കാടുണ്ട്​, കാറുകളില്ല, മനംതുറന്ന്​ ശ്വസിക്കാം; ഈ സ്​മാർട്ട്​ സിറ്റിയിൽ സ്​ഥിരതാമസത്തിന്​ കൊതിക്കാത്തവരുണ്ടോ...

നഗരവത്​കരണം മിക്കപ്പോഴും പലനാടുകൾക്കും തീരാശാപമായി മാറുകയാണ്​ പതിവ്​. ഇന്ത്യയിലടക്കം അതിന്‍റെ ദുരന്തം ജനങ്ങളെ തേടിയെത്താറുണ്ട്​. എന്നാൽ, ഇതിനെല്ലാം എന്നും മാതൃകയാണ്​ സിംഗപ്പൂരെന്ന കൊച്ചുരാജ്യം. നഗരങ്ങൾക്കുള്ളിൽ ജീവവായുവേകി നിരവധി പച്ചത്തുരുത്തുകളാണ്​ ഇവിടെയുള്ളത്​.

നഗരത്തിന്​ നടുവിൽ പ്രകൃതിയോടിണങ്ങിയ ഇക്കോ സ്മാർട്ട് സിറ്റിയുടെ നിർമാണത്തിലാണ്​​ സിംഗപ്പൂർ. ഫോറസ്റ്റ്​ സിറ്റി എന്നറിയപ്പെടുന്ന ഈ പുതിയ സ്ഥലം പ്രകൃതിയുടെ യഥാർത്ഥ സങ്കേതമായിരിക്കും. ജനങ്ങളുടെ ആരോഗ്യവും ക്ഷേമവും മെച്ചപ്പെടുത്തുക, നല്ലൊരു ഭാവിക്ക് വഴിയൊരുക്കുക എന്നിവയാണ് ഇതുകൊണ്ട്​ അധികൃതർ ലക്ഷ്യമിടുന്നത്​.

പശ്ചിമ മേഖലയിലെ തെംഗയിലാണ് നഗരം ഒരുക്കുന്നത്​. 42,000 അപ്പാർട്ട്​മെന്‍റുകളുള്ള അഞ്ച് റെസിഡൻഷ്യൽ ഭാഗങ്ങളാണ്​ ഇവിടെ ഉണ്ടാവുക. പാർക്ക്, ഗാർഡൻ, ഫോറസ്റ്റ് ഹിൽ, പ്ലാ​േന്‍റഷൻ, ബ്രിക്ക് ലാൻഡ് എന്നിവയും ഇതിൽ ഉൾപ്പെടും. 100 മീറ്റർ വീതിയും അഞ്ച്​ കിലോമീറ്റർ നീളവും വരുന്ന മരങ്ങളുടെ ഇടനാഴിയും ഇവിടത്തെ പ്രത്യേകതയാണ്​. നഗരത്തിലെ കാർബൺ പ്രസരണം കുറക്കാൻ ഇത്​ ഏറെ സഹായിക്കും.

Also read: സിങ്കപ്പൂരിലെ ഇൗ കാനനവഴികൾ നിങ്ങളെ വിസ്​മയിപ്പിക്കും

നിലവിൽ ഈ പ്രദേശം സൈനിക കേന്ദ്രമായാണ്​ ഉപയോഗിക്കുന്നത്​. ഇതിന്​ ചുറ്റും ഇഷ്ടിക നിർമാണ ഫാക്ടറികളുമുണ്ട്​. സ്മാർട്ട് സിറ്റി വരുന്നതോടെ ഇതെല്ലാം ഒഴിവാകും. കാറുകൾക്ക്​ ഇവിടേക്ക്​ പ്രവേശനമുണ്ടാകില്ല. കാൽനടയാത്രക്കാർക്കും സൈക്ലിംഗിനും സുരക്ഷിത മേഖലകളുണ്ടാകും.

അതേസമയം, ഇവിടത്തെ താമസക്കാർ‌ക്ക് പട്ടണത്തിലേക്ക് പോകാൻ ബസുകളിൽ‌ യാത്ര ചെയ്യാൻ‌ കഴിയും. കൂടാതെ ജലഗതാഗത സംവിധാനവുമുണ്ടാകും. 2022 അവസാനത്തോടെ സ്​മാർട്ട്​ സിറ്റി​ യാഥാർഥ്യമാകുമെന്നാണ്​ പ്രതീക്ഷിക്കുന്നത്​.