Top
Begin typing your search above and press return to search.
keyboard_arrow_down
Login
exit_to_app
exit_to_app
പിന്തുടരാം ഇൗ മൂന്ന്​ പാഠങ്ങൾ
cancel
Homechevron_rightVelichamchevron_rightGeneral Storieschevron_rightപിന്തുടരാം ഇൗ മൂന്ന്​...

പിന്തുടരാം ഇൗ മൂന്ന്​ പാഠങ്ങൾ

text_fields
bookmark_border
സിവിൽ സർവിസ്​ എന്ന വലിയൊരു ലക്ഷ്യത്തിലേക്ക്​ നടന്നുകയറിയ മൂന്നുപേർ, സഫ്​ന നസ്​റുദ്ദീൻ, ആശിഷ്​ ദാസ്, ഗോകുൽ എസ്​. നിരവധി മലയാളികൾ ഇത്തവണ ഇൗ ലക്ഷ്യം നേടിയിട്ടുണ്ടെങ്കിലും ഇൗ മൂന്നുപേർക്ക്​ ചില പ്രത്യേകതകളുണ്ട്​. ഇവർ പല കാരണങ്ങൾകൊണ്ട്​ നിങ്ങൾക്ക്​ വഴികാട്ടികളാവുന്നവരാണ്​. ത​െൻറ 23ാം വയസ്സിൽ ആദ്യ ശ്രമത്തിൽത​െന്ന സിവിൽ സർവിസ്​ എന്ന നേട്ടത്തിനുടമയായ ആളാണ്​ സഫ്​ന. ഫയർമാനായി ജോലി ചെയ്​തുവരുന്നതിനിടെ ഒഴിവുസമയങ്ങളിൽ പഠിച്ച്​ ഇൗ നേട്ടം കരസ്​ഥമാക്കിയ ആളാണ്​ ആശിഷ്​. ത​െൻറ കാഴ്​ചപരിമിതിയെ നിശ്ചയദാർഢ്യംകൊണ്ടും പരിശ്രമംകൊണ്ടും തോൽപിച്ചയാളാണ്​ ഗോകുൽ എസ്​.

തിരുത്തലുകൾ വിജയത്തിലെത്തിക്കും

ആദ്യ അവസരത്തിൽതന്നെ 45ാം റാങ്കുമായി സിവിൽ സർവിസ്​​ കൈയെത്തിപ്പിടിച്ചയാളാണ്​ സഫ്​ന. ചെറിയ പ്രായത്തിൽത​െന്ന ഇന്ത്യയിലെ ഉന്നതമായ തൊഴിൽ മേഖലയിലേക്ക്​. തിരുവനന്തപുരം സ്വദേശിനി സഫ്​ന നസ്​റുദ്ദീൻ സംസാരിക്കുന്നു....

ലക്ഷ്യം മുന്നിൽകണ്ടുകൊണ്ട്​ പഠിക്കണം. എല്ലാവർക്കും ഉണ്ടാകും ഓരോ തെറ്റുകുറ്റങ്ങൾ, അത്​ തിരുത്തി മുന്നോട്ടുപോയാൽ വിജയം ഉറപ്പാണ്. സിവിൽ സർവിസ്​ ആർക്കും പരിശ്രമിച്ചാൽ കൈയെത്തിപ്പിടിക്കാവുന്നതേ ഉള്ളൂ. സിവിൽ സർവിസ്​ മാത്രമല്ല, ഏതൊരു പരീക്ഷയും മറികടക്കാൻ ആത്മവിശ്വാസവും തെറ്റുകൾ തിരുത്തി മുന്നേറാനുള്ള മനസ്സുംതന്നെയാണ്​ വേണ്ടത്​. യു.പി.എസ്​.സി സിലബസ്​ കൃത്യമായി മനസ്സിലാക്കിയശേഷമായിരുന്നു എ​െൻറ പഠനം. സിലബസ്​ പഠിച്ചുതീർക്കാനാവശ്യമായവയെല്ലാം കണ്ടെത്തി ശേഖരിച്ചു. കൃത്യമായ പഠനംത​െന്നയാണ്​ സിവിൽ സർവിസി​െൻറ രഹസ്യമ​ന്ത്രം. രണ്ടു ദിവസം പഠിച്ചശേഷം ഇനി ഒന്ന്​ പഠനത്തിൽനിന്ന്​ മാറിനിന്നേക്കാം എന്നു കരുതുന്നവർക്ക്​ അതത്ര എളുപ്പമായേക്കില്ല. ഒാ​േരാ ദിവസവും എത്ര പഠിച്ചുതീർക്കണം എന്ന ലക്ഷ്യം മുന്നിലുണ്ടാകണം, ആ ലക്ഷ്യം കൈവരിക്കുകയും വേണം. എ​െൻറ പോരായ്​മകളെക്കുറിച്ച്​ എനിക്ക്​ നല്ല ധാരണയുണ്ടായിരുന്നു. അത്​ മനസ്സിലാക്കിക്കൊണ്ടുതന്നെയാണ്​ പഠിച്ചതും.



