വീണ്ടും വിദേശ സഞ്ചാരികളെത്തുന്നു; ഒന്നര വർഷത്തിനുശേഷം ടൂറിസ്റ്റ്​ വിസ അനുവദിക്കാനൊരുങ്ങി ഇന്ത്യ

ന്യൂഡൽഹി: രാജ്യത്തെ പ്രതിദിന കോവിഡ് കേസുകൾ കുറയുന്ന സാഹചര്യത്തിൽ ടൂറിസ്റ്റ്​ വിസ വീണ്ടും അനുവദിക്കാനൊരുങ്ങി കേന്ദ്ര സർക്കാർ. സമ്പദ്‌വ്യവസ്ഥയെ കരകയറ്റുന്നതിന്‍റെ ഭാഗമായാണ്​ നടപടിയെന്ന്​ ആഭ്യന്തര മന്ത്രാലയത്തിലെ ഉദ്യോഗസ്ഥൻ സ്ഥിരീകരിച്ചു.

രണ്ട്​ ഡോസ്​ വാക്​സിനെടുത്തവർക്കായിരിക്കും ആദ്യ ഘട്ടത്തിൽ വിസ​ അനുവദിക്കുക. ഘട്ടം ഘട്ടമായിട്ടാണ്​ ​പ്രക്രിയകൾ ആരംഭിക്കുന്നത്​.

രാജ്യത്തെ കോവിഡ് സാഹചര്യം മെച്ചപ്പെട്ടതോടെ വിസ നിയമങ്ങളിൽ ചില ഇളവുകൾ സർക്കാർ പ്രഖ്യാപിച്ചിട്ടുണ്ട്​. എന്നാൽ, ടൂറിസ്റ്റ് വിസ നൽകുന്നത് പുനരാരംഭിച്ചിരുന്നില്ല.

സമ്പദ്‌വ്യവസ്ഥയെ ഉത്തേജിപ്പിക്കാനുള്ള ഒരു വഴിയായിട്ടാണ്​ വിദേശ ടൂറിസ്റ്റുകളെ തിരികെ കൊണ്ടുവരാനുള്ള നീക്കം. ഇതുമായി ബന്ധപ്പെട്ട നടപടികൾ ആരംഭിച്ചിട്ടുണ്ടെന്നും ആഭ്യന്തര സെക്രട്ടറിയുടെ അധ്യക്ഷതയിൽ ആഭ്യന്തര മന്ത്രാലയം യോഗം ചേരുമെന്നും വകുപ്പ്​ ഉ​ദ്യോഗസ്​ഥൻ അറിയിച്ചു.

രാജ്യത്ത്​ ആദ്യമായി ലോക്​ഡൗൺ പ്രഖ്യാപിച്ചതിന്​ പിന്നാലെ 2020 മാർച്ചിലാണ്​ ടൂറിസ്റ്റ്​ വിസ അനുവദിക്കുന്നത്​ നിർത്തിയത്​. പിന്നീട്​ തൊഴിൽ, ബിസിനസ്​ വിസകൾ അനുവദിച്ച്​ തുടങ്ങിയിരുന്നു. കോവിഡിന്​ മുമ്പ്​ ​പ്രതിമാസം ഏകദേശം 7-8 ലക്ഷം വിനോദസഞ്ചാരികൾ രാജ്യത്ത്​ എത്താറുണ്ടായിരുന്നു.

കോവിഡ്​ നിയന്ത്രണവിധേയമായതോടെ പല രാജ്യങ്ങളും ഇപ്പോൾ ടൂറിസ്റ്റ്​ വിസ നൽകാൻ തുടങ്ങിയിട്ടുണ്ട്​. ഇന്ത്യ വിദേശ സഞ്ചാരികളെ അനുവദിച്ചാലും എത്ര പേർ വരുമെന്ന്​ സന്നദ്ധമാവുമെന്ന കാര്യത്തിൽ സംശയമുണ്ട്​. പല രാജ്യങ്ങളും ഇപ്പോഴും ഇന്ത്യയിലേക്ക്​ യാത്ര ചെയ്യുന്നതിൽ കർശന നിയ​ന്ത്രണം ഏർപ്പെടുത്തിയിട്ടുണ്ട്​.