ഇന്ത്യൻ സഞ്ചാരികളുടെ വരവ് കൂടി; വിസ ഓൺ അറൈവൽ സൗകര്യം പുനരാരംഭിച്ച് ശ്രീലങ്ക

സഞ്ചാരികളുടെ പ്രിയപ്പെട്ട നാടാണ് ശ്രീലങ്ക. ഇന്ത്യയിൽനിന്ന് ചെലവ് കുറച്ചുപോകാൻ കഴിയുന്ന ഡെസ്റ്റിനേഷനുകളിൽ ഒന്നാണ് ഈ ദ്വീപ് രാജ്യം. കോവിഡ് കാരണം ഏറെനാൾ രാജ്യം അടച്ചിട്ടിരിക്കുകയായിരുന്നു. ഈയിടെയാണ് വീണ്ടും വിദേശികൾക്ക് പ്രവേശനം അനുവദിച്ച് തുടങ്ങിയത്.

രാജ്യത്തേക്ക് വരുന്ന അന്താരാഷ്ട്ര യാത്രക്കാർക്ക് വിസ ഓൺ അറൈവൽ സൗകര്യം പുനരാരംഭിക്കുമെന്ന് ​ശ്രീലങ്കൻ അധികൃതർ അറിയിച്ചു. ഓൺ-അറൈവൽ ഇലക്ട്രോണിക് ട്രാവൽ ഓതറൈസേഷൻ (ഇ.ടി.എ) സൗകര്യം ഇന്ത്യൻ വിനോദസഞ്ചാരികൾക്കും മറ്റ് രാജ്യങ്ങളിൽനിന്ന് വരുന്നവർക്കും ലഭ്യമാകും. അതേസമയം പാകിസ്താൻ, അഫ്ഗാനിസ്താൻ, നൈജീരിയ, സിറിയ, ഐവറി കോസ്റ്റ്, ഘാന, മ്യാൻമർ, കാമറൂൺ, ഉത്തര കൊറിയ, നേപ്പാൾ തുടങ്ങിയ രാജ്യങ്ങളിലെ പാസ്‌പോർട്ട് ഉടമകൾക്ക് ഈ സൗകര്യം ലഭ്യമാകില്ല.

ഓൺലൈൻ വഴിയും ഇ.ടി.എ എടുക്കാം. സഞ്ചാരികൾ ശ്രീലങ്കയിൽ വരുന്നതിന് മുമ്പ് തന്നെ ഇ.ടി.എ കരസ്ഥമാക്കുന്നതാണ് ഉചിത​മെന്നും അധികൃതർ അറിയിച്ചു.

കോവിഡിന് ശേഷം ശ്രീലങ്കയിലേക്ക് കൂടുതലും വരുന്നത് ഇന്ത്യക്കാരാണെന്ന് റിപ്പോർട്ടുകൾ സൂചിപ്പിക്കുന്നു. വിമാന ടിക്കറ്റിലെ ആകർഷകമായ ഓഫറുകളും ക്വാറന്റൈൻ രഹിത താമസവും ഇന്ത്യയിൽ നിന്നുള്ള വിനോദസഞ്ചാരികളെ ഇവിടേക്ക് ആകർഷിക്കുന്നുണ്ട്.

​ശ്രീലങ്കയിൽ എത്തുന്ന എല്ലാ സഞ്ചാരികൾക്കും സാധുതയുള്ള യാത്രാ ഇൻഷുറൻസ് പോളിസി ഉണ്ടായിരിക്കണം. ഇൻഷുറൻസ് പരിരക്ഷ https://portal.pionline.lk/covidinsurance/ എന്ന ലിങ്ക് വഴി ലഭിക്കും. കോവിഡ് ചികിത്സയ്ക്കുള്ള പരിരക്ഷ ഉൾപ്പെടെ കുറഞ്ഞത് 50,000 യു.എസ് ഡോളറിന്റെ കവറേജ് ലഭിക്കും. 12 ഡോളറാണ് നിരക്ക്. വിമാനത്തിൽ കയറുന്നതിന് മുമ്പ് ഇൻഷുറൻസ് പരിരക്ഷ ആവശ്യമില്ലെങ്കിലും, ശ്രീലങ്കയിൽ എത്തിയശേഷം ഇത് നിർബന്ധമാണ്.