ഒാരോ ഘട്ടത്തിലും ഒരു​പാട്​ പേർ പിന്തുണ നൽകി കൂടെയുണ്ടായിരുന്നു. ഏറ്റവും പ്രധാനം വീട്ടുകാരുടെയും അധ്യാപകരുടെയും പിന്തുണതന്നെ. പഠനം ഒരു വാശിയായി കണ്ട്​ മുന്നോട്ടുപോകു​േമ്പാൾ പല തടസ്സങ്ങളും നേരിടേണ്ടിവരും. അപ്പോൾ കൂടെനിൽക്കാൻ കൂട്ടുകാരും കുടുംബവും മാത്രം മതി. ഓരോ ഘട്ടത്തിലും എൻെറ തെറ്റുകുറ്റങ്ങൾ കൃത്യമായി മനസ്സിലാക്കി, പിന്നീട്​ അത്​ തിരുത്തി മുന്നോട്ടുപോകാൻ അധ്യാപകർ സഹായിച്ചു. എൻെറ കരുത്തും പോരായ്​മയും നല്ല ബോധ്യമുണ്ടായിരുന്നു.

സ്​കൂൾ കാലഘട്ടം മുതൽ പിന്തുണച്ച അധ്യാപകരുണ്ട്​ എ​െൻറ വിജയത്തിനു​ പിന്നിൽ. 2018ൽ മാർ ഇവാനിയോസ്​ കോളജിൽനിന്ന്​ ബി.എ ഇക്കണോമിക്​സിൽ ബിരു​ദം നേടിയശേഷമാണ്​ ഐ.എ.എസ്​ കോച്ചിങ്ങിന്​ ചേർന്നത്. ഒരു വർഷം കോച്ചിങ്​ പൂർത്തിയാക്കി, പരീക്ഷയെ നേരിട്ടു. റിട്ടയേഡ്​ സബ്​ ഇൻസ്​പെക്​ടർ ഹാജ നസ്​റുദ്ദീ​െൻറയും കാട്ടാക്കട എംപ്ലോയ്​മെൻറ്​ എക്​​സ്​​േചഞ്ചിലെ ടൈപിസ്​റ്റായ എ.എൻ. റംലയുടെയും മകളാണ്​. സിവിൽ സർവിസ്​ എന്ന ലക്ഷ്യത്തിലേക്കുള്ള ശ്രമങ്ങളിൽ സഹോദരിമാരായ ഫർസാനയും ഫസ്​നയും പൂർണ പിന്തുണയുമായി ഒപ്പമുണ്ടായിരുന്നു.

