14 രാജ്യങ്ങളിൽ നിന്നുള്ള വിനോദസഞ്ചാരികൾക്ക്​ പ്രവേശനം അനുവദിച്ച്​ യൂറോപ്യൻ യൂണിയൻ

ബ്രസൽസ്​: അമേരിക്കയുൾപ്പടെ 14 രാജ്യങ്ങളിൽ നിന്നുള്ള വിനോദസഞ്ചാരികൾക്ക്​ പ്രവേശനം അനുവദിച്ച്​ യൂറോപ്യൻ യൂണിയൻ. ഒരു വർഷത്തിന്​ ശേഷമാണ്​ യൂറോപ്യൻ യൂണിയൻ വിനോദസഞ്ചാരികൾക്കുള്ള വിസ നൽകുന്നത്​ പുനഃരാരംഭിക്കുന്നത്​. യു.എസ്​, അൽബേനിയ, ആസ്​ട്രേലിയ, ഇസ്രായേൽ, ജപ്പാൻ, ലെബനൻ, ന്യൂസിലാൻഡ്​, റിപബ്ലിക്​ ഓഫ്​ നോർത്ത്​ മാസിഡോണിയ, റുവാണ്ട, സിംഗപ്പൂർ, സെർബിയ, ദക്ഷിണകൊറിയ, തായ്​ലാൻഡ്​, ചൈന തുടങ്ങിയ രാജ്യങ്ങളിലെ സഞ്ചാരികൾക്കാണ്​ വിസ അനുവദിക്കുക.

വിവിധ രാജ്യങ്ങളിലെ കോവിഡ്​ സാഹചര്യം പരിഗണിച്ചാണ്​ ഇക്കാര്യത്തിൽ തീരുമാനമെടുത്തിരിക്കുന്നതെന്ന്​ ഇ.യു അറിയിച്ചു. നിയന്ത്രണങ്ങൾ നീക്കിയെങ്കിലും യൂറോപ്പിലെത്തുന്ന സഞ്ചാരികൾ കോവിഡ്​ പ്രോ​ട്ടോകോൾ കർശനമായി പാലിക്കണമെന്നും നിർദേശിച്ചിട്ടുണ്ട്​. ഇതിനൊപ്പം 72 മണിക്കൂർ മുമ്പുള്ള ആർ.ടി.പി.സി.ആർ പരിശോധന ഫലവും വേണം. അംഗരാജ്യങ്ങൾക്ക്​ വേണമെങ്കിൽ ഇവർക്ക്​ 14 ദിവസത്തെ ക്വാറൻറീൻ നിർദേശിക്കാമെന്നും ഇ.യു വ്യക്​തമാക്കിയിട്ടുണ്ട്​.

കഴിഞ്ഞ വർഷം ജൂണിൽ നടന്ന യൂറോപ്യൻ യൂണിയൻ യോഗത്തിൽ ഘട്ടം ഘട്ടമായി ഇളവുകൾ അനുവദിക്കാമെന്ന്​ തീരുമാനമെടുത്തിരുന്നു. ഇതി​െൻറ ഭാഗമായാണ്​ ഇപ്പോൾ ഇളവുകൾ അനുവദിച്ചിരിക്കുന്നത്​. പൂർണമായും യൂറോപ്യൻ യൂണിയൻ നിർദേശം അംഗരാജ്യങ്ങൾ അംഗീകരിക്കുകയല്ല വേണ്ടതെന്ന്​ സംഘടന വ്യക്​തമാക്കി. അതാത്​ രാജ്യങ്ങളിലെ സാഹചര്യങ്ങൾക്കനുസരിച്ച്​ തീരുമാനമെടുക്കണമെന്ന്​ ഇ.യു നിർദേശിച്ചു.