സഞ്ചാരികൾ വർധിച്ചു; ലാഹുൽ - സ്​പിതിയിലേക്ക്​ ​പ്രവേശിക്കാൻ നികുതി നൽകണം

ഹിമാചൽ പ്രദേശിലെ ഏറ്റവും മനോഹരമായ സ്​ഥലങ്ങൾ നിലകൊള്ളുന്ന ഭാഗങ്ങളിലൊന്നാണ്​​ ലാഹുൽ-സ്​പ്​തി ജില്ല. ശൈത്യകാലത്ത്​ വഴികൾ അടയുന്നതിനാൽ ഈ പ്രദേശങ്ങളിലേക്ക്​ ആറ്​ മാസത്തോളം യാത്ര സാധ്യമായിരുന്നില്ല. എന്നാൽ, മണാലിക്ക്​ സമീപത്തെ റോഹ്​ത്താങ്ങിൽ അടൽ തുരങ്കം തുറന്നതോടെ 365 ദിവസവും യാത്ര സാധ്യമായി. ഇതോടെ ഇവിടേക്ക്​ സഞ്ചാരികളും പ്രവഹിക്കുകയാണ്​.

സഞ്ചാരികളുടെ അനിയന്ത്രിത വരവ്​ തടയാനും കൂടുതൽ അടിസ്​ഥാന സൗകര്യങ്ങൾ വികസിപ്പിക്കാനുമായി വാഹനങ്ങളിൽനിന്ന്​ നികുതി പിരിക്കാൻ തീരുമാനിച്ചിരിക്കുകയാണ്​ അധികൃതർ. അടൽ ടണൽ കടന്നെത്തുന്ന സിസ്സുവിൽ വെച്ചാണ്​ നികുതി പിരിക്കുക.

മേഖലയിലേക്ക് പ്രവേശിക്കുന്ന ഇരുചക്ര വാഹനങ്ങൾ 50 രൂപ നൽകണം. കാറിൽ യാത്ര ചെയ്യുന്നവർ 200 രൂപയാണ്​ നൽകേണ്ടത്​. എസ്‌.യു.വികൾക്കും എം‌.യു.വികൾക്കും 300 മുതൽ 500 രൂപ വരെയാണ് നികുതി. ബസ്​ പോലുള്ള വലിയ വാഹനങ്ങൾക്കും 500 രൂപയാണ്​ നികുതി.

അതേസമയം, മേഖലയിൽ സ്ഥിരമായി ഓടുന്ന വാഹനങ്ങളെ നികുതിയിൽനിന്ന് ഒഴിവാക്കും. അത്തരക്കാർ നികുതി ഇളവിനായി അപേക്ഷിക്കണം.

മണാലിയിൽനിന്ന്​ ലഡാക്കിലേക്കും സ്​പിതി വാലിയിലേക്കുമെല്ലാം അടൽ ടണൽ വഴിയാണ്​ പോകേണ്ടത്​. യാത്രക്കാരിൽനിന്ന്​ ശേഖരിക്കുന്ന തുക മേഖലയുടെ വികസനത്തിന് ഉപയോഗിക്കാനാണ്​ തീരുമാനം.