ആത്മവിശ്വാസംകൊണ്ട്​ മറികടക്കണം

ഇത്തവണ സിവിൽ സർവിസ്​ പ്രിലിമിനറി പരീക്ഷഎഴുതിനോക്കണം. അടുത്ത തവണ പഠിച്ച്​ എഴുതിനേടണം. തിരുവനന്തപുരം സ്വദേശി ഗോകുൽ എസ്​ 2019ൽ സിവിൽ സർവിസ് പ്രിലിമിനറി പരീക്ഷ​ എഴുതാനിരിക്കു​േമ്പാൾ എടുത്ത തീരുമാനം അതായിരുന്നു. ആഴത്തിലുള്ള വായന മാത്രമായിരുന്നു മുതൽക്കൂട്ട്​. ആദ്യ കടമ്പ എളുപ്പം കടന്നതോടെ കഠിനപ്രയത്​നമായിരുന്നു. ഇതോടെ ആദ്യ ചാൻസിൽതന്നെ സിവിൽ സർവിസ്​ നേട്ടവും കൈപ്പിടിയിലൊതുക്കി. 804ാം റാങ്കുമായി ഗോകുൽ നേടിയത്​ മറ്റൊരു ഇരട്ടിമധുരംകൂടിയായിരുന്നു. അഖിലേന്ത്യതലത്തിൽ പൂർണ അന്ധതയുമായി സിവിൽ സർവിസ്​ നേടുന്ന ആദ്യ മലയാളികൂടിയായി ഗോകുൽ...

2018ൽ ബിരുദം അവസാന വർഷത്തോടെയാണ്​ സിവിൽ സർവിസ്​ എന്ന ആഗ്രഹം മനസ്സിൽ കടന്നുകൂടുന്നത്​. ഒരുപാട്​ വായിക്കുന്ന ശീലം പഠനസമയത്ത്​ മുതൽക്കൂട്ടായി. കോച്ചിങ്ങിന്​ പോകാതെയായിരുന്നു പരിശീലനം. 2019 ജൂണിൽ എം.എ കഴിഞ്ഞശേഷം ഒക്​ടോബറിൽ പിഎച്ച്​.ഡിക്ക്​ ചേർന്നു. കോളജിൽ പഠനത്തോടൊപ്പമായിരുന്നു വായനയും. അക്കാദമിക്​സിലും കൾചറൽ ആക്​ടിവിറ്റികളിലും പ​െങ്കടുത്തിരുന്നു. ഈ ദിവസങ്ങളിൽ പലപ്പോഴും സിവിൽ സർവിസിനായി സമയം മാറ്റിവെക്കാൻ സാധിച്ചിരുന്നില്ല. പത്രം മാത്രമായിരുന്നു കൃത്യമായി വായിച്ചിരുന്നത്​.

ചെറുപ്പം മുതൽ ഡിബേറ്റുകളിലും ഇലക്യുഷനുകളിലും നിരന്തരം പ​​ങ്കെടുത്തിരുന്നു. 2019ൽ നാഷനൽ ഇൻറർ യൂനിവേഴ്​സിറ്റി യൂത്ത്​ ഫെസ്​റ്റിവലിൽ ഡിബേറ്റിന്​ സമ്മാനം ലഭിച്ചു. കൂടാതെ, അഞ്ചുവർഷം കേരള യൂനിവേഴ്​സിറ്റി യൂത്ത്​ ഫെസ്​റ്റിവലുകളിലും സമ്മാനം നേടി. എൻ.ജി.ഒ ആക്​ടിവിറ്റികളിലും സജീവമായി പ​ങ്കെടുത്തു.




