Top
Begin typing your search above and press return to search.
keyboard_arrow_down
Login
exit_to_app
exit_to_app
kufri
cancel
camera_alt

കുഫ്രി മഞ്ഞുകാലത്ത്​ (image courtesy: tourmyindia)

Homechevron_rightTravelchevron_rightDestinationschevron_rightകു​ഫ്രിയിൽ ബംഗീ...

കു​ഫ്രിയിൽ ബംഗീ ജംപിങിനായി തിരക്കുകൂട്ടിയ വനിതകൾ

text_fields
bookmark_border

റൂമിലെ ബാൽക്കണയിൽനിന്നുള്ള കാഴ്​ചകളെല്ലാം ഏറെ സുന്ദരം.​ ഷിംലയെന്ന മഹാനഗരം പുലർകാലമഞ്ഞിൽ കുളിച്ചുനിൽപ്പാണ്​. നഗരം മലകളിൽനിന്ന് ഇറങ്ങിവരികയാണെന്ന്​ തോന്നും. ബഹുവർണ നിറങ്ങളിലെ കെട്ടിടങ്ങൾ തട്ടുതട്ടായി നിലകൊള്ളുന്നു. കൂർത്ത മേൽക്കൂരയുള്ള കൊച്ചുവീടുകൾ വൈദ്യുത വെളിച്ചത്തിൽ തിളങ്ങുന്നുണ്ട്​. അതിനിടയിൽ ഉയർന്നുനിൽക്കുന്ന മരങ്ങളെ കോടമഞ്ഞ്​ തഴുകി ഒഴുകുന്നു. മരങ്ങളിൽനിന്ന്​ മരങ്ങളിലേക്ക്​ കുരങ്ങൻമാർ തുള്ളിച്ചാടുന്നു. ജീവിതത്തിലെ മറ്റൊരു മനോഹരമായ പ്രഭാതം.

സർക്കാർ ജോലി ലഭിച്ചതി​െൻറ സന്തോഷം പങ്കുവെക്കാൻ പ്രിയതമ​െൻറ കൂടെ വിമാനം കയറിയെത്തിയതാണ്​ ഹിമാചലി​െൻറ മണ്ണിൽ. ഇൗ ബാൽക്കണയിലിരിക്കു​​േമ്പാൾ ആ സന്തോഷം ഇരട്ടിയാകുന്നു.

ഷിംല നഗരം മലകളിൽനിന്ന് ഇറങ്ങിവരികയാണെന്ന്​ തോന്നും

വർഷങ്ങൾ നീണ്ട പരിശ്രമത്തി​െൻറ ഫലമായാണ്​ സർക്കാർ ജോലിയെന്ന സ്വപ്​നം നേടിയെടുക്കുന്നത്​.​ കേരളത്തി​ന​കത്തെ ഒരുപാട്​ സ്ഥലങ്ങളിലേക്ക് നിരവധി യാത്രകൾ ഞങ്ങൾ നടത്തിയിട്ടുണ്ട്. അതിലധികവും ബുള്ളറ്റ്​ റൈഡുകൾ ആയിരുന്നു. അതിൽനിന്നെല്ലാം വ്യത്യസ്തമായി ഒരു ലോങ്​ ട്രിപ്പ്​ തന്നെ വേണമെന്നുണ്ടായിരുന്നു. ഓണാവധിക്ക്​ പോകാമെന്ന്​ ഉറപ്പിച്ചു. ഭർത്താവി​െൻറ സുഹൃത്തായ ഷബ്‌നു ഭായിയുടെ സഹായത്താൽ പ്ലാനിങ്​ തകൃതിയായി.

