2020ൽ​ 27.5 കോടി ജനങ്ങൾ മയക്കുമരുന്ന്​ ഉപയോഗിച്ചുവെന്ന്​​ യു.എൻ റിപ്പോർട്ട്​

ജനീവ: കഴിഞ്ഞവർഷം ലോകത്ത്​ 27.5 കോടി ജനങ്ങൾ മയക്കുമരുന്ന്​ ഉപയോഗിച്ചുവെന്ന്​​ യു.എൻ റിപ്പോർട്ട്​. 3.6 കോടി ജനങ്ങൾ മയക്കുമരുന്ന്​ ഉപയോഗവുമായി ബന്ധപ്പെട്ടുള്ള പ്രശ്​നങ്ങൾ അഭിമുഖീകരിക്കുന്നതായും യു.എൻ ഓഫീസ്​ ഓഫ്​ ഡ്രഗ്​ ആൻഡ്​ ​ക്രൈം പുറത്തുവിട്ട റിപ്പോർട്ടിൽ പറയുന്നു.

കഴിഞ്ഞ 24 വർഷത്തിനിടയിൽ കഞ്ചാവ്​ സംഭരണം വർധിച്ചെന്നും കോവിഡ്​ മഹാമാരിക്കിടയിൽ ഇതി​െൻറ ഉപയോഗം വർധിച്ചെന്നും റിപ്പോർട്ടിൽപറയുന്നു. 77 രാജ്യങ്ങളിൽ നിന്നുള്ള ആരോഗ്യ പ്രവർത്തകർ വഴിയാണ്​ യു.എൻ റിപ്പോർട്ട്​ തയ്യാറാക്കിയിരിക്കുന്നത്​.

''മയക്കുമരുന്ന്​ ഉപയോഗത്തെ തുടർന്നുള്ള പ്രശ്​നങ്ങൾ മനസ്സിലാകാത്തതിനാലാണ്​ ബഹുഭൂരിപക്ഷവും മയക്കുമരുന്ന്​ ഉപയോഗിക്കുന്നത്​. ഇതിനെക്കുറിച്ച്​ യുവാക്കളിൽ ബോധം വളർത്തണം. 2010നും 2019നും ഇടയിൽ മയക്കുമരുന്ന്​ ഉപയോഗിക്കുന്നവർ 22ശതമാനം വർധിച്ചു. 2030ൽ നിലവിലുള്ളതിൽനിന്നും 11 ശതമാനം കൂടി വർധിക്കും. ആഫ്രിക്കയിൽ 40 ശതമാനത്തോളമാണ്​ വർധനവുണ്ടാകുക. ഇവിടെ യുവാക്കളുടെ ജനസംഖ്യയിലുണ്ടാകുന്ന വർധനവാണ്​ ഇതിന്​ കാരണം''.

''15നും 64വയസ്സിനും ഇടയിലുള്ളവരിൽ 5.5 ശതമാനം പേർ വർഷത്തിൽ ഒരിക്കലെങ്കിലും മയക്കുമരുന്ന്​ ഉപയോഗിക്കുന്നവരാണ്​. കുത്തിവെക്കുന്ന തരം മരുന്ന്​ ഒരു കോടി പത്തുലക്ഷം പേർ ഉപയോഗിക്കുന്നു. ഇവരിൽ പകുതിയോളം പേർ ഹെ​പ്പറ്റൈറ്റിസ്​ സി രോഗബാധിതരാണ്​'' - യു.എൻ ഓഫീസ്​ ഓഫ്​ ഡ്രഗ്​ ആൻഡ്​ ​ക്രൈം ഡയറക്​ടർ ഗാദ വാലി പറഞ്ഞു