സിവിൽ സർവിസ്​ സിലബസ്​ വലിയൊരു കടമ്പ തന്നെയാണ്​. ആർക്കും ഒരിക്കലും എല്ലാം പഠിച്ചുകഴിഞ്ഞുവെന്ന്​ പറഞ്ഞ്​ സിവിൽ സർവിസ്​ പരീക്ഷയെ നേരിടാൻ സാധിക്കില്ല. എനിക്ക്​ ഇതിന്​ കഴിയുമോ എന്ന ചോദ്യം സ്വാഭാവികമായി ഉയർന്നുവരും. അതിനെ മറികടക്കാൻ സാധിക്കണം. ഒരു പരിശീലനവും നേടാതെയായിരുന്നു പ്രിലിമിനറി പരീക്ഷ കടന്നത്​. രണ്ടര മാസത്തിനുള്ളിൽ മെയിൻ പരീക്ഷയുടെ സിലബസ്​ പഠിച്ചുതീർക്കണമായിരുന്നു. ഒരു ഒാട്ടപ്പാച്ചിലായിരുന്നു പിന്നെ. ഓപ്​ഷനൽ വിഷയത്തി​ൽപോലും കൂടുതൽ പഠിക്കാൻ സമയം കിട്ടിയില്ല. അതിനിടയിൽ ഗവേഷണത്തി​െൻറ സിനോപ്​സിസ്​ തയാറാക്കുന്ന തിരക്കും. ​സിവിൽ സർവിസ്​ മെയിൻ പരീക്ഷയുടെ സമയത്തുതന്നെയായിരുന്നു ഗവേഷണത്തി​െൻറ ഡോക്​ടറൽ കമ്മിറ്റിയും.

ബിരുദത്തിനുശേഷം സിവിൽ സർവിസ്​ കോച്ചിങ്ങിന്​ പോകണോ ​അതോ പി.ജിക്ക്​ പോകണോ എന്ന കൺഫ്യൂഷനുമുണ്ടായിരുന്നു. സിവിൽ സർവിസ്​ കോച്ചിങ്ങിന്​ പോയിട്ട്​ കിട്ടി​യില്ലെങ്കിൽ വലിയൊരു നഷ്​ടമാകില്ലേ എന്ന ചിന്തയിലാണ്​ പി.ജിക്ക്​ ചേർന്നതും. സിവിൽ സർവിസിലേക്ക്​ കടന്നുവരാൻ ആ​ഗ്രഹിക്കുന്നവരുടെ മുന്നിൽ അതൊരു വലിയ കൺഫ്യൂഷനാണ്​. ബിരുദത്തിനുശേഷം ബ്രേക്ക്​ എടുക്ക​​േണാ എന്ന ചോദ്യം എന്നോടും പലരും വിളിച്ചുചോദിക്കാറുണ്ട്​. ആ ചോദ്യത്തിന്​ ഉത്തരം സ്വയം കണ്ടെത്താൻ ശ്രമിക്കണം. ആത്മവിശ്വാസക്കുറവ്​ ചിലപ്പോഴുണ്ടാകും. അതിനെ ആത്മവിശ്വാസംകൊണ്ടുതന്നെ മറികടക്കണം.

സിവിൽ സർവിസിനായി പഠിക്കുന്ന സമയം ഒരിക്കലും വേസ്​റ്റ്​ ആകില്ല. ഈ പരീക്ഷ കിട്ടിയാലും ഇല്ലെങ്കിലു​ം അറിവ്​ വർധിക്കും. പുതിയ ഒരുപാട്​ കാര്യങ്ങ​െളക്കുറിച്ച്​ പഠിക്കാനാകും. മാത്രമല്ല, ഈ പരീക്ഷ കിട്ടിയില്ലെങ്കിലും മറ്റു പരീക്ഷകൾ വളരെ എളുപ്പത്തിൽ കീഴടക്കാനാകും.

ഇത്തവണ സിവിൽ സർവിസ്​ പരീക്ഷക്ക്​ തയാറെടുക്കു​േമ്പാൾ സീരിയസായിരുന്നില്ല. അടുത്ത തവണ എഴുതു​േമ്പാൾ നന്നായി പഠിച്ചെഴുതാം എന്നായിരുന്നു ചിന്ത. കിട്ടില്ല എന്ന ചിന്തയുള്ളതിനാൽ അധികം ആരുടെയും സഹായം തേ​ടേണ്ടന്നും മറ്റുമായിരുന്നു വിചാരം. ഓൺ​ൈലനായി കൂടുതൽ പഠിക്കാനായിരുന്നു അതിനാൽ​​ ശ്രമം. പ്രിലിമിനറി കിട്ടിയശേഷം മെയിൻ പരീക്ഷക്കു​ പോകുന്നതിനുമുമ്പ്​ ചിലരുടെ സഹായം തേടി. അഭിമുഖം മാത്രമായിരുന്നു കോച്ചിങ്​ ഇൻസ്​റ്റിറ്റ്യൂഷനുമായി ബന്ധപ്പെട്ട്​ ചെയ്​തത്​.