ഭൂമിയിലെ സ്വർഗമായ കശ്​മീരിലേക്കായിരുന്നു ആദ്യം തീരുമാനിച്ചത്​. യാത്രയുടെ ഒന്നര മാസം മു​േമ്പ വിമാന ടിക്കറ്റുകൾ ബുക്ക് ചെയ്തു. ടിക്കറ്റ് നിരക്ക് കുറവായതിനാൽ ബംഗളൂരുവിൽനിന്നാണ്​ വിമാനം. എന്നാൽ, ആർട്ടിക്കിൾ 370മായി ബന്ധപ്പെട്ട പ്രശ്​നങ്ങൾ കാരണം കശ്​മീർ മോഹം ഹിമാചൽ പ്രദേശിലേക്ക്​ പറിച്ചുനടേണ്ടി വന്നു. കൊണ്ടുപോകാനുള്ള വസ്ത്രങ്ങളും അത്യാവശ്യ സാധനങ്ങളും തണുപ്പിനെ പ്രതിരോധിക്കാനുള്ള ജാക്കറ്റുകളും ഇതിനിടയിൽ പാക്ക് ചെയ്​തുവെച്ചിരുന്നു. അങ്ങനെ കാത്തിരുന്ന ദിവസ​െമത്തി.

ചുവന്ന നിറത്തിലെ കല്ലുകളിൽ അറബി ലിഖിതങ്ങൾ കൊണ്ട് അലങ്കരിച്ച മനോഹര നിർമിതിയാണ്​ കുത്തബ്​ മിനാർ

ഡൽഹിയിലെ ഒാട്ടപ്രദക്ഷിണം

കോഴിക്കോട്ടുനിന്ന്​ നമ്മുടെ സ്വന്തം ആനവണ്ടിയിൽ ബംഗളൂരുവിലെത്തി​. അവിടെനിന്ന്​ പറന്നുയർന്ന്​ ഉച്ചയോടെ ഡൽഹിയിൽ. രാത്രിയാണ്​ ഷിംലയിലേക്കുള്ള ബസ്​. അതുവരെ ഇ​​ന്ദ്രപ്രസ്​ഥത്തിൽ ഒാട്ടപ്രദക്ഷിണമാകാമെന്ന്​ കരുതി. കുത്തബ്​മിനാറാണ്​ ആദ്യലക്ഷ്യം. ലോക്കർ സൗകര്യം ലഭ്യമാകാഞ്ഞതിനാൽ വലിയ ബാഗുകളും തോളിൽ തൂക്കിയാണ് യാത്ര. കുത്തബ്​മിനാറിലേക്ക്​ പ്രവേശിക്കാൻ നീണ്ട ക്യൂവുണ്ട്​. അൽപ്പനേരത്തെ കാത്തിരിപ്പിനുശേഷം, ഉയരത്തിന് പര്യായമായ വിസ്​മയ നിർമിതിക്കകത്തേക്ക്​ പ്രവേശിച്ചു. ചുവന്ന നിറത്തിലെ കല്ലുകളിൽ അറബി ലിഖിതങ്ങൾ കൊണ്ട് അലങ്കരിച്ച 73 മീറ്റർ ഉയരമുള്ള മനോഹര നിർമിതി.

തൊട്ടടുത്ത്​ തന്നെ 1600 വർഷം പഴക്കമുള്ള ഇരുമ്പ് തൂണുണ്ട്​. ഇതുവരെ തുരുമ്പ് പിടിക്കാത്ത ലോഹക്കൂട്ട് അത്​​ഭുതം തന്നെ. അഞ്ച്​ നിലകളാണ് കുത്തബ്മിനാറിന്​. ഓരോ നിലക്കും ബാൽക്കണിയുണ്ട്. കുത്തബുദ്ദീൻ ഐബക് ആണ് ഇതി​െൻറ നിർമാണം തുടങ്ങിവച്ചത്. അദ്ദേഹത്തിനുശേഷം ഇൽത്തുമിഷ് പൂർത്തീകരിച്ചു.

