ലോക എയ്ഡ്സ് ദിനം... ആരോഗ്യത്തോടെയിരിക്കാം

ഹ്യൂമൻ ഇമ്യൂണോ ഡെഫിഷ്യൻസി വൈറസ് (Human Immuno Deficiency Virus) എന്ന വൈറസുകളാണ് എയ്ഡ്സ് ഉണ്ടാക്കുന്നത്. ആർ.എൻ.എ (R.N.A) വിഭാഗത്തിൽപെട്ട ഒരു ‘റിട്രോ വൈറസ്’ ആണ് എയ്ഡ്സ് വൈറസ്. 1984ൽ അമേരിക്കൻ നാഷനൽ കാൻസർ ഇൻസ്റ്റിറ്റ്യൂട്ടിലെ റോബർട്ട് ഗാലേ ആണ് വൈറസ് കണ്ടെത്തിയത്. പകർച്ചവ്യാധിയാണ് എച്ച്.ഐ.വി. പക്ഷേ, രോഗിയോടൊപ്പം കഴിഞ്ഞത് കൊണ്ടോ സ്പർശിച്ചതുകൊണ്ടോ രോഗം വരില്ല.

1984ലാണ് എയ്ഡ്സ് ഒരു രോഗമാണെന്ന് ആദ്യം തിരിച്ചറിഞ്ഞത്. വളരെ പെട്ടെന്നുതന്നെ ഈ വൈറസ് ഒരു പകർച്ചവ്യാധിയായി 35 ദശലക്ഷത്തിലധികം പേരെ കൊന്നൊടുക്കി.

എച്ച്.ഐ.വി അണുബാധ പൂർണമായും സുഖപ്പെടുത്താനാവില്ല. എന്നാൽ, ഫലപ്രദമായ ആന്റിറെട്രോമിയൽ മരുന്നുകളിലൂടെ വൈറസിനെ നിയന്ത്രിക്കാനും രോഗം പകരുന്നത് തടയാനും രോഗികൾക്ക് ആരോഗ്യകരമായ ജീവിതം നയിക്കാനും സാധിക്കും.

എങ്ങനെയാണ് HIV പകരുന്നത്?

• എച്ച്.ഐ.വി ബാധിതർ ഉപയോഗിച്ച സിറിഞ്ച്, സൂചി എന്നിവ ഉപയോഗിക്കരുത്.
• എച്ച്.ഐ.വി ബാധിതയായ മാതാവിൽനിന്ന് ഗർഭസ്ഥ ശിശുവിലേക്ക്.
• എച്ച്.ഐ.വി ബാധിതരുടെ രക്തഘടകങ്ങളോ, അവയവങ്ങളോ സ്വീകരിക്കുന്നതു മൂലം.
• എച്ച്.ഐ.വി ബാധിതരുമായി ലൈംഗിക ബന്ധത്തിൽ ഏർപ്പെടുന്നതുമൂലം.
• എച്ച്.ഐ.വി. പ്രതിരോധ ശേഷി കുറച്ച് ശരീരത്തിന്റെ പ്രതിരോധം ക്രമേണ കുറയുന്ന മുറക്ക് ക്ഷയം ഉൾപ്പെടെ, പലതരം അണുബാധകൾ ശരീരത്തിലുണ്ടാവുകയും തുടർന്ന് മരണത്തിലേക്ക് നയിക്കുകയും ചെയ്യും.

എച്ച്.ഐ.വി പകരാത്ത വിധം

• ഈച്ച, കൊതുക് എന്നിവ വഴി
• ഒന്നിച്ചു താമസിക്കുക, ഒരേ പ്ലേറ്റിൽനിന്നും ഭക്ഷണം കഴിക്കുക
• ഒരേ ശൗചാലയം ഉപയോഗിക്കുക, പൊതുകുളത്തിൽ കുളിക്കുക, സ്പർശനം ഇവ വഴിയൊന്നും എച്ച്.ഐ.വി പകരില്ല

പരിശോധനകൾ

എച്ച്.ഐ.വി അണുബാധ കണ്ടെത്താനുള്ള രക്ത പരിശോധനയാണ് എലിസ (ELISA–Enzyme linked immunosorbent assay) ടെസ്റ്റ്. എച്ച്.ഐ.വിക്കെതിരായ ആന്റിബോഡി രക്തത്തിൽ ഉണ്ടോ എന്നാണ് ഈ പരിശോധന. ആദ്യപരിശോധനയിൽ എച്ച്.ഐ.വി അണുബാധ സ്ഥിരീകരിച്ചാൽ തുടർന്ന് രണ്ടു ടെസ്റ്റുകളും കൂടി നടത്തണം. മൂന്നു പരിശോധനകളുടെയും ഫലം പോസിറ്റിവ് ആണെങ്കിൽ അയാൾക്ക് എച്ച്.ഐ.വി പോസിറ്റിവിനുള്ള സാധ്യത കൂടുതലായിരിക്കും.

എച്ച്.ഐ.വി അണുബാധ ഉറപ്പിക്കാനുള്ള മറ്റൊരു പരിശോധനയാണ് വെസ്റ്റേൺ ബ്ലോട്ട് ടെസ്റ്റ്. ഈ പരിശോധനയിലും കൂടി പോസിറ്റിവ് ഫലം കണ്ടാൽ മാത്രമാണ് രോഗം ഉറപ്പിക്കുക.

ചികിത്സാമാർഗങ്ങൾ എന്തെല്ലാം?

എച്ച്.ഐ.വി​ ചികിത്സിക്കുന്ന മരുന്നുകളെ ആന്റി റിട്രോ വൈറൽ മരുന്നുകൾ എന്ന് വിളിക്കുന്നു. അവയിൽ രണ്ട് ഡസനിലധികം ഉണ്ട്. അവ ഒമ്പത് പ്രധാന തരങ്ങളായി വരുന്നു. എച്ച്.ഐ.വിക്ക് നിലവിൽ ചികിത്സയൊന്നുമില്ലെന്ന കാര്യം ഓർത്തിരിക്കേണ്ടത് പ്രധാനമാണ്. ഇതിനാൽ ആജീവനാന്ത ചികിത്സ ആവശ്യമാണ്. ആന്റി റിട്രോ വൈറൽ മരുന്നുകൾ ശരീരത്തിനുള്ളിൽ വൈറസിന്റെ തനിപ്പകർപ്പ് തടയുകയും കൂടുതൽ പ്രതിരോധ സംവിധാനത്തിന് കേടുപാടുകൾ വരുത്തുകയും ചെയ്യുന്നു.

എയ്ഡ്‌സാവുന്നത്

ആരോഗ്യമുള്ള ഒരാളിൽ ക്യുബിക് മില്ലി മീറ്ററിൽ 500 മുതൽ 1500 വരെ സി.ഡി ഫോർ കോശങ്ങൾ കാണും. ഒരു ക്യുബിക് മില്ലിമീറ്ററിൽ 200 കോശങ്ങളിലും കുറവ് എന്ന തോതിൽ സി.ഡി. ഫോർ കോശങ്ങളുടെ എണ്ണം കുറയുന്ന അവസ്ഥയാണ് എച്ച്.ഐ.വി. നല്ല ചികിത്സ ലഭിച്ചില്ലെങ്കിൽ എച്ച്.ഐ.വി ക്രമേണ രോഗപ്രതിരോധ സംവിധാനത്തെ നശിപ്പിക്കുകയും എയ്ഡ്സ് ആയി മാറുകയും ചെയ്യും.