കോവിഡ്​ പ്രതി​​രോധത്തിൽ ലോകനേതാക്കളിലെ മോശം പ്രകടനം മോദിയുടേത്​; ആദ്യ അഞ്ചിൽ ഇവർ

ന്യൂഡൽഹി: കോവിഡ്​ പോലുള്ള ഒരു മഹാമാരിയെ പിടിച്ചുകെട്ടൽ അത്ര എളുപ്പമല്ലെന്ന്​ നാം അനുഭവത്തിൽ പഠിച്ചതാണ്​. ഇതുപോലെയുള്ള സന്ദർഭങ്ങളിലാണ്​ രാഷ്​ട്ര നേതാക്കളുടെ ഭരണമികവും നേതൃപാടവവും പലപ്പോഴും അളക്കപ്പെടുന്നത്​. എന്നാൽ ഇപ്പോ ഭരണത്തിലിരിക്കുകയോ സ്​ഥാനം ഒഴിഞ്ഞ്​ പോകുകയോ ചെയ്​ത ചില ​നേതാക്കൾ കോവിഡ്​ മഹാമാരിയെ കൈകാര്യം ചെയ്​ത രീതി വൻ വിമർശനങ്ങൾക്ക്​ ഇടയാക്കിയിരുന്നു.

മഹാമാരിയെ വിലകുറച്ച്​ കാണുക, ശാസ്ത്രത്തെ അവഗണിക്കുക അല്ലെങ്കിൽ സാമൂഹിക അകലം, മാസ്കുകൾ പോലുള്ള കോവിഡ്​ പ്രതിരോധ മാർഗങ്ങളെ അവഗണിച്ചോ അവരിൽ ചിലർ തങ്ങളുടെ രാജ്യത്തെ സ്​ഥിതി സങ്കീർണമാക്കി. താഴെ പറയുന്ന നേതാക്കളുടെ പട്ടികയിലുള്ളവർ ഇവയിൽ ഏതെങ്കിലും ഒരു അബദ്ധമോ അല്ലെങ്കിൽ എല്ലാ അബദ്ധമോ ചെയ്​തവരാണ്​. വിവിധ രാജ്യങ്ങളിൽ നിന്നുള്ള വിദഗ്​ധരായ ആളുകൾ തയാറാക്കിയ പട്ടികയിൽ ഒന്നാം സ്​ഥാനത്ത്​ നിൽക്കുന്നത്​ ഇന്ത്യൻ പ്രധാനമന്ത്രിയായ നരേന്ദ്ര മോദിയാണ്​.

1. നരേന്ദ്ര മോദി

മേയ്​ മാസത്തിൽ പ്രതിദിനം നാലു ലക്ഷത്തിനടുത്ത്​ രോഗബാധിതരുള്ള ഇന്ത്യയാണ്​ ഇപ്പോൾ ലോകത്തെ കോവിഡ്​ കേന്ദ്രമായി മാറിയിരിക്കുന്നത്​. മെഡിക്കൽ ഓക്​സിജ​െൻറയും ജീവൻരക്ഷാ മരുന്നായ റെംഡെസിവിറും ലഭിക്കാതെ ആയിരങ്ങളാണ്​ രാജ്യത്തെ ആശുപത്രികളിൽ മരിക്കുന്നത്​. കിടക്കകൾ ഒഴിവില്ലാത്തതിനെ തുടർന്ന്​ രോഗികൾ പെരുവഴിയിലാകുന്ന സാഹചര്യം. ഇവക്കെല്ലാം എല്ലാവരും കാരണക്കാരനായി ചൂണ്ടിക്കാണിക്കുന്നത്​ മോദിയെയാണ്​.

കോവിഡിനെ ഫല​പ്രദമായി നേരിട്ട ഇന്ത്യ മാനവരാശിയെ രക്ഷിച്ചുവെന്ന്​ ജനുവരിയിൽ ഒരു അന്താരാഷ്​ട്ര പരിപാടിയിൽ മോദി പ്രഖ്യാപിച്ചു. മഹാമാരിയെ പിടിച്ചുകെട്ടിയെന്ന തരത്തിൽ ആരോഗ്യമന്ത്രിയുടെയും ​പ്രഖ്യാപനം വന്നു. എന്നാൽ കോവിഡ്​ ഇന്ത്യയിൽ പിടിമുറുക്കാൻ തുടങ്ങുന്നതേ ഉണ്ടായിരുന്നുള്ളൂ. ഈ സാഹചര്യങ്ങളെ നേരിടുന്നതിനാവശ്യമായ മുൻകരുതൽ ഒന്നും തന്നെ മോദി സർക്കാർ സ്വീകരിച്ചിരുന്നില്ല. ഇതാണ്​ സ്​ഥിതിഗതികൾ കൂടുതൽ വഷളാക്കിയത്​.