രാഷ്​ട്രപതി ഭവൻ

ഇതിന്​ ചുറ്റുമായി ഒരുപാട് നിർമിതികൾ വേറെയുമുണ്ട്. എല്ലായിടവും അറബി ലിഖിതങ്ങൾ കൊണ്ട് കൊത്തിയെടുത്ത്​ മനോഹരം. കുത്തബ്മിനാറിന്​ വലതുഭാഗത്തായി 27 മീറ്റർ ഉയരമുള്ള മറ്റൊരു നിർമിതി കാണാം​. അലാവുദ്ദീൻ ഖിൽജി നിർമാണം തുടങ്ങിയ അലൈ മിനാറാണിത്​. പക്ഷെ അത് പൂർത്തിയാക്കാൻ കഴിഞ്ഞില്ല. അവിടെനിന്ന്​ പുറത്തിറങ്ങി നീംബു പാനി കുടിച്ചു. ചാട്ട് മസാലയും ഗോലിസോഡയും ചെറുനാരങ്ങയും ചേർത്ത അടിപൊളി പാനീയം. ഡൽഹിയിലെ ഉഷ്​ണത്തിൽ തളർന്ന ഞങ്ങൾക്കത്​​ നല്ല ഉന്മേഷമേകി. അടുത്തത്​ പാർലമെൻറാണ്​ കാണാനുള്ളത്​. അതീവസുരക്ഷ മേഖലയായ ഭാഗങ്ങളിലൂടെ ബാഗുകളും ചുമന്ന്​ നടന്നു. ദൂരെനിന്ന്​ മാത്രമേ രാജ്യത്തി​െൻറ നിയമനിർമാണ സഭയെ കാണാൻ സാധിച്ചുള്ളൂ. പാർലമെൻറ്​ ഗേറ്റിന്​ മുന്നിലെ സുരക്ഷ ജീവനക്കാർ ഞങ്ങളെ തിരച്ചയച്ചു.

അവിടെനിന്ന് നടന്നെത്തിയത്​ രാഷ്​ട്രപതി ഭവന്​ മുന്നിൽ​. ബാഗുകൾ സി.ഐ.എസ്.എഫ് ഉദ്യേഗസ്​ഥർ തുറന്ന് പരിശോധിച്ചു. ഷിംലയിലേക്കുള്ള യാത്രക്കിടയിൽ ഇവിടെ ഇറങ്ങിയതാ​ണെന്നും ബാഗിനകത്ത്​ മുഴുവൻ വസ്​ത്രങ്ങളാണെന്നും പറഞ്ഞു. കാര്യം ബോധ്യമായതോടെ ഞങ്ങളെ വിട്ടയച്ചു. നല്ല സൗമ്യമായ പെരുമാറ്റമായിരുന്നു അവരുടേത്.

രാഷ്​ട്രപതി ഭവനിൽനിന്നുള്ള റോഡ് അവസാനിക്കുന്നത് ഇന്ത്യ ഗേറ്റിലാണ്

തുടർന്ന്​ ഇന്ത്യാ ഗേറ്റിലേക്ക് പോകാൻ ഓട്ടോയിൽ കയറി. 250 മീറ്റർ സഞ്ചരിച്ചപ്പോഴേക്കും ഒരു പരിസ്ഥിതി സംഘടനയുടെ പ്രകടനം കാരണം റോഡ്​ നിശ്ചലമായി. വീണ്ടും നടത്തം തുടങ്ങി. രാഷ്​ട്രപതി ഭവനിൽനിന്നുള്ള റോഡ് അവസാനിക്കുന്നത് ഇന്ത്യ ഗേറ്റിലാണ്. ഒന്നാം ലോക മഹായുദ്ധത്തിലും മറ്റുമായി രാജ്യത്തിന്​ വേണ്ടി വീരമൃത്യു വരിച്ച 70,000ത്തോളം പട്ടാളക്കാരുടെ പേരുകൾ ഇവിടെ കൊത്തിവെച്ചിട്ടുണ്ട്. അവർക്ക്​ ആദരമർപ്പിച്ച്​ അമർ ജവാൻ ജ്യോതി ഒരിക്കലും കെടാതെ ജ്വലിച്ചുനിൽക്കുന്നു. അതിന്​ അടുത്ത് ചെന്നാൽ തന്നെ നമ്മുടെ മനസ്സ്​ അറിയാതെ രാജ്യസ്നേഹത്താൽ നിറഞ്ഞുതുളുമ്പും.

