എൻജിനീയറിങ്ങിന്റെ പുതിയ മുഖം
text_fieldsഫുഡ് എൻജിനീയറിങ്/ ഫുഡ് ടെക്നോളജി
ഇന്നത്തെ കാലത്ത് കൂടുതൽ ഗവേഷണങ്ങളും സാങ്കേതിക വിദ്യയും വേണ്ടിവരുന്ന ഒരു മേഖലയാണ് ഫുഡ് പ്രോസസിങ്. ഭക്ഷ്യോൽപന്നങ്ങൾ ഏതുമാകെട്ട എവിടെയും എപ്പോഴും കേടുകൂടാതെയും ആകർഷകമാക്കിയും ഇന്ന് നമുക്ക് ലഭ്യമാക്കുന്നതിന് കാരണം ഈ മേഖലയിലെ വളർച്ച തന്നെയാണ്. ഭക്ഷ്യോൽപന്നങ്ങൾ കേടുകൂടാതെ കൂടുതലും പാക്കറ്റുകളിലും ബോട്ടിലുകളിലുമായി ലഭ്യമാകുന്നത് ഇതിലൂടെ സാധ്യമാകുന്നു.
ഫുഡ് പാക്കേജിങ്, പോഷകഗുണങ്ങൾ ക്രമീകരിക്കൽ, കെമിക്കൽ ബാലൻസ്, ഫുഡ് മാർക്കറ്റിങ്, ഗവേഷണം തുടങ്ങിയവ ഉൾക്കൊള്ളുന്ന കോഴ്സാണ് ഫുഡ് ടെക്നോളജി.
കൃത്യമായ രീതികളും സാങ്കേതിക സംവിധാനങ്ങളുമുപയോഗിച്ച് ഭക്ഷ്യവിഭവങ്ങളുടെ ദൈർഘ്യവും ഗുണമേന്മയും വർധിപ്പിക്കുന്ന ശാസ്ത്രത്തെയാണ് ഫുഡ് പ്രോസസിങ് എന്ന് വിളിക്കുന്നത്. ഈ കോഴ്സ് പൂർത്തിയാക്കുന്നവർക്കൊക്കെ മികച്ച ഫുഡ് പ്രോസസിങ് കമ്പനികളിൽ തൊഴിൽ ലഭിക്കുന്നു. ഹരിയാനയിൽ ഉള്ള നാഷനൽ ഇൻസ്റ്റിറ്റ്യൂട്ട് ഓഫ് ഫുഡ് ടെക്നോളജി എൻറർപ്രണർഷിപ് മാനേജ്മെൻറിൽ ഫുഡ് ടെക്നോളജി എം.ടെക് കോഴ്സ് ഉണ്ട്.
കേരളത്തിൽ ആദ്യമായി കൊല്ലം ടി.കെ.എം ഇൻസ്റ്റിറ്റ്യൂട്ട് ഓഫ് ടെക്നോളജിയിലാണ് ബി.ടെക് ഇൻ ഫുഡ് ടെക്നോളജി കോഴ്സ് ആരംഭിച്ചത്. മലപ്പുറം ജില്ലയിലെ തവനൂരിലെ കാർഷിക സർവകലാശാലയുടെ കീഴിലെ കേളപ്പജി കോളജിലും ഫുഡ് എൻജിനീയറിങ് കോഴ്സ് നിലവിലുണ്ട്. നാലുവർഷമാണ് കോഴ്സ് കാലാവധി. പ്ലസ്ടു സയൻസ് വിദ്യാർഥികൾക്കാണ് അവസരം.
മൈസൂരിലെ സെൻട്രൽ ഫുഡ് ടെക്നോളജി റിസർച് ഇൻസ്റ്റിറ്റ്യൂട്ട് സ്ഥാപനത്തിൽ ഫുഡ് പ്രോസസിങ് മേഖലയിലെ ഗവേഷണവും സാധ്യമാണ്.
