ആഗസ്റ്റ്​ 13 മുതൽ ഹിമാചൽ സന്ദർശിക്കാൻ ഇൗ രേഖകൾ കൈയ്യിൽ കരുതണം

ഷിംല: ആഗസ്റ്റ്​ 13 മുതൽ ഹിമാചൽ പ്രദേശിലേക്ക്​ രണ്ടുഡോസ്​ വാക്​സിൻ വാക്​സിൻ സ്വീകരിച്ചവർക്കും കോവിഡ്​ നെഗറ്റീവ്​ സർട്ടിഫിക്കറ്റുള്ളവർക്കും മാത്രം പ്രവേശനം. ചൊവ്വാഴ്ച അർധരാത്രി പുറ​െപടുവിച്ച ഉത്തരവിലാണ്​ ചീഫ്​ സെക്രട്ടറി റാം സുഹാഗ്​ സിങ്​ ഇക്കാര്യം വ്യക്തമാക്കിയത്​.

ഹിമാചൽ പ്രദേശ്​ സന്ദർശിക്കാൻ താൽപര്യപ്പെടുന്നയാളുകൾ 72 മണിക്കൂറിനുള്ളിൽ നടത്തിയ ആർ.ടി.പി.സി.ആർ പരിശോധനയുടെ നെഗറ്റീവ് സർട്ടിഫിക്കറ്റ്, രണ്ട്​ ഡോസ്​ വാക്​സിൻ സ്വീകരിച്ച സർട്ടിഫിക്കറ്റ്​, 72 മണിക്കൂറിനുള്ളിൽ നടത്തിയ ആർ.എ.ടി പരിശോധനയുടെ നെഗറ്റീവ് സർട്ടിഫിക്കറ്റ് എന്നിവയിൽ ഏതെങ്കിലും കരുതണമെന്നാണ്​ ഉത്തരവ്​. സംസ്​ഥാനത്ത്​ രോഗികളുടെ എണ്ണവും ടെസ്റ്റ്​ പോസിറ്റീവിറ്റി നിരക്കും ഉയർന്ന സാഹചര്യത്തിലാണ്​ കാബിനറ്റ്​ യോഗത്തിൽ തീരുമാനമാനമെടുത്തത്​​.

നവരാത്രി ആഘോഷ സമയത്ത്​ ആഗസ്റ്റ്​ ഒമ്പത്​ മുതൽ 17 വരെ സംസ്​ഥാനത്തെ ക്ഷേത്രങ്ങൾ സന്ദർശിക്കാൻ വാകിസിനേഷൻ സർട്ടിഫിക്കറ്റും കോവിഡ്​ നെഗറ്റീവ്​ സർട്ടിഫിക്കറ്റും നിർബന്ധമാക്കിയിരുന്നു. ഇതോടൊപ്പം തന്നെ റസിഡൻഷ്യൽ സ്​കൂളുകൾ അല്ലാത്ത വിദ്യാലയങ്ങൾ ആഗസ്റ്റ്​ 11 മുതൽ 22 വരെ അടച്ചിടാനും തീരുമാനമായിരുന്നു.