ബസ്​ കയറി ഷിംലയിലേക്ക്​

ഡൽഹി മെട്രോയിൽ കയറി ആശ്രാം സ്​റ്റേഷനിലേക്ക് പോയി. സ്​റ്റേഷന്​ പുറത്തുള്ള 26ാം നമ്പർ തൂണിന്​ അടുത്ത്​​ ഷിംലയിലേക്ക്​ പോകാനുള്ള ബസ് വന്നുനിൽപ്പുണ്ട്​. തോളിൽനിന്ന്​ ഭാണ്ഡക്കെട്ടുകൾ ഇറക്കിവെച്ചു. രാത്രിയിലേക്കുള്ള പുതപ്പും കുപ്പിവെള്ളവും അവർ നൽകി. ഇനി 360 കിലോമീറ്റർ ദൂരം ഈ ബസിൽ തന്നെ.

ഷിംല നഗരം

അതിരാവിലെ ഫോൺവിളി കേട്ടാണ്​ ഉണരുന്നത്​. ഇനിയുള്ള ദിവസങ്ങളിൽ ഞങ്ങൾക്ക് പോകാനുള്ള കാറി​െൻറ ഡ്രൈവർ പിങ്കുഭായ്​ ആണ്​ മറുതലക്കൽ. ഷിംലയിൽ ബസ് നിർത്തുന്ന സ്ഥലത്ത് തന്നെയുണ്ടാകുമെന്ന്​ പറഞ്ഞു. ഹിമാലയത്തിലെ മനോഹരമായ വഴികളിലൂടെ ബസ് മുന്നോട്ടുനീങ്ങുകയാണ്​.

പുലർകാല കാഴ്ചകളിലേക്ക്​ ഞങ്ങൾ കണ്ണെറിഞ്ഞു. പച്ചപ്പട്ടുടുത്ത മലനിരകൾ. മഞ്ഞിൻതുള്ളികൾ നറുമുത്തുകളായി പൊഴിയുന്നു. ഷിംലയിലെത്തു​േമ്പാൾ വെളിച്ചം പരന്നിട്ടുണ്ട്​. കോടമഞ്ഞ്​ വന്ന്​ പൊതിഞ്ഞതോടെ ജാക്കറ്റെടുത്ത്​ അണിഞ്ഞു. ബുക്ക്​ ചെയ്​ത ഹോട്ടലിലേക്കാണ്​ ആദ്യം പോയത്​. കിടിലൻ റൂമാണ്​ ഞങ്ങൾക്കായി ഒരുക്കിവെച്ചിരുന്നത്​.

ഹിമാലയത്തിലെ മനോഹരമായ വഴികളിലൂടെയായിരുന്നു യാത്ര

ഒന്ന് ഫ്രഷായി കുറച്ചുനേരം കിടന്നുറങ്ങി. ഉച്ചക്ക് ഹോട്ടലിൽനിന്ന്​ ഭക്ഷണം കഴിച്ചശേഷം ഷിംലയെന്ന നഗരം കാണാനിറങ്ങി. മലമുകളിൽ പറിച്ചുനട്ട പോലെയൊരു നഗരം. ഹിമാചൽ പ്രദേശി​െൻറ തലസ്ഥാനം കൂടിയാണ് ഷിംല. 1864ൽ ബ്രിട്ടീഷ് ഭരണകാലത്ത് വേനൽക്കാല തലസ്ഥാനമായിരുന്നിത്​.

