രാജ്യത്ത്​ ഏകീകൃത യാത്രാ മാനദണ്ഡങ്ങൾ വരുന്നു; സംസ്​ഥാനങ്ങൾക്ക്​ നിർദേശം നൽകും

രാജ്യത്ത്​ കോവിഡിന്‍റെ പശ്ചാത്തലത്തിൽ പല സംസ്​ഥാനങ്ങളും വ്യത്യസ്​ത രീതിയിലുള്ള നിബന്ധനകളാണ്​ യാത്രക്കാർക്കായി പുറപ്പെടുവിച്ചിട്ടുള്ളത്​. ചില സംസ്​ഥാനങ്ങൾ വാക്​സിൻ എടുത്താൽ തന്നെ പ്രവേശനം അനുവദിക്കും. എന്നാൽ, ചിലയിടങ്ങളിൽ ഇതിന്​ പുറമെ ആർ.ടി.പി.സി.ആർ ഫലവും നിർബന്ധമാണ്​. ദക്ഷിണേഷ്യൻ സംസ്​ഥാനങ്ങളിലാണ്​ ഇത്തരം നിബന്ധനകൾ അധികമുള്ളത്​.

വ്യത്യസ്​ത സംസ്​ഥാനങ്ങളിൽ വിവിധ രീതിയിലുള്ള മാനദണ്ഡങ്ങളുള്ളത്​ യാത്രക്കാരെയും വലക്കുന്നുണ്ട്​. പലപ്പോഴും ഇതിൽ മാറ്റം വരികയും ചെയ്യുന്നു. ഇതിന്​ അറുതിവരുത്താൻ നടപടി സ്വീകരിക്കുമെന്ന്​ കേ​ന്ദ്ര ടൂറിസം അഡീഷണൽ ഡയറക്​ടർ റുപീന്ദർ ബ്രാർ അറിയിച്ചു. ഫെഡറേഷൻ ഓഫ്​ ഇന്ത്യ ചേ​േമ്പഴ്​സ്​ ഓഫ്​ കൊമേഴ്​സ്​ ആൻഡ്​ ഇൻഡസ്​സ്​ട്രി സംഘടിപ്പിച്ച ഇ-കോൺക്ലേവിൽ സംസാരിക്കുകയായിരുന്നു അദ്ദേഹം. രാജ്യത്ത്​ ഏകീകൃത യാത്രാ മാർഗ്ഗനിർദ്ദേശങ്ങൾ ഉടൻ ഉണ്ടാകും. ഇത്​ ആളുകൾക്ക്​ കൂടുതൽ വ്യക്​തത നൽകുമെന്നും അദ്ദേഹം പറഞ്ഞു.

ആഭ്യന്തര യാത്രകൾ എല്ലാ സംസ്​ഥാനങ്ങളിലും സന്തുലിതമാകണമെന്ന ആവശ്യം ഉയർന്നിട്ടുണ്ട്​. ഇതിനായുള്ള നടപടിക്രമങ്ങൾ പുരോഗമിക്കുകയാണെന്നും ഇത്​ സംബന്ധിച്ച്​ സംസ്​ഥാനങ്ങൾക്ക്​ ഉടൻ നിർദേശം നൽകുമെന്നും ഡയറക്ടർ ജനറൽ കൂട്ടിച്ചേർത്തു.

അന്താരാഷ്ട്ര യാത്രകൾ വീണ്ടും ആരംഭിക്കാൻ ആരോഗ്യ മന്ത്രാലയവുമായി ചർച്ച തുടരുകയാണ്​. ആഭ്യന്തര യാത്രക്കാർക്കായി പരമ്പരാഗത ടൂറിസ്റ്റ്​ കേന്ദ്രങ്ങളോടൊപ്പം പുതിയ ലക്ഷ്യസ്​ഥാനങ്ങളും തയാറാക്കുന്നുണ്ട്​. ന്യൂജെൻ സഞ്ചാരികളെ ഇത്തരം കേന്ദ്രങ്ങളിലേക്ക്​ ആകർഷിക്കാൻ വിമാനത്താവളങ്ങളിൽ കാമ്പയിനുകൾ നടത്തുമെന്നും അദ്ദേഹം പറഞ്ഞു.