ഗോവയിൽ പോകുന്നവരുടെ ശ്രദ്ധക്ക്​; മാസ്ക്കി​ല്ലാതെ പുറത്തിറങ്ങിയാൽ നിങ്ങളെ 'പടമാക്കും'

പനാജി: ഗോവയി​ൽ മാസ്ക്കി​ല്ലാതെ പുറത്തിറങ്ങി നടക്കുന്നവർക്ക്​ മുട്ടൻ പണിയുമായി അധികൃതർ. ഇത്തരക്കാരുടെ ഫോ​ട്ടോയെടുത്ത്​ പിഴ ഈടാക്കാനാണ്​ തീരുമാനം. നിരവധി സഞ്ചാരികൾ മാസ്​ക്കിലാ​െത പുറത്തിറങ്ങുകയും ഇത്​ ചോദ്യം ചെയ്യുന്ന അധികൃതരോട്​ തട്ടിക്കയറുന്നതായും പരാതിയുണ്ട്​. ഇതിൻെറ അടിസ്​ഥാനത്തിലാണ്​ പുതിയ നടപടി. പൊലീസാണ്​ ഇത്തരക്കാരുടെ ചിത്രങ്ങളെടുത്ത്​ പിഴ ഈടാക്കുക.

പനാജി മുനിസിപ്പൽ കോർപ്പറേഷൻ ഉദ്യോഗസ്ഥർ വിനോദസഞ്ചാരികളോട്​ മാസ്ക് ധരിക്കാൻ ആവശ്യപ്പെടുമ്പോൾ ഇവർ അധിക്ഷേപിക്കുന്നത്​ പതിവാണ്​. ഇത്തരക്കാരെ അനുസരണ പഠിപ്പിക്കാൻ ഇനി ഉദ്യോഗസ്​ഥരോടൊപ്പം പൊലീസുമുണ്ടാകും.

'ആളുകൾ ഗോവ സന്ദർശിക്കണം. പക്ഷെ, അവർ സംസ്ഥാനത്തെ ജനങ്ങളുടെ ആരോഗ്യത്തെ വിലകറുച്ച്​ കാണരുത്. കോവിഡിൽനിന്ന്​ എല്ലാവരെയും സുരക്ഷിതമായി സംരക്ഷിക്കുക എന്നതാണ് മാസ്ക് ധരിക്കുന്നതിൻെറ ലക്ഷ്യം' -പനാജി മേയർ ഉദയ്​ മാദ്​കയ്​കർ പറഞ്ഞു.

മാസ്​ക്​ ധരിക്കാത്തവർക്കുള്ള പിഴ​ 200 രൂപയായി വർധിപ്പിച്ചത് കഴിഞ്ഞ ആഴ്​ചയാണ്​​. ലോക്​ഡൗൺ പിൻവലിച്ചതോടെ ധാരാളം സഞ്ചാരികൾ ഇവിടേക്ക്​​ വരുന്നുണ്ട്​. ഇതിനാൽ തന്നെ ബീച്ചുകളിലടക്കം ജനങ്ങളെ അധികൃതർക്ക്​ നിയന്ത്രിക്കാനാവുന്നില്ല.

നേരത്തെ മയക്കുമരുന്നുകൾ ഉപയോഗിക്കുന്നതിലും വഴിയരികിൽ ഭക്ഷണം പാകം ചെയ്യുന്നതിലും കർശന നിയ​ന്ത്രണം ഏർപ്പെടുത്തി സർക്കാർ ഉത്തരവിറക്കിയിരുന്നു. പുതിയ വിനോദ സഞ്ചാര നയത്തിൻെറ ഭാഗമായിട്ടായിരുന്നു തീരുമാനം. ഗോവയുടെ പ്രകൃതിഭംഗി സംരക്ഷിക്കാനാണ്​ പുതിയ വിനോദസഞ്ചാര നയത്തിൽ ഊന്നൽ നൽകുന്നത്​.

ഗോവയിലെത്തുന്ന ബജറ്റ്​ യാത്രികരിൽ ഒരു വിഭാഗം വഴിയോരത്തിരുന്ന്​ ഭക്ഷണം പാകം ചെയ്യുന്നത്​ പതിവാണ്​. ഈ പ്രവണതയെ എതിർത്തും അനുകൂലിച്ചും ഗോവയിലെ നിയമസഭ അംഗങ്ങൾ രംഗത്തെത്തിയിരുന്നു.