കോവിഡ്​ വ്യാപന വേളയിലും മോദിയും ബി.ജെ.പി നേതാക്കളും നിയമസഭ തെരഞ്ഞെടുപ്പ്​ നടന്ന ബംഗാളിൽ മെഗാ റാലികൾ നടത്തി. ഈ പരിപാടികളിൽ പ​ങ്കെടുത്തവരിൽ ചുരുക്കം ചിലർ മാത്രമാണ് കോവിഡ്​ ചട്ടങ്ങൾ പാലിച്ചത്​. ലക്ഷങ്ങൾ പ​ങ്കെടുത്ത കുംഭമേളയടക്കമുള്ള മതപരമായ ചടങ്ങുകൾ സംഘടിപ്പിക്കാൻ അനുവാദം നൽകിയതും കടുത്ത വിമർശനങ്ങൾക്കിടയാക്കി.

ഇന്ത്യയിലെ ബഹുഭൂരിപക്ഷം ജനങ്ങളും വാക്​സിനേഷന്​ വേണ്ടി കാത്തുനിൽക്കു​േമ്പാൾ ദശലക്ഷക്കണക്കിന്​ ഡോസ്​ വാക്​സിൻ അയൽരാജ്യങ്ങളിലേക്കും മറ്റും കയറ്റി അയച്ചതും വൻ പ്രതിഷേധങ്ങൾക്കിടയാക്കി.

2. ജെയ്ർ ബോൽസനാരോ (ബ്രസീൽ)

ചെറിയ ഒരു പകർച്ചപ്പനിയായി കോവിഡ്​ മഹാമാരിയെ വിലയിരുത്തിയ പ്രസിഡൻറ്​ ജെയ്​ർ ബോലസനാരോയാണ്​ ബ്രസീലിലെ സ്​ഥിതിഗതികൾ ഇത്ര സങ്കീർണമാക്കിയത്​. ആരോഗ്യവകുപ്പി​െൻറ അധികാര പരിധിയിൽ ബോൽസനാരോ ​കൈകടത്തി മാറ്റങ്ങൾ കൊണ്ടുവന്നു.

ആരാധനാലയങ്ങളിൽ മാസ്​ക്​ നിർബന്ധമാക്കിയ നടപടി അദ്ദേഹം അധികാരം ഉപയോഗിച്ച്​ എടുത്ത്​ കളഞ്ഞു. സാമൂഹിക അകലം പ്രോത്സാഹിപ്പിക്കാനുള്ള സർക്കാർ നിർദേശങ്ങൾ അദ്ദേഹം നിരുത്സാഹപ്പെടുത്തിയ സംഭവങ്ങളുമുണ്ടായി. അവശ്യ സേവനങ്ങളുടെ പരിധിയിൽ ഉൾപെടുത്തി ജിം, സ്​പാ അടക്കമുള്ള പല മേഖലകളും തുറന്നു പ്രവർത്തിക്കാൻ അദ്ദേഹം അനുവദിച്ചു. ഹൈഡ്രോക്​സിക്ലോറോക്വിൻ അടക്കമുള്ള മരുന്നുകൾ കോവിഡ്​ രോഗികളുടെ ചികിത്സക്കായി ഉപയോഗിക്കാൻ അദ്ദേഹം ശ്രമിച്ചു.

കോവിഡ് 19 പ്രതിസന്ധിക്ക് ബ്രസീലിയൻ സംസ്ഥാന സർക്കാരുകളെയും ചൈനയെയും ലോകാരോഗ്യ സംഘടനയെയുമാണ്​ അദ്ദേഹം കുറ്റപ്പെടുത്തിയത്​. എന്നാൽ സ്വന്തം രാജ്യത്തി​െൻറ ദുരവസ്​ഥയുടെ ഉത്തരവാദിത്തം അദ്ദേഹം ഒരിക്കലും ഏറ്റെടുത്തില്ല. പാർശ്വഫലങ്ങൾ ഉണ്ടാവുമെന്നതിനാൽ താൻ വാക്​സിൻ സ്വീകരിക്കില്ലെന്ന്​ ഡിസംബറിൽ ബോൽസനാരോ പ്രഖ്യാപിച്ചിരുന്നു.

