽ നദിയുടെ കരയിലെ പ്രക്ഷോഭ കേന്ദ്രത്തിൽ ആയിരക്കണക്കിന് ആളുകളാണ് തമ്പടിച്ചിരിക്കുന്നത്.

മാർച്ചിൽ പങ്കെടുക്കാനും പ്രധാന റോഡുകൾ അടക്കാനും പ്രക്ഷോഭ നേതാക്കൾ ജനങ്ങളോട് ആവശ്യപ്പെട്ടിരുന്നു. പ്രക്ഷോഭകരെ തുരത്താൻ സൈന്യം ഇടക്കിടെ നടത്തുന്ന വെടിവെപ്പിൽ ഗർഭിണി അടക്കം നിരവധി പ്രതിഷേധക്കാർ കഴിഞ്ഞ ദിവസങ്ങളിലും കൊല്ലപ്പെട്ടിരുന്നു.

Loading...
COMMENTS