ഫുഡ് സയൻറിസ്റ്റ്, പ്രോസസ് എൻജിനീയർ, പ്രൊഡക്ഷൻ മാനേജർ, ക്വാളിറ്റി മാനേജർ, ഫുഡ് സെയിൽസ് മാനേജർ എന്നീ ജോലികൾ നേടാൻ ഈ കോഴ്സിലൂടെ സാധ്യമാണ്.
ടെക്സ്റ്റയിൽ എൻജിനീയറിങ്
വസ്ത്രവൈവിധ്യം എന്നും പ്രാധാന്യമർഹിക്കുന്ന മേഖല തന്നെയാണ്. ഓരോ രാജ്യത്തും അവരവരുടെതായ വസ്ത്ര രീതികൾ നിലനിൽക്കുന്നു. അതിനാൽതന്നെ ഈ മേഖലയിൽ ഒട്ടനവധി വൈവിധ്യങ്ങളും കാണാവുന്നതാണ്. ഇതുകൊണ്ടുതന്നെയാണ് ടെക്സ്റ്റയിൽ എൻജിനീയറിങ്ങിെൻറ സാധ്യത വർധിക്കുന്നതിെൻറയും കാരണം വസ്ത്രവിപണന രംഗത്ത് ഒട്ടേറെ സാധ്യതകൾ ഈ പഠനശാഖ തുറന്നുതരുന്നു. നമുക്കറിയാം, ഫാഷൻ സങ്കൽപങ്ങൾ ദിനംപ്രതി മാറിമറിയുകയാണ്. വസ്ത്രങ്ങൾ മാത്രമല്ല ബെഡ്ഷീറ്റുകൾ, കർട്ടനുകൾ, കാർപ്പെറ്റുകൾ എന്നുതുടങ്ങി ടവലുകളിൽ പോലും ഡിസൈനും നിർമാണവും ഏറെ സാധ്യതകൾ ഒരുക്കുന്നു. കേരളത്തിൽ മൂന്ന് പോളിടെക്നിക് കോളജുകളിൽ ഇൗ കോഴ്സ് പഠിപ്പിക്കുന്നു. 1) ടി.വി.എം പോളിടെക്നിക് 2) കൊരട്ടി പോളിടെക്നിക് 3) കണ്ണൂർ പോളിടെക്നിക് എന്നിവ ടെക്സ്റ്റയിൽ ടെക്നോളജി, മെക്കാനിക്കൽ എൻജിനീയറിങ്ങുമായി വളരെ അടുത്തുകിടക്കുന്നു.
കാരണം മെഷീനുകളുടെ ഉപയോഗം ടെക്സ്റ്റയിൽ ടെക്നോളജിയിലും വളരെ ആവശ്യമാണ്. ശാസ്ത്ര സാങ്കേതിക വിദ്യയിലൂടെ വസ്ത്ര നിർമാണത്തിൽ പുതിയ രീതികൾ വികസിപ്പിച്ചെടുക്കുന്നതിലാണ് ഒരു ടെക്സ്റ്റയിൽ ടെക്നോളജിസ്റ്റിെൻറ വിജയം.
കേരളത്തിനു പുറത്ത് ഈ മേഖലയിൽ വളരെ വലിയ സാധ്യതയാണുള്ളത്. വിദേശത്തും ഒട്ടനവധി അവസരങ്ങൾ ലഭ്യമാണ്. സ്വന്തമായി ബിസിനസ് തുടങ്ങാനും ഈ പഠനശാഖ വഴിയൊരുക്കുന്നു.
ഫാഷൻ ഡിസൈൻ, ആക്സസറി ഡിസൈൻ, ഗാർമെൻറ് മാനുഫാക്ചറിങ് ടെക്നോളജി, ടെക്സ്റ്റയിൽ ഡിസൈനിങ് ആൻഡ് ഡവലപ്മെൻറ് എന്നിവ ടെക്സ്റ്റയിൽ ടെക്നോളജിയുടെ അനുബന്ധ മേഖലകളാണ്.
