ബ്രഹ്‌മപുത്രക്ക്​ കുറുകെ രാജ്യത്തെ നീളമേറിയ റോപ്​വേ; 1.82 കിലോമീറ്റർ താണ്ടാൻ എട്ടു മിനിറ്റ്​ മതി

ഗുവാഹത്തി: ഇന്ത്യയിലെ ഏറ്റവും വലിയ റോപ് വേ ഗുവാഹത്തിയില്‍ ഉദ്​ഘാടനം ചെയ്​തു. അസം ആരോഗ്യ-വിദ്യാഭ്യാസ മന്ത്രി ഹിമാന്ദ ബിശ്വാസ് ശര്‍മയും റോപ്​വേ നിർമിച്ച ഗുവാഹത്തി ഡെവലപ്​മെൻറ്​ ഡിപ്പാർട്ട്​മെൻറ്​​ മന്ത്രി സിദ്ധാര്‍ത്ഥ ഭട്ടാചാര്യയും ചേര്‍ന്നാണ് ഉദ്ഘാടനം നിര്‍വഹിച്ചത്. ബ്രഹ്‌മപുത്ര നദിക്കു കുറുകെയാണ് റോപ് വേ നിര്‍മിച്ചിട്ടുള്ളത്. ഇന്ത്യയിലെ ഏറ്റവും നീളം കൂടിയ റോപ് വേയാണ്​ ഗുവാഹത്തിയിലേതെന്നും നീളം 1.82 കിലോമീറ്ററോളം വരുമെന്നും ഗുവാഹത്തി ഡെവലപ്‌മെൻറ്​ ഡിപാര്‍ട്ട്‌മെൻറ്​ സി.ഇ.ഒ ഉമാനന്ദ ഡോളെ പറഞ്ഞു.

ബ്രഹ്‌മപുത്രയുടെ വടക്ക്-തെക്ക് കരകളെ തമ്മില്‍ ബന്ധിപ്പിക്കുന്ന റോപ് വേയിലൂടെ ഒരു കരയില്‍ നിന്ന് മറ്റേ കരയിലെത്താൻ എട്ട്​ മിനിറ്റ്​ മതി. ഇരുകരകളിൽ നിന്നുമുള്ള യാത്രാ സമയം കുറക്കാനാണ്​ പ്രധാനമായും റോപ്​ വേകൊണ്ട്​ ലക്ഷ്യമിടുന്നത്​. നിലവിൽ ബോട്ടുകളും ഫെറികളും ഉപയോഗിച്ചുള്ളതും റോഡ്​ മാർഗവുമുള്ള യാത്രാസമയം ഒരു മണിക്കൂറോളമാണ്​ എടുക്കുന്നത്​.

സ്വിസ് സാങ്കേതികവിദ്യ ഉപയോഗിച്ചാണ് നിര്‍മിച്ചത്. കാബിനുകള്‍ ഇറക്കുമതി ചെയ്​തതും സ്വിറ്റ്​സർലാൻഡിൽ നിന്നാണ്. ഒരേസമയം 30 പേരെ വഹിക്കാൻ കഴിയുന്ന കാബിന്​ മണിക്കൂറിൽ 250 പേരെ മറുകരയിലെത്തിക്കാൻ സാധിക്കും. ഇന്ത്യയെ സംബന്ധിച്ചിടത്തോളം ഇതൊരു നേട്ടമാണ്​. ഒരു പ്രധാന നദീ തീരത്തിന്​ കുറുകെ റോപ്​ വേ ടവറുകൾ നിർമിക്കുന്നതും​ ഇതാദ്യമാണ്​. ഒരു കരയിൽ നിന്ന്​ മറുകരയിലെത്താൻ 60 രൂപയും ഇരുകരകളിലേക്കുള്ള യാത്രക്ക്​ 100 രൂപയുമാണ്​ ഇൗടാക്കുക.

A DREAM FULFILLMENT : Nation's Longest River Ropeway on Brahmaputra Opened Today for Public in Guwahati pic.twitter.com/8GNhysEvQH

— I Love Siliguri (@ILoveSiliguri) August 24, 2020