നേപ്പാളിൽനിന്ന്​ ലോകത്തിനൊരു മാതൃക; എവറസ്റ്റിൽനിന്ന്​ ശേഖരിച്ച മാലിന്യം കലാരൂപങ്ങളായി മാറുന്നു

മിക്ക നാടുകളിലെയും ടൂറിസ്റ്റ്​ കേന്ദ്രങ്ങളിലെ പ്രധാന പ്രശ്​നം മാലിന്യ കൂമ്പാരങ്ങളാണ്​. സഞ്ചാരികൾ കൂടുന്നതിനനുസരിച്ച്​ ഇവയുടെ അളവും കൂടിവരുന്നു. ഇവ എങ്ങനെ സംസ്​കരിക്കണമെന്ന്​ അറിയാതെ കുഴങ്ങുകയാണ്​ പലരും. എന്നാൽ, ഇതിൽനിന്ന്​ വ്യത്യസ്​തമാവുകയാണ്​ നേപ്പാൾ. ​മാലിന്യ നിർമാർജ്ജനത്തിൽ ലോകത്തിന്​ തന്നെ മാതൃക കാണിച്ചുനൽകാനുള്ള തയാറെടുപ്പിലാണ്​ ​അവർ​.

ഇതിന്‍റെ ഭാഗമായി എവറസ്റ്റ് കൊടുമുടിയിൽ നിന്ന് ശേഖരിച്ച ടൺകണക്ക്​ മാലിന്യം കലാസൃഷ്ടികളാക്കാനുള്ള പദ്ധതി രാജ്യം പ്രഖ്യാപിച്ചു. ഇവ ഒരു ഗാലറിയിൽ പ്രദർശിപ്പിക്കും. ഒപ്പം എവറസ്റ്റ്​ മാലിന്യകൊട്ടയായി മാറുന്നതിൽനിന്ന് രക്ഷിക്കേണ്ടതിന്‍റെ ആവശ്യകതയെക്കുറിച്ച് ലോകത്തെ ബോധവത്കരിക്കും.

അടുത്തിടെ നേപ്പാൾ ഒരു സംഘത്തെ നിയോഗിച്ച്​ പർവതത്തിൽനിന്ന് മാലിന്യങ്ങൾ ശേഖരിച്ചിരുന്നു. കീറിയ ടെന്‍റുകൾ, പ്ലാസ്റ്റിക് - ഓക്സിജൻ കുപ്പികൾ, ഗോവണികൾ, ക്യാനുകൾ എന്നിവയെല്ലാമായിരുന്നു ഇതിലുണ്ടായിരുന്നത്​. പർ‌വതാരോഹകരും ട്രെക്കിങ്​ സംഘങ്ങളും ഉപേക്ഷിച്ച മാലിന്യങ്ങളായിരുന്നു ഇവ. എവറസ്റ്റിന്‍റെ​ അറ്റമായ 8848.86 മീറ്റർ ഉയരത്തിൽനിന്ന് വരെ മാലിന്യം ശേഖരിച്ചു.

ഈ മാലിന്യങ്ങളിൽനിന്ന് കലാസൃഷ്ടികൾ ഒരുക്കുന്നതിൽ നിരവധി പ്രാദേശിക, വിദേശ കലാകാരന്മാർ പങ്കാളികളാകുമെന്ന് ആർട്ട് പ്രോജക്ട് ഡയറക്ടർ ടോമി ഗുസ്താഫ്‌സൺ പറഞ്ഞു. 'ഈ മാലിന്യങ്ങളെ സമ്പത്തായി മാറ്റുകയാണ്​ ലക്ഷ്യം. ഖരമാലിന്യങ്ങളെ വിലയേറിയ കലാസൃഷ്​ടികളാക്കി മാറ്റുന്നതെങ്ങനെയെന്ന് ഞങ്ങൾ കാണിച്ചുതരാൻ ആഗ്രഹിക്കുന്നു. ഇതോടൊപ്പം തൊഴിൽ, വരുമാനം എന്നിവ സൃഷ്​ടിക്കാനാകും.

മാലിന്യത്തെക്കുറിച്ചുള്ള ജനങ്ങളുടെ ധാരണയും അത്​ കൈകാര്യം ചെയ്യുന്നതിലെ രീതികളും മാറുമെന്ന്​ ഞങ്ങൾ പ്രതീക്ഷിക്കുന്നു. 3780 മീറ്റർ ഉയരത്തിലുള്ള എവറസ്റ്റ് ബേസ് ക്യാമ്പിലേക്കുള്ള പ്രധാന പാതയായ സിയാങ്‌ബോച്ചെയിലാണ് കേന്ദ്രം സജ്ജീകരിക്കുന്നത്. ഉൽപ്പന്നങ്ങൾ സുവനീറുകളായി വിൽക്കുകയും ഈ പണം പരിസ്​തിഥി സംരക്ഷണ ആവശ്യങ്ങൾക്കായി ഉപയോഗിക്കുകയും ചെയ്യും' -ടോമി ഗുസ്താഫ്‌സൺ പറഞ്ഞു.