കോവിഡ്​ പ്രതിരോധ പ്രവർത്തനങ്ങളിൽ സ്വന്തം സർക്കാറുമായി പോലും ബോൽസനാരോക്ക്​ അഭിപ്രായ ഐക്യം ഇല്ലായിരുന്നു. നാല്​ ആരോഗ്യമന്ത്രിമരെയാണ്​ അദ്ദേഹം ഒരു വർഷത്തിനുള്ളിൽ പരീക്ഷിച്ചത്​.

3. അലക്​സാണ്ടർ ലുക്​ഷെൻകോ (ബെലാറസ്​)

ബെലാറസി​െൻറ ഭരണാധികാരിയാണ്​ അലക്​സാണ്ടർ ലുക്​ഷെൻകോ. ലോകത്തിലെ വിവിധ രാജ്യങ്ങൾ കോവിഡ്​ മഹാമാരിയെ തുടർന്ന്​ അടച്ചിടൽ പ്രഖ്യാപിച്ചപ്പോൾ കോവിഡിനെ പേടിച്ച്​ ലോക്​ഡൗൺ വേണ്ടെന്ന് റഷ്യക്കും പോളണ്ടിനും ഇടയിൽ സ്ഥിതി ചെയ്യുന്ന ബെലാറസ്​​ പ്രഖ്യാപിച്ചു.

പ്രസിഡൻറ് ലുക്​ഷെൻകോ​ കോവിഡിന്​ മരുന്നായി നിർദേശിച്ചത്​ വോഡ്​കയും ഹോക്കിയുമെല്ലാമാണ്​. ലോകാരോഗ്യ സംഘടനയുടെ സാമൂഹിക അകലമൊന്നും ഇവിടെ കൃത്യമായി പാലിക്കപ്പെട്ടില്ല.നിയന്ത്രണങ്ങൾ ഏർപ്പെടുത്താത്തതിനെ കുറിച്ചുള്ള ചോദ്യങ്ങൾക്ക്​ ബെലാറസ്​ പ്രസിഡൻറി​​െൻറ മറുപടിയാണ്​ രസകരം. മുട്ടിലിഴയുന്നതിനേക്കാൾ നിവർന്ന്​ നിന്ന്​ മരിക്കുന്നതാണ്​ നല്ലതെന്നാണ്​ ബെലാറസ്​ പ്രസിഡൻറ്​ ഔദ്യോഗിക ടെലിവിഷൻ ചാനലിന്​ നൽകിയ അഭിമുഖത്തിൽ പറഞ്ഞത്​.

കഴിഞ്ഞ വർഷം കോവിഡ്​ ബാധ സ്​ഥിരീകരിച്ചെങ്കിലും വൈറസിനെ ഒരു ഭീഷണിയായി എടുക്കാൻ അദ്ദേഹം തയാറായില്ല. ത​െൻറ ധൈര്യം കാണിക്കാൻ കോവിഡ്​ ആശുപത്രി അദ്ദേഹം മാസ്​ക്​ ഇല്ലാതെ സന്ദർശിച്ചു. ബെലാറസിൽ വാക്​സിനേഷൻ നടപടികൾ ആരംഭിച്ചെങ്കിലും താൻ കുത്തിവെപ്പ്​ എടുക്കില്ലെന്നാണ്​ അ​ദ്ദേഹം പറയുന്നത്​.

4. ഡോണൾഡ്​ ട്രംപ് (അമേരിക്ക)​

മുൻ യു.എസ്​ പ്രസിഡൻറ്​ ഡോണൾഡ്​ ട്രംപ്​ ഇപ്പോൾ അധികാരത്തിലില്ലെങ്കിലും അദ്ദേഹത്തി​െൻറ ചില നയങ്ങളാണ്​ രാജ്യത്ത്​ കോവിഡ്​ വലിയ നാശം വിതക്കാൻ കാരണമായതെന്നാണ്​ വിമർശനം.

മഹാമാരിയെ വിലകുറച്ച്​ കണ്ടതും മാസ്​ക്​ ഉപയോഗത്തിനും ചികിത്സ രീതികൾക്കുമെതിരെ സംസാരിച്ചതും പ്രതിരോധ പ്രവർത്തനങ്ങളെ പ്രതികൂലമായി ബാധിച്ചു. ഇത്​ രാജ്യത്തെ ചില ന്യൂനപക്ഷ വിഭാഗങ്ങളെയാണ്​ കൂടുതലായി ബാധിച്ചത്​. ആഫ്രിക്കൻ അമേരിക്കക്കാരിലും ലാറ്റി​നമേരിക്കക്കാരെയുമാണ്​ ഇത്​ കൂടുതൽ ബാധിച്ചത്​.