മാൾ റോഡിലേക്കാണ്​ ആദ്യമെത്തിയത്​. ബ്രിട്ടീഷുകാരുടെ കാലത്ത്​ ഒരുക്കിയ ഷോപ്പിങ്​ കേന്ദ്രങ്ങളാണ്​ ഇവിടെയുള്ളത്​. കിലോമീറ്ററുകൾ നീളുന്ന റോഡിലൂടെ തേരാപാര നടന്നു. ഇതിനിടയിൽ വ്യത്യസ്തമായ ഭക്ഷണങ്ങൾ രുചിച്ചുനോക്കാനും മറന്നില്ല. ഇവിടെനിന്നാണ്​ ജീവിതത്തിൽ ആദ്യമായി മോമോസ് കഴിക്കുന്നത്​. ആവിയിൽ വേവിച്ചെടുക്കുന്ന ഈ വിഭവം നല്ല രുചികരമായിരുന്നു. ടിബറ്റ്​ ജനതയുടെ പ്രധാന ആഹാരമാണിത്​.

മാൾ റോഡിലെ കച്ചവട സ്​ഥാപനങ്ങൾ

ചുമടേറ്റും ജനത

മാൾ റോഡിലൂടെ ചുമട് ഏറ്റിപ്പോകുന്ന ആളുകൾ മറ്റൊരു കാഴ്​ചയായിരുന്നു. തലയിൽനിന്ന്​ ഒരു കയർ പുറത്തേക്ക് തൂക്കിയിട്ട് അതിൽ എത്രയോ ഭാരം ഏറ്റി പോകുന്ന ആളുകൾ. മാൾ റോഡിലൂടെ വാഹനഗതാഗതം ഇല്ല. മുകളിലെ റിഡ്​ജ്​ റോഡിലേക്ക്​ വാഹനങ്ങൾ കടന്നുവരാൻ സൗകര്യമുണ്ട്. ഇവിടത്തെ അമ്പലത്തിലേക്കുള്ള പൂജക്ക് ആവശ്യമായ നോട്ട് മാല പല കടകളിലും കാണാൻ സാധിച്ചു.

അവിടെയുള്ള സുവനീർ കടയിൽനിന്ന്​ മരത്തിലുള്ള ഒരു പെയിൻറിങ്​ വാങ്ങി. ഓരോ സ്ഥലത്ത് പോകുമ്പോഴും അതി​െൻറ ഓർമക്കായി എന്തെങ്കിലും വാങ്ങാറുണ്ട്.

പാതയോരത്ത്​ തയാറാക്കി​വെച്ച ഭക്ഷണ വിഭവങ്ങൾ

നടന്ന്​ ഞങ്ങൾ മുകളിലെ റിഡ്​ജിലെത്തി. അവിടെ കണ്ട പോസ്​റ്റ്​ ഓഫിസിൽനിന്ന്​ വീട്ടിലേക്കും കൂട്ടുകാർക്കും ഓരോ കത്തുകൾ അയക്കാൻ മറന്നില്ല. കുറച്ച് മുന്നോട്ട് പോയപ്പോൾ ഇന്ത്യൻ കോഫി ഹൗസ് കണ്ടു. കോഫി ഹൗസ് കണ്ടാൽ മസാല ദോശ കഴിക്കുക എന്ന ശീലം ഇവിടെയും തെറ്റിച്ചില്ല.

ഷിംലയുടെ സാംസ്​കാരിക കേന്ദ്രം കൂടിയാണ്​ റിഡ്​ജ്​. വിവിധ കലാപരിപാടികളും പ്രദർശനവുമെല്ലാം ഇവിടെയാണ്​ അരങ്ങേറാറുള്ളത്​. 1844ൽ നിർമിച്ച ചർച്ച്​, 1910ൽ​ ആരംഭിച്ച ലൈബ്രറി തുടങ്ങിയ നിരവധി ചരിത്രപ്രധാന നിർമിതികളും ഇവിടെ കാണാം. നേരം ഇരുട്ടി തുടങ്ങിയതോടെ റൂമിലേക്ക് മടങ്ങി.