തിരുവനന്തപുരം വഴുതക്കാട്​ എൻ.സി.സി ഡയറക്​ടറേറ്റ്​ ഉദ്യോഗസ്​ഥനായ സുരേഷ്​ കുമാറി​െൻറയും കോട്ടൺഹിൽ ഹയർ സെക്കൻഡറി സ്​കൂൾ അധ്യാപിക ശോഭയുടെയും ഏകമകനാണ്​ ഗോകുൽ എസ്​. മാർ ഇവാനിയോസ്​ കോളജിൽനിന്ന്​ ഇംഗ്ലീസ്​ ബിരുദാനന്തര ബിരുദം നേടിയശേഷം കേരള സർവകലാശാല ഇംഗ്ലീഷ്​ വിഭാഗത്തിൽ ഗവേഷകപഠനം നടത്തുകയായിരുന്നു ഗോകുൽ.

പരിശ്രമിക്കാതെ സാധിക്കില്ല എന്ന്​​ പറയരുത്​

നമ്മുടെ പരിധി നാം തന്നെ നിശ്ചയിക്കരുത്​. ഒന്നിനും കൊള്ളില്ല, പറ്റില്ല എന്ന തോന്നലുകളൊക്കെ ആദ്യമേ ഒഴിവാക്കണം. മതിലി​െൻറ മുകളിൽനിന്ന്​ കളികണ്ട ശേഷമാണ്​ നമ്മൾ മിക്കപ്പോഴും അത്​ നമ്മളെക്കൊണ്ട്​ പറ്റിയപണിയല്ലെന്ന്​ പറയുന്നത്​. കളിക്കളത്തിലേക്ക്​ ഇറങ്ങി പരമാവധി ശക്തിയുമെടുത്ത്​ ശ്രമിച്ചാൽ മാത്രമേ കഴിയുമോ ഇ​ല്ലയോ എന്ന്​ അറിയാനാകൂ. കളിച്ചശേഷം കഴി​യില്ലെന്ന്​ തോന്നിയാൽ വിട്ടുകളയാം. തനിക്കുള്ളത്​ ആരെങ്കിലും കൈപ്പിടിയിൽ കൊണ്ടുവെച്ചുതരണമെന്ന്​ വിചാരിച്ചാൽ അത്​ നടക്കില്ല. കഠിനമായി പരിശ്രമിക്കേണ്ടിവരും.

എനിക്ക്​ കൃത്യമായ സമയം കണ്ടെത്തി പഠിക്കാനൊന്നും കഴിഞ്ഞിട്ടില്ല. സിലബസ്​ അനുസരിച്ച പാഠഭാഗങ്ങൾ മനസ്സിലാക്കിയശേഷം ചെറിയ ഭാഗങ്ങളായി തിരിച്ച്​ സമയം കിട്ടു​േമ്പാഴായിരുന്നു പഠനം. ചില ദിവസങ്ങൾ ഒന്നും പഠിക്കാൻ കഴിയാറില്ല.

