ലിബിയയിൽ വെടിവെപ്പ്​, സ്​ഫോടനം: 23 മരണം, നിരവധി പേർക്ക്​ പരിക്ക്​

ട്രിപളി: ലിബിയൻ തലസ്​ഥാനമായ ട്രിപളിയിൽ രാഷ്​ട്രീയ വിഭാഗങ്ങൾ തമ്മിലുള്ള ഏറ്റുമുട്ടലിൽ 23 പേർ കൊല്ല​പ്പെട്ടു. നിരവധി പേർക്ക്​ പരിക്കേറ്റതായും റിപ്പോർട്ടുണ്ട്​. മരിച്ചവരിൽ യുവ ഹാസ്യനടൻ മുസ്​തഫ ബറാകയും ഉൾപ്പെടുന്നു. മിലിഷ്യകളെയും അഴിമതിയെയും പരിഹസിച്ചുള്ള മുസ്​തഫയുടെ വിഡിയോകൾ​ സമൂഹമാധ്യമങ്ങളിൽ വൈറലാണ്​. നെഞ്ചിൽ വെടിയേറ്റാണ്​ ഇദ്ദേഹം മരിച്ചത്​.

2011ലെ ജനകീയ പ്രക്ഷോഭത്തിൽ 30 വർഷത്തോളം രാജ്യം ഭരിച്ച മുഅമ്മർ ഗദ്ദാഫിയെ അധികാരത്തിൽ നിന്ന്​ പുറത്താക്കിയതോടെയാണ്​ ലിബിയയിൽ ആഭ്യന്തരകലാപം രൂക്ഷമായത്​. എന്നാൽ രണ്ടുവർഷത്തോളമായി സംഘർഷങ്ങളൊന്നുമില്ലാതെ രാജ്യം ശാന്തമായിരുന്നു.

ശനിയാഴ്​ച അന്താരാഷ്​ട്ര പിന്തുണയുള്ള സർക്കാർ എതിരാളിയായ ഫത്​ഹി ബഷഗ്​ധയുടെ മിലിഷ്യയുടെ വാഹനവ്യൂഹ​ത്തെ പിൻവലിക്കാൻ ശ്രമിച്ചതാണ്​ പ്രശ്​നങ്ങൾക്കു കാരണമായത്​.

പിന്നാലെ തലസ്​ഥാനമായ ട്രിപളിയിൽ ​ചെറിയ രീതിയിൽ വെടിവെപ്പും സ്​ഫോടനങ്ങളുമുണ്ടായി. നഗരത്തിൽ നിന്ന്​ കറുത്ത പുക ഉയരുന്നത്​ കാണാമായിരുന്നു.നിരവധി ആശുപത്രികൾ സ്​ഫോടനങ്ങളിൽ തകർന്നതായി എമർജൻസി സർവീസുകൾ അറിയിച്ചു. ആക്രമണം തുടരുന്ന മേഖലകളിൽ നിന്ന്​ ആളുകളെ ഒഴിപ്പിക്കാനും ശ്രമം തുടരുകയാണ്​. ലിബിയയിൽ അടിയന്തര വെടിനിർത്തൽ ആവശ്യപ്പെട്ട്​ യു.എൻ രംഗത്തുവന്നിട്ടുണ്ട്​.

ഒരുകാലത്ത്​ ആ​ഫ്രിക്കൻ രാജ്യങ്ങളിൽ ഏറ്റവും സമ്പന്നതയിൽ കഴിഞ്ഞ രാജ്യമായിരുന്നു ലിബിയ. ആരോഗ്യസംവിധാനവും വിദ്യാഭ്യാസവും തികച്ചും സൗജന്യമായിരുന്നു ഇവിടെ. എന്നാൽ നിരന്തരമുണ്ടായ കലാപങ്ങളും സംഘർഷങ്ങളും രാജ്യത്തെ അസ്​ഥിരമാക്കി.