നാനോ ടെക്നോളജി
നമ്മളിന്ന് ജീവിക്കുന്നതുതന്നെ നാനോ യുഗത്തിലാണ്. നാനോ എന്ന ഗ്രീക്ക് പദത്തിൽനിന്നാണ് നാനോ ടെക്നോളജി രുപപ്പെട്ടത്. വളരെ ചെറുത് എന്ന് അർഥമാക്കിയുള്ള ഈ പദം ഇന്ന് എല്ലാ മേഖലയിലും ഉണ്ടാക്കിയിരിക്കുന്ന പ്രഭാവം വളരെ അതിശയിപ്പിക്കുന്നതാണ്. 1 നാനോ മീറ്റർ മുതൽ 100 നാനോ മീറ്റർ വരെ വലുപ്പമുള്ള കണങ്ങൾകൊണ്ട് പുതിയ ഉപകരണങ്ങളും വസ്തുക്കളും നിർമിക്കുന്ന നൂതന സാങ്കേതിക വിദ്യയാണ് നാനോ ടെക്നോളജി. ഇത്തരത്തിൽ കാര്യക്ഷമതയും ഗുണവും വർധിക്കുന്നു. അതിനാൽത്തന്നെ ഇന്ത്യക്ക് അകത്തും പുറത്തും വൻ സാധ്യതകളാണ് നാനോ ടെക്നോളജി കഴിഞ്ഞവരെ കാത്തിരിക്കുന്നത്. പ്ലസ്ടു കഴിഞ്ഞവർക്ക് നാനോ ടെക്നോളജിയിൽ ബിരുദ കോഴ്സിന് ചേരാം. കൂടാതെ ബി.ടെക് ഇൻ നാനോ ടെക്നോളജി, എം.ടെക് ഇൻ നാനോ ടെക്നോളജി എന്നീ കോഴ്സുകളും നിലവിലുണ്ട്. സയൻസ് വിഷയങ്ങളിൽ ബിരുദമുള്ളവർക്കും നാനോ ടെക്നോളജിയിൽ ബിരുദാനന്തര ബിരുദം നേടാവുന്നതാണ്. ബിരുദത്തിന് 50 ശതമാനം മാർക്ക് വേണമെന്നതാണ് യോഗ്യത.
കോഴ്സ് പഠനകേന്ദ്രങ്ങൾ
എൻ.ഐ.ടി കാലിക്കറ്റ് (എം.ടെക് നാനോ ടെക്നോളജി)
ജാമിഅ മില്ലിയ്യ ന്യൂഡൽഹി (എം.ടെക് നാനോ ടെക്നോളജി)
ഐ.ഐ.ടി റൂർക്കി (എം.ടെക്, പിഎച്ച്.ഡി നാനോ ടെക്നോളജി)
ഐ.ഐ.ടി പട്ന (എം.ടെക് നാനോ ടെക്നോളജി) കൂടാതെ ഇന്ത്യക്ക് പുറത്ത് വിദേശരാജ്യങ്ങളിൽ പഠിക്കാൻ ആഗ്രഹിക്കുന്നവർക്ക് ആസ്ട്രേലിയ, കാനഡ, ജർമനി തുടങ്ങിയ വികസിത രാജ്യങ്ങളും തെരഞ്ഞെടുക്കാവുന്നതാണ്.
കർണാടകയിലെ ശ്രീനിവാസ് ഇൻസ്റ്റിറ്റ്യൂട്ട് ടെക്നോളജി, ചെന്നൈ എസ്.ആർ.പുരം യൂനിവേഴ്സിറ്റിയിലും ബി.ടെക് ഇൻ നാനോ ടെക്നോളജി കോഴ്സ് ലഭ്യമാണ്. ബി.ടെക് പൂർത്തിയായവർക്ക് എം.ടെക് ഇൻ നാനോ ടെക്നോളജി കോഴ്സിന് അപേക്ഷിക്കാം.
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.