പഠിച്ചുകൊണ്ടിരുന്ന​േപ്പാൾ സിവിൽ സർവിസ്​ എന്ന ആ​ഗ്രഹമൊന്നും ഉണ്ടായിരുന്നില്ല. വലിയ സ്വപ്​നങ്ങളും ഇല്ലായിരുന്നു. കഴിവുണ്ടെന്ന വിശ്വാസവും ഉണ്ടായിരുന്നില്ല. ഫയർഫോഴ്​സ്​ സർവിസിലേക്കും അപ്രതീക്ഷിതമായാണ്​ കടന്നുവന്നത്​. അവിടെ​െവച്ച്​ നടത്തിയ ഒരു പരീക്ഷയിൽ ഒന്നാം റാങ്ക്​ ലഭിച്ചു. അതിൽനി​ന്ന്​ എനിക്കെന്തെങ്കിലും ചെയ്യാൻ കഴിയുമെന്ന വിശ്വാസം തോന്നി. രണ്ടുമൂന്നുവർഷം അത്​ മനസ്സിൽ കിടന്നു. 2015​ൽ കുറച്ച്​ ചലഞ്ചിങ്​ ആയ ​എന്തെങ്കിലും ചെയ്യണ​െമന്ന ആഗ്രഹമുണ്ടായി. അങ്ങനെ സിവിൽ സർവിസ്​ തെരഞ്ഞെടുത്തു. എല്ലാവരും ഇംപോസിബിൾ ആണെന്ന്​ പറയുന്ന ഒരു കാര്യം ചെയ്​തുനോക്കുക എന്നതുമ​ാത്രം.




ഒരു മാർഗനി​ർദേശം കാണിച്ചുതരാൻ മുന്നിൽ ആരുമുണ്ടായിരുന്നില്ല. പല ജോലികളിലൂടെ വ്യത്യസ്​തമായ മേഖലകളിൽ ഒരുപാട്​ ജീവിതങ്ങളെ അടുത്തറിയാൻ സാധിച്ചു. പഠനത്തിലും എഴുത്തിലും അത്​ പോസിറ്റിവായി ഉപയോഗിക്കാൻ കഴിഞ്ഞുവെന്നാണ്​ വിശ്വാസം.

ആദ്യം തനിയെയായിരുന്നു പഠനം. പിന്നീട്​ ഇതിനായി ഇറങ്ങിത്തിരിച്ചപ്പോൾ ധാരാളം സുഹൃത്തുക്കളെ ലഭിച്ചു. ഉത്തരങ്ങൾ പറഞ്ഞുതരാൻ കഴിയുന്ന ഒരുപാടുപേർ എനിക്ക്​ ചുറ്റുമുണ്ടായിരുന്നു. അവരിൽ പലരും സർവിസിൽ ഇരിക്കുന്നവരും കോച്ചിങ്​ സെൻററുകളിലെ അധ്യാപകരും ഡയറക്​ടേഴ്​സുമെല്ലാമായിരുന്നു.

കൊല്ലം സെൻറ്​ ജൂഡ്​ സ്​കൂളിലായിരുന്നു പത്താം ക്ലാസ്​ വരെയുള്ള പഠനം. ​പ്ലസ്​ടു സെൻറ്​ ആൻറണീസ്​ സ്​കൂളിലും പിന്നീട്​ 2009ൽ ബംഗളൂരുവിൽനിന്ന്​ ഹോട്ടൽ മാനേജ്​മെൻറ്​ കോഴ്​സ്​ പൂർത്തിയാക്കി. ജോലിയിലും പഠനത്തി​ലുമെല്ലാം താങ്ങായി നിന്നത്​ കുടുംബമായിരുന്നു. ഭാര്യ സൂര്യ. ഏഴ​ുമാസം പ്രായമായ മകളുണ്ട്​. ഭാര്യ സൗദിയിൽ ജോലി ചെയ്യുന്നു. കുഞ്ഞും ഭാര്യയോടൊപ്പം. വീട്ടിൽ ഇപ്പോൾ അച്ഛനും അമ്മയുമുണ്ട്​. അവരും പഠനത്തിൽ ഒരുപാട്​ പിന്തുണച്ചു. എല്ലാവർക്കും സന്തോഷം.

Show Full Article
TAGS:Civil service 2020 success motivation winners 
Next Story