പൊട്ടിത്തെറിക്കുന്ന അഗ്​നിപർവതത്തിന്​ മുകളിൽ ഡ്രോൺ പറത്തിയാൽ എങ്ങനെയുണ്ടാകും? അതിശയിപ്പിക്കുന്ന വിഡിയോ കാണാം

ഡ്രോൺ കാമറകൾ വന്നതോടെ വിഡിയോയുടെ അപാരസാധ്യതകളാണ്​ തുറന്നത്​. മനുഷ്യർക്ക്​ കടന്നെത്താൻ കഴിയാത്ത ഇടങ്ങളിൽനിന്ന്​ പോലും ഇത്തരം കാമറകൾ വിഡിയോകളും ചിത്രങ്ങളും ഒപ്പിയെടുക്കുന്നു. ഇത്തരത്തിലൊരു ഡ്രോൺ വിഡിയോ സമൂഹ മാധ്യമങ്ങളിൽ ഇപ്പോൾ വൈറലാവുകയാണ്​. ചിത്രീകരിച്ച സ്​ഥലവും സന്ദർഭവുമാണ്​ വിഡിയോയെ വ്യത്യസ്​തമാക്കുന്നത്​.

ഐസ്​ലാൻഡിലെ പൊട്ടിത്തെറിക്കുന്ന അഗ്നിപർവതത്തിന്‍റെ അവിശ്വസനീയമായ കാഴ്ചകളാണ്​ ഡ്രോൺ ഉപയോഗിച്ച്​ പകർത്തിയത്​. ഫാഗ്രഡൽ‌സ്ജാൽ അഗ്നിപർവ്വതം പൊട്ടിത്തെറിച്ച്​​ ലാവ പുറത്തേക്ക്​ വമിക്കുകയാണ്​​. വെള്ളിയാഴ്ച രാത്രിയാണ്​ ഐസ്‌ലാൻഡിന്‍റെ തലസ്ഥാനമായ റെയ്ജാവിക്കിന് സമീപമത്തെ അഗ്​നിപർവതം പൊട്ടിത്തെറിച്ചത്​.

ആഴ്ചകളായി ഈ പർവതം പുകഞ്ഞുകൊണ്ടിരിക്കുകയായിരുന്നു. അതേസമയം, പൊട്ടിത്തെറിയിൽ കാര്യമായ പരിക്കുകളോ നാശനഷ്​ടങ്ങളോ റിപ്പോർട്ട്​ ചെയ്​തിട്ടില്ല.

ഇതിന്‍റെ വിഡിയോ ഡ്രോൺ ഉപയോഗിച്ച്​ ജോർജൻ ​സ്​റ്റൈൻബെക്ക്​ ആണ്​ ചിത്രീകരിച്ചിരിക്കുന്നത്​. പർവതത്തിന്‍റെയും ലാവയുടെയ​ുമെല്ലാം ഏറെ അടുത്തേക്ക്​ വരെ കാമറ ചെന്നെത്തുന്നു. അതിശയിപ്പിക്കുന്ന ഈ വിഡിയോ ലക്ഷക്കണക്കിന്​ പേരാണ്​ കണ്ടത്​. നിരവധി പേർ ഇദ്ദേഹത്തെ അഭിനന്ദിച്ച്​ കമന്‍റിടുകയും ചെയ്​തു.

ഐസ്‌ലാൻഡിൽ 32 അഗ്നിപർവതങ്ങളുണ്ടെന്നാണ്​ കണക്ക്​. അഞ്ച് വർഷത്തിനിടെ ശരാശരി ഒരു അഗ്​നിപർവ​തമെങ്കിലും രാജ്യത്ത് പൊട്ടിത്തെറിക്കുന്നുണ്ട്​.