റഷ്യൻ വിമാന ദുരന്തം: 100 പേരുടെ മൃതദേഹങ്ങൾ കണ്ടെടുത്തു; ഉത്തരവാദിത്തം ഏറ്റെടുക്കുന്നതായി ഐ.എസ്

പർവതപ്രദേശമായ സിനായിയിലെ അൽഅരിഷ് നഗരത്തിനടുത്താണ് വിമാനാവശിഷ്ടങ്ങൾ കണ്ടെത്തിയത്. സാങ്കേതികത്തകരാറാണ് അപകടത്തിന് കാരണമെന്നാണ് പ്രാഥമിക നിഗമനം.  യാത്ര തുടങ്ങി 23 മിനിറ്റുകൾക്കുള്ളിൽ എയർ ട്രാഫിക് കൺട്രോളുമായി വിമാനത്തിെൻറ ബന്ധം നഷ്ടപ്പെട്ടു. വിമാനത്തിെൻറ വയർലസ് സംവിധാനം പ്രവർത്തിക്കുന്നില്ലെന്നും സമീപ വിമാനത്താവളത്തിൽ വിമാനം ഇറക്കേണ്ടി വരുമെന്നും പൈലറ്റ് പറഞ്ഞതായി എയർട്രാഫിക് കൺട്രേൾ  വൃത്തങ്ങൾ അറിയിച്ചു. വിമാനം കാണാതായെന്നായിരുന്നു ആദ്യം സംശയിച്ചത്. ബ്ലാക് ബോക്സ് കണ്ടെടുത്തിട്ടുണ്ട്. കൊഗലിമാവിയ എയർലൈനിേൻറതാണ് വിമാനം.
 

അതേസമയം, തങ്ങളാണ് വിമാനം വീഴ്ത്തിയതെന്ന് ഇസ്ലാമിക് സ്റ്റേറ്റ് ഭീകര സംഘടനയുടെ ഈജിപ്തിലെ ഉപവിഭാഗം അവകാശപ്പെട്ടു. സിറിയയിൽ ഐ.എസിനെതിരെ റഷ്യ നടത്തുന്ന വ്യോമാക്രമണത്തിന് തിരിച്ചടിയായാണ് വിമാനം വീഴ്ത്തിയതെന്ന് സംഘടന പറഞ്ഞു. എന്നാൽ, ഇവരുടെ അവകാശവാദം ശരിയാകാൻ സാധ്യതയില്ലെന്ന് റഷ്യൻ ഗതാഗത മന്ത്രി പറഞ്ഞു.