അമ്പലത്തിലേക്കുള്ള പൂജക്ക് ആവശ്യമായ നോട്ട് മാല

അഡ്വഞ്ചർ പാർക്ക്​​

അടുത്ത ദിവസം കുഫ്രിയിലേക്കാണ്​ യാത്ര. രാവിലെ തന്നെ പിങ്കു ഭായി വന്നു. നഗരത്തിൽനിന്ന്​ 13 കിലോമീറ്റർ സഞ്ചരിക്കാനുണ്ട്​​. വഴിയിൽ ഹിമാചൽകാരുടെ പരമ്പരാഗത വസ്ത്രം അണിഞ്ഞു യാക്കി​െൻറ മുകളിൽ കയറി ഫോട്ടോയെടുത്തു. ശേഷം അഡ്വഞ്ചർ പാർക്കിലേക്കാണ് പോയത്.

അവിടെ ചെയ്​ത സാഹസിക വിനോദങ്ങൾ എ​െൻറ ജീവിതത്തിലെ ആദ്യാനുഭവം ആയിരുന്നു. കയറിൽ തൂങ്ങി അന്തരീക്ഷത്തിലൂടെ താഴേക്ക് പോയ സിപ്പ് ലൈൻ, കയറുകൾ കൊണ്ട്​ നിർമിച്ച ബർമ ബ്രിഡ്​ജ്​, ബംഗീ ജംപിങ്​​... അങ്ങനെ നിരവധി സാഹസിക വിനോദങ്ങൾ.

പരമ്പരാഗത വസ്ത്രം അണിഞ്ഞു യാക്കി​െൻറ മുകളിൽ കയറി ഫോട്ടോയെടുത്തപ്പോൾ

കയറുകൊണ്ട്​ ഉയരത്തിൽ കെട്ടിയ പാലത്തിലൂടെ നടക്കുമ്പോൾ താഴേക്ക് വീണുപോകുമോ എന്ന ഭയം മനസ്സ​ിനെ പിടിച്ചുകുലുക്കും. താഴെ നല്ല കുത്തനെയുള്ള മലഞ്ചെരിവാണ്​. അവിടേക്ക്​ വീണാൽ എന്ത് സംഭവിക്കും എന്ന് വെറുതേ ആലോചിച്ചാൽ തന്നെ കാര്യം പോക്കാണ്​. പ്രത്യേക ബെൽറ്റ് കൊണ്ട് നല്ല ബലമുള്ള കയറിൽ കെട്ടിയശേഷമാണ് ബർമ​ ബ്രിഡ്​ജിലൂടെ നടക്കുക.

വലിച്ചുവെച്ച ഇലാസ്​റ്റിക് കയറിൽ നമ്മളെ എടുത്തുയർത്തി എറിയുന്ന അനുഭവമാണ് ബംഗീ ജംപിങ്​​​. നമ്മുടെ കാലിലും അരയിലും ബെൽറ്റ് കൊണ്ട് ഇലാസ്​റ്റികതയുള്ള കയറിലേക്ക് ആദ്യം ബന്ധിപ്പിക്കും. അതിനുശേഷം കയർ മുകളിലേക്ക്​ വലിഞ്ഞു പോകും. പെട്ടെന്ന് താഴെയുള്ള ലോക്ക് റിലീസ് ചെയ്യും. ആ ഒരു നിമിഷം കൊണ്ട് തന്നെ നമ്മൾ മുകളിലേക്ക് എത്തിച്ചേരും. പിന്നീട് ഒരു മൂന്നു നാല് പ്രാവശ്യം കൂടി താഴേക്കും മുകളിലേക്കും നമ്മളെ എടുത്തെറിയും.

