​ക്ഷേത്രത്തിലെത്തുന്നവരെ തലയിൽ കാൽവെച്ച്​​ അനുഗ്രഹമേകി നായ; വിഡിയോ വൈറലാകുന്നു

മഹാരാഷ്​ട്രയിലെ ഗണേശ ക്ഷേത്രത്തിൽ ഭക്തരെ അനുഗ്രഹിക്കുന്ന നായയുടെ വിഡിയോ വൈറലാകുന്നു. സിദ്ധാടെക്കിലുള്ള സിദ്ധിവിനായക് ക്ഷേത്രം സന്ദർശിക്കുന്നവരെയാണ്​ നായ തലയിൽ കാലുകൊണ്ട്​ അനുഗ്രഹിക്കുന്നത്​. നായ ഭക്തരുടെ കൈകൾ കുലുക്കുന്നതും അവരെ അനുഗ്രഹിക്കുന്നതും വിഡിയോയിൽ കാണാം.

മഹാരാഷ്​ട്രയിലെ അഹമ്മദ്‌നഗർ ജില്ലയിലെ ഒരു കുന്നിൻ മുകളിലാണ് സിദ്ധിവിനായക് ക്ഷേത്രം സ്ഥിതി ചെയ്യുന്നത്. സിദ്ധാടെക് ഗ്രാമത്തിൽനിന്ന് ഒരു കിലോമീറ്റർ ദൂരമുണ്ട്​ ഇവിടേക്ക്​. ക്ഷേത്രത്തിലെ ഗണപതി വിഗ്രഹത്തിൽ തുമ്പിക്കൈയുടെ സ്​ഥാനം ഇടത് വശത്തിന് പകരം വലതുഭാഗം ചേർന്നാണ്​. ഇത് അപൂർവ കാഴ്ചയാണ്.

വിഷ്​ണുവാണ്​ ഈ ക്ഷേത്രം നിർമിച്ചതെന്ന്​ ഐതിഹ്യമുണ്ട്​. കാലക്രമേണ തകർന്ന ക്ഷേത്രം പുനർനിർമിക്കുകയായിരുന്നു. ഇ​ന്ദോറിലെ രാജ്ഞി അഹല്യാബായ് ഹോൾക്കറാണ് ഇപ്പോഴത്തെ രീതിയിൽ ക്ഷേത്രം നിർമിച്ചത്​. അതേസമയം, കർണാടക ചന്നപട്ടണയിലെ അഗ്രഹാര വലഗരഹള്ളി ഗ്രാമത്തിൽ നായയെ ആരാധിക്കാനായി ക്ഷേത്രം തന്നെയുണ്ട്​.