ശനിയെക്കാണാൻ ടെലസ്​കോപ്പുമായി നടുറോഡിലിറങ്ങി വയോധികൻ; ജനം കൂടിയതോടെ ഗതാഗതസ്തംഭനം -വിഡിയോ

ശനി ഗ്രഹത്തെക്കാണാൻ ടെലസ്​കോപ്പുമായി വയോധികൻ നടുറോഡിലിറങ്ങി. ആളുകൾ ക്യൂനിന്ന്​ ടെലസ്​കോപ്പ്​ നോക്കാൻ തുടങ്ങിയതോടെ ഗതാഗതസ്തംഭനംവരെ ഉണ്ടായി. ന്യൂയോർക്​, ബ്രൂക്​ലിൻ നഗരത്തിലാണ്​ സംഭവം. 82 കാരനായ ജോ ഡെൽഫോസ് ആണ്​ പരിസരം മറന്ന്​ വാനനിരീക്ഷണം നടത്തിയത്​. സ്വയം കാണുക മാത്രമല്ല മറ്റുള്ളവരെ വിളിച്ച്​ ആ മനോഹര കാഴ്​ച്ച കാണിച്ചുകൊടുക്കുകയും ചെയ്തു.

ഇൻസ്റ്റാഗ്രാം അക്കൗണ്ടായ ഗുഡ് ന്യൂസ് മൂവ്‌മെന്റിലാണ്​ വിഡിയോ പങ്കുവയ്ക്കപ്പെട്ടത്​. ‘കഴിഞ്ഞ രാത്രി ബ്രൂക്ലിനിൽ ഒരു മനുഷ്യൻ തന്റെ ദൂരദർശിനിയിലൂടെ ശനിയെ എല്ലാവരേയും കാണിക്കാൻ ട്രാഫിക് സ്തംഭനംവരെയുണ്ടാക്കി’ എന്ന കാപ്​ഷനിലാണ്​ വിഡിയോ പോസ്റ്റ്​ ചെയ്തിരിക്കുന്നത്​. ആളുകൾ ക്യൂവിൽ നിൽക്കുന്നതും ടെലിസ്കോപ്പിലൂടെ ഓരോരുത്തരായി നോക്കുന്നതും വിഡിയോയിൽ കാണാം. കാറുകൾ സാവധാനം നീങ്ങുമ്പോൾ ഡെൽഫോസ് കൗതുകത്തോടെ നോക്കി നിൽക്കുന്നുണ്ട്​.

ഗാർഡിയൻ റിപ്പോർട്ട് അനുസരിച്ച്, ഡെൽഫോസ് നടപ്പാതയിൽനിന്നാണ്​ തന്റെ വാനനിരീക്ഷണം ആരംഭിച്ചത്​. എന്നാൽ അവിടെനിന്ന് ഒന്നും കാണാൻ അദ്ദേഹത്തിന് കഴിഞ്ഞില്ല. തുടർന്നാണ്​ നടുറോഡിൽ നിന്നാൽ ശനിയുടെ പൂർണ്ണമായ കാഴ്ച ലഭിക്കും എന്ന്​ ആരോ പറഞ്ഞത്​. കേട്ടപാതി അദ്ദേഹം ടെലസ്​കോപ്പ്​ എടുത്ത്​ റോഡിൽവച്ചു.

View this post on Instagram

A post shared by Good News Movement (@goodnews_movement)

ഡെൽഫോസ് വാനിരീക്ഷകനാണെന്നും 20 വർഷത്തിലേറെയായി പാർക്ക് സ്ലോപ്പ് പരിസരത്ത് സ്ഥിരമായി കാണ​െപ്പടുന്ന ആളാണെന്നും റിപ്പോർട്ട് പറയുന്നു. തെളിച്ചമുള്ള രാത്രികളിൽ അദ്ദേഹം പതിവായി തന്റെ ദൂരദർശിനി പുറത്തെടുക്കുകയും വഴിയാത്രക്കാരെ അതിലൂടെ നോക്കാൻ പ്രോത്സാഹിപ്പിക്കുകയും ചെയ്യും. ഡാഫ്‌നെ ജൂലിയറ്റ് എല്ലിസ് എന്ന 26 കാരിയാണ് വിഡിയോ ചിത്രീകരിച്ച്​ സമൂഹമാധ്യമത്തിൽ പങ്കുവച്ചത്​.