കരിപ്പൂരിൽനിന്ന്​ സിംഗപ്പൂരിലേക്ക് എയർ ഇന്ത്യ​ പുതിയ സർവിസ്​ തുടങ്ങി

കരിപ്പൂർ: കോഴിക്കോട്​ വിമാനത്താവളത്തിൽനിന്ന്​ എയർ ഇന്ത്യ എക്​സ്​പ്രസ്​ തിരുച്ചിറപ്പള്ളി വഴി സിംഗപ്പൂരിലേക്ക്​ സർവിസ്​ ആരംഭിച്ചു. നവംബർ മാസത്തെ ഷെഡ്യൂളിലാണ്​ സർവിസ്​ ഉൾപ്പെട്ടിരിക്കുന്നത്​.

വ്യാഴാഴ്​ചയായിരുന്നു കരിപ്പൂരിൽ നിന്നുള്ള ആദ്യ സർവിസ്​. കോഴിക്കോട്-ട്രിച്ചി-സിംഗപ്പൂർ സർവിസ്​ വ്യാഴാഴ്​ചകളിലാണ്​. വൈകീട്ട്​ 7.15ന്​ കരിപ്പൂരിൽനിന്ന്​ പുറപ്പെടുന്ന വിമാനം അടുത്ത ദിവസം പുലർച്ച നാലിന്​ സിംഗപ്പൂരിലെത്തും.

സിംഗപ്പൂർ-ട്രിച്ചി-കോഴിക്കോട്​ സർവിസ്​ വെള്ളിയാഴ്​ചകളിലാണ്​. പുലർച്ച അഞ്ചിന്​ അവിടെ നിന്ന്​ പുറപ്പെടുന്ന വിമാനം 8.15ന്​ തിരിച്ച്​ കരിപ്പൂരിലെത്തും. കരിപ്പൂരിൽനിന്ന്​ സിംഗപ്പൂരിലേക്ക്​ നേരിട്ടുള്ള സർവിസ്​ ആരംഭിക്കണമെന്നത്​ ദീർഘനാളായുള്ള ആവശ്യമാണ്​.