ഊട്ടിയിലെ പർവത ട്രെയിനിന്‍റെ കിതപ്പ് ഇനി​ മാറും; രണ്ട്​ നീരാവി എൻജിനും പുതിയ ബോഗികളും വരുന്നു

ഗൂഡല്ലൂർ: ലോക പ്രസിദ്ധമായ നീലഗിരി മൗ​ണ്ടെയ്​ൻ ​െട്രയിനിന് രണ്ട്​ നീരാവി എൻജിനും പുതിയ ബോഗികളും വരുന്നു. ഊട്ടിയിലേക്ക്​ മേട്ടുപാളയത്തുനിന്ന് ഒരു സർവിസും കുന്നൂരിൽനിന്ന് മൂന്ന്​ ലോക്കൽ സർവിസുമാണ്​ നിലവിലുള്ളത്​. സീസൺ കാലങ്ങളിലെ തിരക്ക് കണക്കിലെടുത്ത് ബോഗികളുടെ എണ്ണം വർധിപ്പിക്കണമെന്ന ആവശ്യം ടൂറിസ്​റ്റുകളടക്കം ഉന്നയിച്ചിരുന്നു. ഇത് പരിഗണിച്ച് ചെന്നൈ പെരുമ്പൂരിൽ 28 ബോഗികൾ നിർമാണത്തിലിരിക്കുന്നതായി ദക്ഷിണ ​െറയിൽ ചീഫ് സൂപ്രണ്ടിംഗ് എൻജിനീയർ വെങ്കിട്ട സുബ്രഹ്​മണി കുന്നൂരിൽ പറഞ്ഞു.

പർവത ​െട്രയിനിെൻറ നാല്​ സർവിസുകൾ കണക്കിലെടുത്ത്് രണ്ട്​ നീരാവി എൻജിൻകൂടി എത്തുമെന്നും അദ്ദേഹം വ്യക്തമാക്കി. തിരുച്ചി പൊൻമലയിൽ നീരാവി എൻജിന്‍റെ പണികൾ പൂർത്തിയായി വരികയാണ്​. കാലപ്പഴക്കമുള്ള നീരാവി എൻജിൻ ഉപയോഗിച്ചുള്ള ഓട്ടത്തിനിടെ ഇടക്ക് വലിവ് മുട്ടി പകുതി വഴിക്ക് ​െട്രയിൻ നിൽക്കുന്നതും കിതക്കുന്നതും പതിവാണ്. പുതിയ എൻജിൻ വരുന്നതോടെ ഇതിന്​ പരിഹാരമാകും. കൂടാതെ ബോഗികൾ കൂടുന്നതോടെ ടിക്കറ്റ്​ ലഭിക്കാത്തെ പ്രശ്​നം​ ഒരുപരിധി വരെ മാറിക്കിട്ടും.

112 വർഷങ്ങൾ പഴക്കമുള്ള നീലഗിരി പർവത റെയിൽവേയുടെ ​തീവണ്ടി കഴിഞ്ഞയാഴ്ചയാണ്​ സർവിസ്​ പുനരാരംഭിച്ചത്​. ആദ്യ നാളുകളിൽ തന്നെ മുഴുവൻ സീറ്റുകളും നിറഞ്ഞിരുന്നു. തമിഴ്​നാട്​ സർക്കാർ ഇ-പാസിൽ വരുത്തിയ ഇളവുകളെ തുടർന്ന്​ നിരവധി പേരാണ്​ ഊട്ടിയുടെ മനോഹാരിത ആസ്വദിക്കാൻ എത്തുന്നത്​. കൂടുതൽ സഞ്ചാരികൾ വരാൻ തുടങ്ങിയതോടെ ട്രെയിൻ സർവിസും പുനരാരംഭിക്കുകയായിരുന്നു.

ഏഷ്യയിലെ ഏറ്റവും പുരാതനവും ദൈർഘ്യമേറിയതുമായ മീറ്റർ ഗേജുകളിലൊന്നാണ്​​ നീലഗിരിയിലേത്​. മനോഹരമായ താഴ്‌വരകളിലൂടെയും മലനിരകളിലൂടെയുമണ്​ ഇത് കടന്നുപോകുന്നത്​.

യുനസ്കോയുടെ ലോക പൈതൃക പട്ടികയിൽ ഉൾപ്പെട്ടതിനാൽ പൈതൃക തീവണ്ടി എന്നും ഇത്​ അറിയപ്പെടുന്നു. മണിക്കൂറിൽ ശരാശരി 10.4 കിലോമീറ്റർ വേഗതയിലാണ്​ ഇതിന്‍റെ സഞ്ചാരം. സമുദ്ര നിരപ്പിൽനിന്ന് 330 മീറ്റർ ഉയരത്തിലുള്ള മേട്ടുപ്പാളയത്തുനിന്ന് 46 കിലോമീറ്റർ അകലെ സമുദ്രനിരപ്പിൽനിന്ന് 2200 മീറ്റർ ഉയരത്തിലുള്ള ഊട്ടിയിലേക്കാണ് ട്രെയിൻ സഞ്ചരിക്കുന്നത്.