ഒരു കോവിഡ്​ രോഗി പോലുമില്ലാത്ത പത്തു രാജ്യങ്ങളുണ്ട്​..

ലണ്ടൻ: കോവിഡ്​ 19 ലോകത്തെ ഏതാണ്ടെല്ലാ രാജ്യങ്ങളെയും കീഴടക്കിക്കഴിഞ്ഞു. മഹാമാരി ലോകം നിറയുന്നതിനിടയിലും ഒരു ​േരാഗി പോലുമില്ലാതെ തലയുയർത്തിനിൽക്കുന്ന പത്തു രാജ്യങ്ങളുണ്ട്​. പസഫിക്​ ഐലൻഡിലെ ഈ രാജ്യങ്ങളിൽ ഇതുവരെ ഒറ്റ കോവിഡ്​ രോഗി പോലും ഇല്ല. എങ്കിലും, ആഗോള തലത്തിൽ കൊറോണ ഉയർത്തിയ കടുത്ത പ്രതിസന്ധി ഇവിടങ്ങളിലേക്കും പടർന്നുകയറിയിരിക്കുകയാണ്​. മനോഹര ബീച്ചുകളടക്കമുള്ള ഈ രാജ്യങ്ങളിൽ മിക്കതി​െൻറയും പ്രധാന വരുമാന മാർഗം ടൂറിസത്തിനിന്നായതു കൊണ്ടാണ്​ ​രോഗം ഇവരെയും ബുദ്ധിമുട്ടിക്കുന്നത്​.

1. പലാവു

2. മൈക്രോനേഷ്യ

3. മാർഷൽ ഐലൻഡ്​സ്​സ്​

4. നൗറു

5. കിരിബാതി

6. സോളമൻ ഐലൻഡ്​സ്​

7. തുവാലു

8. സമോവ

9. വനോട്ടു

10. ടോംഗ

എന്നിവയാണ്​ ഈ പത്തു രാജ്യങ്ങൾ. ഐക്യരാഷ്​ട്ര സഭയിൽ അംഗങ്ങളായ മുഴുവൻ രാജ്യങ്ങളെയും ​പരിഗണിച്ചാണ്​ ഈ ലിസ്​റ്റ്​ തയാറാക്കിയത്​.

പലാവുവിൽ 18000 ആണ്​ ആകെ ജനസംഖ്യ. ടൂറിസം മുഖ്യവരുമാനമായി മാറുന്ന ദ്വീപിൽ കഴിഞ്ഞ വർഷം ഒരു ലക്ഷത്തോളം ടൂറിസ്​റ്റുകളെത്തിയിരുന്നു. എന്നാൽ, കോവിഡ്​ ഭീഷണി ഉയർന്നതോടെ കഴിഞ്ഞ മാർച്ച്​ മുതൽ അതിർത്തികൾ അടച്ചു. ടൂറിസ്​റ്റുകളെ നിയന്ത്രിച്ചതോടെ ഒരാൾക്കുപോലും ഇതുവരെ കോവിഡ്​ 19 പിടിപെട്ടിട്ടില്ല. രോഗത്തെ വിജയകരമായി പ്രതിരോധിച്ചുനിർത്തിയെങ്കിലും 50 ശതമാനത്തോളം വരുമാനം ടൂറിസം മേഖലയിൽനിന്ന്​ കണ്ടെത്തിയിരുന്ന പലാവുവി​െൻറ സമ്പദ്​ വ്യവസ്​ഥ താറുമാറായിരിക്കുന്നു. ലോഡ്​ജുകൾ അടച്ചു, റെസ്​റ്ററൻറുകൾ കാലിയായിരിക്കുന്നു, കരകൗശല സാധനങ്ങൾ വിൽക്കുന്ന കടകൾ പൂട്ടിയിട്ടിരിക്കുന്നു. കോവിഡിന്​ മുമ്പ്​ 80 ശതമാനം റൂമുകളും ബുക്ക്​ ചെയ്യ​െപ്പട്ടിരുന്ന അവസ്​ഥയിൽനിന്ന്​ ഇപ്പോൾ റൂമുകളെല്ലാം കാലിയാണെന്ന്​ പലാവു ഹോട്ടൽ മാനേജർ ബ്രയൻ ലീ പറയുന്നു.

പസഫിക്​ സമുദ്രത്തിന്​ തൊട്ടുകിടക്കുന്ന ഈ ദ്വീപുകളൊക്കെ സാമ്പത്തികമായി കനത്ത തിരിച്ചടിയിലാണ്​. മാർഷൽ ഐലൻഡിലും രോഗികളൊന്നുമില്ലെങ്കിലും സന്ദർശകരില്ലാതെ വരുമാനം ഇടിഞ്ഞു. കൂടുതലും ഏഷ്യയിൽനിന്നുള്ള ടൂറിസ്​റ്റുകൾ എത്തിയിരുന്ന ഇവിടെ ഹോട്ടൽ മുറികളിൽ 90 ശതമാനത്തോളം ആളുണ്ടായിരുന്നതിൽനിന്ന്​ ഇപ്പോൾ അഞ്ചു ശതമാനമായി കുറഞ്ഞു. 1997നുശേഷം ഏറ്റവും കടുത്ത പ്രതിസന്ധി നേരിടുന്ന ഇവിടെ 700 പേർക്ക്​ തൊഴിൽ നഷ്​ടമാവുമെന്നാണ്​ കണക്കുകൂട്ടൽ. 58,400 ആണ്​ മൊത്തം ജനസംഖ്യ.

അതേസമയം, മൂന്നു ലക്ഷം ജനസംഖ്യയുള്ള വനോട്ടുവിൽ കോവിഡ്​ 19 കാര്യമായ പ്രതിസന്ധി സൃഷ്​ടിച്ചിട്ടില്ല. 80 ശതമാനംപേരും ടൗണുകൾക്ക്​ പുറത്താണ്​ താമസം എന്നതുകൊണ്ടാണത്​. ടൂറിസത്തെയല്ലാതെ മറ്റു ജീവിതമാർഗങ്ങളെ ആശ്രയിക്കുന്നവരാണ്​ മിക്കവരും. കഴിയുന്നിടത്തോളം അതിർത്തികൾ അടച്ചിടണമെന്നും രോഗം വേണ്ടെന്നുമാണ്​ ആളുകളുടെ മനോഭാവമെന്ന്​ വനോട്ടുവിലെ പബ്ലിക്​ ഹെൽത്ത്​ ഡയറക്​ടർ ഡോ. ലെൻ ടാരിവോൻഡ പറയുന്നു.