കാടി​െൻറ വന്യതയിലേക്ക്​ യാത്ര പോകാം; മുതുമല കടുവ സങ്കേതം വീണ്ടും തുറന്നു

ഗൂഡല്ലൂർ: കോവിഡ് കാരണം പത്ത്​ മാസമായി അടച്ചിട്ട തമിഴ്​നാട്ടിലെ മുതുമല കടുവ സങ്കേതം ശനിയാഴ്ച സഞ്ചാരികൾക്കായി വീണ്ടും തുറന്നു. രാവിലെ മുതൽ ടൂറിസ്​റ്റുകളുമായി വാഹന സഫാരി ആരംഭിച്ചു.

തെപ്പക്കാട് സ്വീകരണ കേന്ദ്രവും പരിസരവും ബസും അണുവിമുക്തമാക്കിയ ശേഷമാണ് പ്രവേശനം തുടങ്ങിയത്‌. സഞ്ചാരികളുടെ ശരീരോഷ്മാവ് പരിശോധിച്ച ശേഷം സാമൂഹിക അകലം പാലിച്ചാണ് സഫാരിക്കായി കൊണ്ടുപോവുന്നത്. സങ്കേതതത്തിലെ വളർത്താനകളെ കാണൽ, വൈകുന്നേരം നൽകുന്ന ആനയൂട്ട്​, വാഹനത്തിലെയും ആനപ്പുറത്തെയും സഫാരി എന്നിവയാണ്​ ഇവിടത്തെ പ്രധാന വിനോദങ്ങൾ.

തമിഴ്നാടി​െൻറ മറ്റു ഭാഗങ്ങളിൽനിന്ന്​ പുറമെ കേരളം, കർണാടക എന്നിവിടങ്ങളിൽനിന്നെല്ലാം ധാരാളം ​ടൂറിസ്റ്റുകളാണ്​ ഇവിടേക്ക്​ വരാറ്​​. ഉൗട്ടിയുടെ അടുത്തുള്ള പ്രദേശം എന്ന നിലക്കും മുതുമലക്ക്​​ ഏറെ പ്രാധാന്യമുണ്ട്​.

തമിഴ്നാട്ടിൽ ജനുവരി 14ന് പൊങ്കൽ ആഘോഷമാണ്. തൈ പൊങ്കൽ, മാട്ടുപൊങ്കൽ, കാണും പൊങ്കൽ എന്നീ ആഘോഷ ദിനങ്ങളാണ് കടന്നുവരുന്നത്. ഇതി​െൻറ ഭാഗമായി നാല്​ ദിവസത്തോളം അവധി ലഭിക്കുന്നതിനാൽ ചെന്നൈ, മധുര, തിരുനെൽവേലി, കോയമ്പത്തൂർ ഉൾപ്പെടെയുള്ള ഭാഗങ്ങളിൽനിന്ന് സ്പെഷൽ ബസുകൾ ഉൗട്ടിയിലേക്ക്​ സർവിസ് നടത്തുന്നുണ്ട്. ബസിലും സ്വന്തം വാഹനത്തിലുമടക്കം ഊട്ടി കാണാൻ വരുന്നവർ മുതുമലയിലെത്തി കാടി​െൻറ വന്യത ആസ്വദിച്ചാണ്​ മടങ്ങാറ്​​.

വരയൻ കടുവ, പുള്ളിപ്പുലി, ആന, കാട്ടുപോത്ത്, കരടി, വിവിധതരം മാനുകൾ, മയിൽ, അപൂർവയിനം പക്ഷികൾ, വാനരന്മാർ, പന്നി ഇവയെല്ലാം സഞ്ചാരികൾക്കായി വിരുന്നൊരുക്കി ഇൗ കാട്ടിൽ കാത്തിരിപ്പുണ്ട്​. അതേസമയം, വാഹന സഫാരിക്കിടെ മൃഗ സാന്നിധ്യമുണ്ടാവുമെന്ന് ഉറപ്പ് നൽകാൻ കഴിയില്ലന്ന് യാത്രക്ക് മുന്നേ അധികൃതർ മുന്നറിപ്പ് നൽകുന്നു.

നിലവിൽ ബസ്​ സഫാരിക്ക്​ ഒരാളിൽനിന്ന്​ 350ഉം ആന സഫാരിക്ക്​ ഒരാളിൽനിന്ന്​ 1200 രൂപയുമാണ്​ ഇൗടാക്കുന്നത്​. ആന സഫാരി ഉടൻ തന്നെ ആരംഭിക്കും. ഇതിനായുള്ള താപ്പാനക​ളെ ഒരുക്കാൻ തുടങ്ങിയിട്ടുണ്ട്​. ഉൗട്ടിക്ക്​ പുറമെ സമീപത്തെ മസിനഗുഡി, ഗൂഡല്ലൂർ എന്നിവിടങ്ങളിലും താമസ സൗകര്യം ലഭ്യമാണ്​.