സാമുദായിക കലാപം: ബംഗ്ലാദേശിൽ 450 പേർ അറസ്​റ്റിൽ

ധാക്ക: സാമുദായിക കലാപത്തെ തുടർന്ന്​ ബംഗ്ലാദേശിൽ 450 പേരെ അറസ്​റ്റ്​ ചെയ്​തു. ദുർഗ പൂജ ആഘോഷങ്ങളോടനുബന്ധിച്ച്​ തുടങ്ങിയ അക്രമങ്ങളെ തുടർന്ന്​ ആറോളം ക്ഷേത്രങ്ങൾ ആക്രമിക്കപ്പെട്ടിരുന്നു. എട്ടുപേർ കൊല്ലപ്പെടുകയും ചെയ്​തു. കലാപത്തോടനുബന്ധിച്ച്​ 70ലേറെ പരാതികളാണ്​ അധികൃതർക്ക്​ ലഭിച്ചത്​. അക്രമങ്ങളിൽ പ്രതിഷേധിച്ച്​ വിവിധ സംഘടനകൾ സമരം ശക്​തമാക്കിയിട്ടുണ്ട്​.

ബംഗ്ലാദേശിൽ ആകെ ജനസംഖ്യയുടെ 10 ശതമാനമേ ഹിന്ദു വിഭാഗങ്ങളുള്ളൂ. കലാപത്തിൽ അന്വേഷണം നടത്തണമെന്ന്​ ആവശ്യപ്പെട്ട്​ ആംനസ്​റ്റി ഇൻറർനാഷനൽ രംഗത്തുവന്നു.

ബംഗ്ലാദേശിൽ ഹിന്ദുമതവിഭാഗങ്ങൾക്കു നേരെ നടക്കുന്ന ആക്രമണങ്ങളെ യു.എസ്​ അപലപിച്ചു. മതസ്വാതന്ത്ര്യം മനുഷ്യാവകാശമാണെന്നും ലോകത്തെല്ലായിടത്തുമുള്ള പൗരൻമാർക്ക്​ അവരുടെ ആചാരങ്ങളും വിശ്വാസങ്ങളും പുലർത്താനുള്ള അവകാശമുണ്ടെന്നും യു.എസ്​ സ്​റ്റേറ്റ്​ ഡിപാർട്​മെൻറ്​ വക്​താവ്​ വ്യക്തമാക്കി.

കർശന നടപടിക്ക്​ നിർദേശം

ധാക്ക: ക്ഷേത്രങ്ങൾ ആക്രമിച്ചവർക്കെതിരെ കർശന നടപടി സ്വീകരിക്കണമെന്ന്​ മന്ത്രിസഭായോഗത്തിൽ ബംഗ്ലാദേശ്​ പ്രധാനമന്ത്രി ശൈഖ്​ ഹസീന ആഭ്യന്തരമന്ത്രി അസദുസ്സമാൻ ഖാന്​​ നിർദേശം നൽകി. ഇത്തരം സംഭവങ്ങൾ ആവർത്തിക്കാതിരിക്കാൻ കർശന നടപടി സ്വീകരിക്കണമെന്നും ആവശ്യപ്പെട്ടു.