കോവിഡ്​ ദാരിദ്ര്യം, ഭവന അസ്ഥിരത, സ്കൂൾ വിദ്യാഭ്യാസത്തി​െൻറ നിലവാരം എന്നീ കാര്യങ്ങളിൽ നിലനിന്നിരുന്ന വിടവ്​ വർധിപ്പിച്ചു. യു.എസ് സമ്പദ്‌വ്യവസ്ഥ കരകയറുന്ന ലക്ഷണങ്ങൾ കാണിക്കുമ്പോൾ തന്നെ രാജ്യത്തെ ന്യൂനപക്ഷങ്ങൾ പുരോഗതി കൈവരിച്ചില്ല.

കൂടാതെ കൊറോണ വൈറസിനെ ചൈനീസ്​ വൈറസെന്ന്​ നിരന്തരം കുറ്റപ്പെടുത്തിയ ട്രംപ്​ വംശീയമായും വിമർശനങ്ങൾ ഉയർത്തി. രാജ്യത്തെ വാക്​സിൻ നിർമാണത്ത പ്രോത്സാഹിപ്പിച്ചുവെന്ന കാര്യം മാത്രമാണ്​ ട്രംപ്​ ഭരണകൂടത്തിന്​ ആശ്വസിക്കാനുള്ളത്​. എന്നാൽ ശാസ്​ത്രവിരുദ്ധതയും തെറ്റായ വാദങ്ങളും രാജ്യത്തെ കോവിഡിനെതിരായ പോരാട്ടത്തിൽ നിന്ന്​ അമേരിക്കയെ പിന്നോട്ടടിച്ചു.

5. ആന്ദ്രേ മാനുവൽ ലോപസ്​ ഒബ്രഡോർ (മെക്​സിക്കോ)

9.2 ശതമാനം കോവിഡ്​ രോഗികളും മരിക്ക​​ുന്ന മെക്​സിക്കോയിലാണ്​ ലോകത്തെ ഏറ്റവും ഉയർന്ന മരണ നിരക്ക്​. 6,17,000 മരണങ്ങൾ സംഭവിച്ചതായാണ്​ റി​​േപാർട്ടുകൾ. രാജ്യത്ത്​ കോവിഡ്​ ഇത്ര കണ്ട്​ നാശം വിതക്കാൻ കാരണം മോശം ഭരണകർത്താക്കൾ കൂടിയാണ്​.

പ്രസിഡൻറ്​ ആൻന്ദ്രെ മാനുവൽ ലോപസ് ഒബ്രഡോർ മുന്നറിയിപ്പുകൾ പാടെ തള്ളി. തുടക്കത്തിൽ തന്നെ രാജ്യവ്യാപകമായി ലോക്​ഡൗൺ നടപ്പാക്കാനുള്ള ആഹ്വാനങ്ങളെ അദ്ദേഹം എതിർത്തു. അതിനുമുമ്പ് രാജ്യവ്യാപകമായി അദ്ദേഹം റാലികൾ നടത്തി. 2020 മാർച്ച് 23നാണ്​ മെക്സിക്കോ രണ്ട് മാസത്തേക്ക് അടച്ചത്​. എന്നിരുന്നാലും അദ്ദേഹം മാസ്ക് ധരിക്കാൻ വിസമ്മതിച്ചു. മഹാമാരിക്കാലത്ത്​ പോലും ആരോഗ്യരംഗത്തെ അടിസ്​ഥാന സൗകര്യങ്ങൾ വധിപ്പിക്കാൻ അദ്ദേഹം ഫണ്ട്​ അനുവദിച്ചില്ല. ഫണ്ട്​ തികയുന്നില്ലെന്ന്​ ആശുപത്രികൾ നിരന്തരം ശബ്​ദം ഉയർത്തിയെങ്കിലും ഫലമുണ്ടായില്ല.

2020 ഡിസംബറിൽ രാജ്യം വീണ്ടും അടച്ചുപൂട്ടി. നിലവിൽ ജനസംഖ്യയുടെ 10 ശതമാനം പേരെ വാക്​സിനേഷൻ വിധേയമാക്കിയിട്ടുണ്ട്​.