തീപിടിക്കുന്ന വെള്ളച്ചാട്ടം

കുന്നിൻചരിവുകളിൽനിന്ന്​ പാൽനുര ചുരത്തി താഴ്ന്നിറങ്ങുന്ന വെള്ളച്ചാട്ടങ്ങൾ കണ്ണിനു​ മാത്രമല്ല, മനസ്സിനും കുളിർമയേകും. പടിഞ്ഞാറൻ ന്യൂയോർക്കിലെ ചെസ്​റ്റ്​ നട്ട് റിഡ്ജ് പാർക്കിലുള്ള എറ്റേണൽ ഫ്ലെയിം എന്ന വെള്ളച്ചാട്ടം മനോഹര കാഴ്ചയോടൊപ്പം കൗതുകവും സമ്മാനിക്കുന്നുവെന്നതാണ്​ പ്രത്യേകത. പാൽനുരപോലെ പാറകളിൽ തട്ടിത്തടഞ്ഞ് താ​േഴക്കൊഴുകുന്ന വെള്ളച്ചാട്ടത്തിനിടയിൽ അണയാതെ നിൽക്കുന്ന തീജ്വാല. അതാണ്‌ ഇവിടത്തെ മുഖ്യ ആകർഷണം.

വെള്ളത്തിനിടയിലും ജ്വലിച്ചുനിൽക്കുന്ന തീനാളമുള്ളതിനാലാണ് ഇതിന്​ എറ്റേണൽ ഫ്ലെയിം എന്ന പേരു വന്നത്. സദാസമയവും എരിഞ്ഞുകൊണ്ടിരിക്കുന്ന തീനാളം കാണാൻ നിരവധി സഞ്ചാരികളാണ് ഇവിടേക്കെത്തുന്നത്.

അമേരിക്കയിലെ എറി കൗണ്ടിയിലെ എയ്റ്റീൻമൈൽ ക്രീക്കിനും വെസ്​റ്റ്​ ബ്രാഞ്ച് കാസെനോവിയ ക്രീക്കിനുമിടയിലായി സ്ഥിതി ചെയ്യുന്ന മലനിരകളുടെ വടക്കുഭാഗത്തായി 1213 ഏക്കറിലാണ് ചെസ്​റ്റ്​നട്ട് റിഡ്ജ് പാർക്ക് സ്ഥിതിചെയ്യുന്നത്.

കാൽനടയാത്രകൾക്കും സൈക്ലിങ്ങിനും അനുയോജ്യമായ ഈ പാർക്കി​െൻറ തെക്കേ അറ്റത്തുനിന്ന്​ വെള്ളച്ചാട്ടത്തിലേക്ക് നേരിട്ട് പ്രവേശിക്കാനാവും. വെള്ളച്ചാട്ടത്തിനരികിലെത്തുമ്പോൾ ചീഞ്ഞ മുട്ടയുടെ ഗന്ധം നിങ്ങൾക്കനുഭവപ്പെടും. ഇവിടെ നിന്നും പുറത്തേക്കു വരുന്ന പ്രകൃതിവാതകത്തി​െൻറ ഗന്ധമാണത്. വെള്ളച്ചാട്ടം സ്ഥിതി ചെയ്യുന്ന പാറ​െക്കട്ടിന് അടിയിലുള്ളത് ഷെയിൽ എന്ന മിശ്രിതമാണ്.

ഉയർന്ന താപനിലയുള്ള ഈ പാറക്കൂട്ടങ്ങൾക്കുള്ളിൽ കാർബൺ പദാർഥങ്ങൾ തുടർച്ചയായി വിഘടിപ്പിക്കപ്പെടുന്നു. ഈ കാർബൺ പദാർഥങ്ങളാണ് തീനാളത്തിനു കാരണമാകുന്ന പ്രകൃതിവാതകം സൃഷ്​ടിക്കുന്നതെന്നാണ് ചില ഗവേഷകരുടെ വാദം. എന്നാൽ, അവിടുത്തെ പാറക്കെട്ടിനുള്ളിൽ മീഥെയ്​ൻ വാതകമുണ്ടെന്നും അവയിൽനിന്ന്​ തീനാളമുണ്ടാകുന്നതിനാവശ്യമായ ഇന്ധനം ഉണ്ടാകുന്നുവെന്നുമാണ് മറ്റൊരു വിഭാഗം ഗവേഷകർ പറയുന്നത്. ഈ വിഷയത്തിൽ ഒരു ഔദ്യോഗിക സ്ഥിരീകരണത്തിലെത്താൻ ഇതുവരെ ആർക്കും കഴിഞ്ഞിട്ടില്ല. നിത്യമായ തീജ്വാല എന്നാണ് പേരെങ്കിലും ഇത് ഇടക്കിടെ അണഞ്ഞുപോവാറുണ്ട്.