സായുധ സംഘം റസിഡൻഷ്യൽ​ സ്​കൂൾ വളഞ്ഞു; 140 വിദ്യാർഥികളെ തട്ടിക്കൊണ്ടുപോയി

അബുജ: സായുധ സംഘം റസിഡൻഷ്യൽ​ സ്​കൂൾ വളഞ്ഞ്​ 140 വിദ്യാർഥികളെ തട്ടിക്കൊണ്ടുപോയി. തിങ്കളാഴ്​ച ഖദുന പട്ടണത്തിലാണ്​ സംഭവം. വടക്കുപടിഞ്ഞാറൻ നൈജീരിയയിൽ കഴിഞ്ഞ ഡിസംബറിനു ശേഷം 10ാം തവണയാണ്​ സമാനമായി വിദ്യാർഥികളെ കൂട്ടമായി തട്ടിക്കൊണ്ടുപോകുന്നത്​. വൻതുക മോചനദ്രവ്യം ആവശ്യപ്പെടുന്ന സായുധ സംഘമാണ്​ പിന്നിലെന്നാണ്​ സംശയം.

തോക്കുമായെത്തി ചുറ്റും വെടിയുതിർത്ത് ബെഥൽ ബാപ്​റ്റിസ്​റ്റ്​ ഹൈ സ്​കൂൾ ഹോസ്​റ്റലിൽ കയറിയ സംഘം കുട്ടികളെ തട്ടി​ക്കൊണ്ടുപോകുകയായിരുന്നു. ഒരു വനിത അധ്യാപികയുൾപെടെ 26 പേരെ രക്ഷപ്പെടുത്തി.

180 ഓളം വിദ്യാർഥികൾ താമസിച്ചുപഠിക്കുന്ന സ്​കൂളിൽ പരീക്ഷയടുത്ത സമയമായിരുന്നു. അർധരാത്രി 11 മണിയോടെ സ്​കൂളിലെത്തിയ സംഘം പുലർച്ചെ നാലുമണിയോടെയാണ്​ വിദ്യാർഥികളുമായി അജ്​ഞാത കേന്ദ്രത്തിലേക്ക്​ മടങ്ങിയത്​്​. വിവര​മറിഞെത്തിയ പൊലീസും സൈന്യവും ചേർന്ന്​ രക്ഷാ പ്രവർത്തനം ഊർജിതമാക്കിയിട്ടുണ്ട്​.

വടക്കു പടിഞ്ഞാറൻ നൈജീരിയയിൽ വിദ്യാർഥികളെ തട്ടിക്കൊണ്ടുപോകൽ തൊഴിലാക്കിയ സായുധ സംഘങ്ങൾ സജീവമാണ്​. മാസങ്ങൾക്കിടെ 1,000 ഓളം പേരാണ്​ ഇതുപോലെ തട്ടിപ്പിനിരയായത്​. ഇതിൽ 150ലേറെ പേർ ഇപ്പോഴും ബന്ദികളായി തുടരുകയാണ്​. നിരത്തുകളിൽനിന്നും വീടുകളിൽനിന്നും ​തട്ടിക്കൊണ്ടുപോകുന്ന സംഘം അടുത്തിടെ ആശുപത്രിയിൽനിന്ന്​ ആറു ​േപരെ തട്ടിക്കൊണ്ടുപോയ സംഭവവും റിപ്പോർട്ട്​ ചെയ്യപ്പെട്ടു. നേരത്തെ ബൊക്കോഹറാം ആണ്​ ബന്ദികളാക്കുന്ന സംഭവത്തിന്​ രാജ്യത്ത്​ തുടക്കമിട്ടത്​. ഈ തന്ത്രം ഇപ്പോൾ മറ്റു സായുധ സംഘങ്ങൾ കൂടി ഏറ്റെടുത്തതാണ്​ വലിയ വെല്ലുവിളിയാകുന്നത്​.