വലിച്ചുവെച്ച ഇലാസ്​റ്റിക് കയറിൽ നമ്മളെ എടുത്തുയർത്തി എറിയുന്ന അനുഭവമാണ് ബംഗീ ജംപിങ്​​​

ഇക്കായുടെ നിർബന്ധം കൊണ്ട് പേടിച്ചാണ് ഞാൻ കയറിയത്. പക്ഷെ, സംഗതി കൊള്ളാം. അനുഭവിച്ചറിയുക തന്നെ വേണമത്​. അത്രക്ക്​ ഗംഭീരം. തിരിച്ചിറങ്ങിയപ്പോൾ ആത്മവിശ്വാസം കൂടി. അതുവരെ പേടിച്ചുനിന്ന ഒരുപാട് സ്​ത്രീകൾ പിന്നീട്​ ബംഗീ ജംപ്​​​ ചെയ്യാൻ മുന്നിലേക്ക്​ വന്നു. സത്യത്തിൽ ഞാനവർക്ക്​ ഒരു പ്രചോദനമായി മാറുകയായിരുന്നു.

കുതിരപ്പുറത്തേറി മലമുകളിലേക്ക്​

മനോഹരമായ താഴ്​വരയിലൂടെ പിങ്കു ഭായിയുടെ കാർ വീണ്ടും മുന്നോട്ടുനീങ്ങി. മ്യൂസിക്​ പ്ലയറിലൂടെ ഒഴുകുന്ന പഞ്ചാബി പാട്ടുകൾ കാഴ്​ചകൾക്ക്​ കൂടുതൽ ഭംഗിയേകുന്നു. കുഫ്രിയിലെ മലമുകളിലേക്ക് പോകാനുള്ള കുതിരകൾ നിൽക്കുന്ന സ്ഥലത്തെത്തി. അവിടെ സർക്കാറി​െൻറയും സ്വകാര്യ വ്യക്തികളുടെയും കുതിരകൾ ലഭ്യമാണ്. 300 രൂപയാണ് ഒരാളുടെ നിരക്ക്​. രണ്ട്​ കുതിരകളിലായി മുകളിലേക്ക് യാത്ര തുടങ്ങി. രണ്ടിനെയും നോക്കാൻ ഒരാൾ മാത്രമാണുള്ളത്​. മുട്ട് വരെ നീളമുള്ള ബൂട്ടുകൾ ധരിച്ച അയാൾ കൂടെ നടന്നു. വഴികളെ കുതിരച്ചാണകം പൊതിഞ്ഞിട്ടുണ്ട്​.

കുഫ്രിയിലേക്കുള്ള പാതയിലെ കാഴ്​ച

ഉരുളൻ കല്ലുകളും വേരുകളും നിറഞ്ഞ വഴികളിലൂടെ അൽപ്പനേരം കൊണ്ട്​ മുകളിലെത്തി. കുഫ്രി ശൈത്യ കാലത്താണ് ശരിക്കും സന്ദർശിക്കേണ്ടത്. മഞ്ഞി​െൻറ മെത്തയണിഞ്ഞ്​ നിൽക്കുന്ന കുഫ്രി പ്ര​ത്യേക ഭംഗി തന്നെയാണ്​. ഞങ്ങൾ പോയപ്പോൾ മഞ്ഞുകാലം തുടങ്ങുന്നതേ ഉണ്ടായിരുന്നുള്ളൂ.

മുകളിൽനിന്ന്​ ആപ്പിൾ തോട്ടങ്ങൾ കാണാൻ ഫോർ വീൽ വാഹനം ഉണ്ടായിരുന്നു. ആ വാഹനം ആ മലമുകളിൽ എങ്ങനെ എത്തിയെന്ന് ഞങ്ങൾ ആശ്ചര്യപ്പെട്ടു. ഞങ്ങളുടെ ഡ്രൈവർ ആദ്യംതന്നെ ഒരു കാര്യം പറഞ്ഞിരുന്നു- 'ആപ്പിൾ തോട്ടം കാണാൻ മുകളിൽ ചിലപ്പോൾ പൈസ കൂടുതൽ ചോദിച്ചു യാത്ര ഉണ്ടാകും. അങ്ങിനെ പോയി കാണേണ്ട ആവശ്യമില്ല. നിങ്ങൾക്ക് മണാലിയിൽ പോകാൻ ഉള്ളതിനാൽ അവിടെനിന്നും ആ കാഴ്​ചകൾ കാണാൻ കിട്ടും'. അതുകൊണ്ട് ആപ്പിൾ തോട്ടം കാണാൻ തൽക്കാലം പോയില്ല.

മലമുകളിലേക്ക്​ പോകാനുള്ള കുതിരകൾ

കോഴിക്കോട് ഭാഗത്തുനിന്ന്​ വന്ന ഒരുപാട് സഞ്ചാരികൾ ആ മലമുകളിലുണ്ടായിരുന്നു. അവിടെയുള്ള കടയിൽനിന്ന്​ ന്യൂഡിൽസ് വാങ്ങികഴിച്ചു. ധാരാളം കുങ്കുമപ്പൂ കച്ചവടക്കാരും മലമുകളിലുണ്ട്. കുറെനേരം ആ തണുപ്പിൽ ഞങ്ങളിരുന്നു. ചുറ്റും പച്ചപ്പു നിറഞ്ഞ പൈൻമരങ്ങൾ അതിരിടുന്ന നല്ല മനോഹരമായ പ്രദേശം. മേഘച്ചീറുകളെ തുളച്ചുകയറുന്ന മലകൾ ദൂരെ കാണാം.

തിരിച്ചുപോകാൻ നമ്മളെ കൊണ്ടുവന്ന കുതിരക്കാരൻ തന്നെ വരേണ്ടതുണ്ട്. താഴെനിന്ന്​ പോരുമ്പോൾ അയാൾ നമ്പർ തന്നിരുന്നു. ഇവിടെനിന്ന്​ ഇറങ്ങാൻ തീരുമാനിച്ചപ്പോൾ ഫോൺ വിളിച്ചു. 10 മിനിറ്റ് കൊണ്ട് അയാൾ മുകളിലെത്തി. മല കയറുന്നതിനേക്കാൾ ബുദ്ധിമുട്ടായിരുന്നു താഴേക്കിറങ്ങാൻ. വഴുതി വീഴുമോയെന്ന്​ ഭയന്നു. യാതൊരു പ്രശ്​നവും വരുത്താതെ ആ കുതിരകൾ ഞങ്ങളെ സുരക്ഷിതമായി എത്തിച്ചു.

ഹിമാചൽ പ്രദേശ്​ സ്​റ്റേറ്റ്​ ലൈബ്രറി കെട്ടിടം

ഷിംലയിലെത്തിയ ശേഷം മാൾ റോഡിലേക്കാണ്​ വീണ്ടും പോയത്​. എന്തോ ഒരു വശ്യത ആ നഗരത്തിനുണ്ട്​. രാത്രിവിളക്കുകൾ തെളിയു​േമ്പാൾ തെരുവുകൾ വീണ്ടും മനോഹരമാകുന്നു. ഹിമാലയനിരകളെ തഴുകിയെത്തുന്ന കുളിർക്കാറ്റ്​ മനസ്സിനെ ആനന്ദഭരിതമാക്കുന്നു.

മാൾ ​റോഡിലെ കാഴ്​ച

നാളെ ഇനി മണാലിയിലേക്കാണ്​ യാത്ര. ഇൗ നഗരത്തിലേക്ക്​ ഇനിയെന്ന്​ മടങ്ങിവരുമെന്ന്​ യാതൊരു തീർച്ചയുമില്ല. അന്ന് ഇരുട്ടുവോളം മാൾ റോഡി​െൻറ മനോഹാരിതയും നുകർന്ന്​ അവിടം ചെലവഴിച്ചു.

(തുടരും)

Show Full Article
TAGS:kufri himachal pradesh travel shimla 
Next Story