മലമടക്കുകളിലെ സുഖവാസ കേന്ദ്രങ്ങളുമായി ​​'ചെങ്കടൽ' ടൂറിസം പദ്ധതി

ജിദ്ദ: അത്യുന്നതങ്ങളിൽ നിന്ന്​​ കടലി​െൻറയും കരയുടെയും കണ്ണഞ്ചിപ്പിക്കും കാഴ്​ചകൾ ആസ്വദിക്കാനും സുഖവാസം നടത്താനും മലമടക്കുകളിൽ ആഡംബര വിസ്​മയ സൗധങ്ങൾ. ചെങ്കടൽ വിനോദ സഞ്ചാര പദ്ധതി പ്രദേശത്താണ്​ 'ഡെസേർട്ട്​ റോക്ക്​' എന്ന പേരിൽ പർവത മടക്കുകളിലെ സുഖവാസ കേന്ദ്രങ്ങളുടെ നിർമാണം പുരോഗമിക്കുന്നത്​. റെഡ്​സീ ഡവലപ്​​െമൻറ്​ കമ്പനിയാണ്​ ലോകത്തിലെ ഏറ്റവും വലിയ വിനോദസഞ്ചാര സംരംഭമെന്ന നിലയിൽ ഇതിനകം പേരെടുത്ത 'റെസ്​സീ പദ്ധതി' പ്രദേശത്തെ പർവത മടക്കുകളിൽ അമ്പരിപ്പിക്കുന്ന മനോഹര വാസ്​തുവിദ്യയിൽ സുഖവാസ ​സൗധങ്ങൾ​ ഒരുക്കുന്നത്​. അത്ഭുതകരമായ വിനോദ സഞ്ചാരാനുഭവം ലഭ്യമാകും വിധം മലമടക്കുകളുടെ അഴകളവുകൾക്ക്​ അനുസൃതമായാണ്​ റിസോർട്ടുകൾ നിർമിക്കുന്നത്​. ഈ വർഷം ജൂലൈയിൽ റിസോർട്ടി​െൻറ നിർമാണ പ്രവർത്തനങ്ങൾ ആരംഭിച്ചു​. അടുത്ത വർഷം അവസാനത്തോടെ വിനോദ സഞ്ചാരികൾക്കായി തുറന്നുകൊടുക്കാനാവും വിധമാണ്​ പ്രവർത്തനങ്ങൾ പുരോഗമിക്കുന്നത്​.

പരിസ്ഥിതിയെ സംരക്ഷിക്കുകയും മെച്ചപ്പെടുത്തുകയും ചെയ്യുന്ന വിധത്തിൽ റിസോർട്ടി​െൻറ വാസ്​തുവിദ്യ രൂപകൽപന ചെയ്​തത്​ ആഗോള സ്ഥാപനമായ ഒാപ്പൺഹൈം ആക്കിടെക്​ചർ ആണെന്ന്​ റെഡ്​സി പദ്ധതി സി.ഇ.ഒ ജോൺ ബഗാനോ പറഞ്ഞു. ലോകമെമ്പാടുമുള്ള സന്ദർശകർക്ക്​ സൗദി അറേബ്യയിലെ പ്രകൃതിയുടെ കണ്ടെത്താത്ത സൗന്ദര്യം ആസ്വദിക്കാൻ സാധിക്കുന്നവിധത്തിലാണ്​ പദ്ധതി നടപ്പാക്കുന്നത്​. റിസോർട്ടിലെത്തുന്നവർക്ക്​ അതിമനോഹരമായ സ്ഥലത്ത്​ നിന്ന് കണ്ണെത്താ ദൂരത്തോളം അതിശയകരമായ പ്രകൃതിദൃശ്യങ്ങൾ ആസ്വദിക്കാൻ കഴിയും. സന്ദർശകർക്ക് അവിസ്മരണീയമായ ടൂറിസ്​റ്റ്​ അനുഭവങ്ങൾ ലഭിക്കും.

പ്രകൃതിയെ അതേപടി നിലനിർത്തുകയും ഭാവി തലമുറക്ക്​ ആസ്വദിക്കാൻ കഴിയുംവിധത്തിലാണ്​ അതുല്യമായ രൂപകൽപനയെന്നും സി.ഇ.ഒ പറഞ്ഞു. വാസ്തുവിദ്യയും പ്രകൃതിയുമായി ഇണങ്ങുന്ന 'ഡെസർട്ട് റോക്ക്' റെഡ്​സീ കമ്പനിയുടെ പദ്ധതി പരമ്പയിൽപ്പെട്ടതാണ്​. പ്രകൃതദത്തമായ താഴ്​വരയിലൂടെ കടന്നുപോകുന്ന വിനോദസഞ്ചാരികളെ പർവതമുകളിൽ കാത്തിരിക്കുന്നത്​​​ 48 വില്ലകളും 12 ഹോട്ടൽ സ്യൂട്ടുകളുമാണ്​. സൗന്ദര്യാത്മക രൂപം നിലനിർത്താൻ പർവത നിരയുടെ ആകൃതിക്കൊത്ത വിധം വാസ്തുവിദ്യാ രൂപകൽപ്പനകളെ അനുയോജ്യമാക്കിയിരിക്കുകയാണെന്നും സി.ഇ.ഒ പറഞ്ഞു.

ഡിസൈനുകൾക്കല്ല, പ്രകൃതിയുടെ തനത്​ ഭംഗിക്കും ആകൃതിക്കുമാണ് ഈ നിർമാണത്തിൽ​ പ്രാധാന്യം. ഭൂതലം മുതൽ മലമടക്കുകളിൽ വരെ പല നിലകളിലായി ഹോട്ടൽ സ്യൂട്ടുകൾ, പാറക്കുള്ളിൽ കൊത്തിയൊരുക്കിയെടുക്കുന്ന ഹോട്ടൽ മുറികൾ തുടങ്ങിയ ആഡംബര സുഖവാസ കേന്ദ്രങ്ങളാണ്​ ഈ പദ്ധതിയിലുള്ളത്​. റിസോർട്ടി​െൻറ തനതായ രൂപകൽപ്പന ഉൗർജ ഉപഭോഗം കുറയ്​ക്കുന്നതാണ്​. പ്രദേശത്തെ വന്യജീവികളുടെ ആവാസ വ്യവസ്​ഥക്ക്​ പരിക്കേൽപിക്കാത്ത നിലയിലുമാണ്​ നിർമാണം. മഴവെള്ളം സംഭരിക്കാനും സംരക്ഷിക്കാനും വിതരണം നടത്താനുമുള്ള സംവിധാനങ്ങൾ സ്ഥാപിക്കും. താഴ്‌വരയിലെ സസ്യജാലങ്ങളുടെ സംരക്ഷണത്തിനും ഇങ്ങനെ ശേഖരിക്കുന്ന മഴവെള്ളം ഉപയോഗപ്പെടുത്തും.

റിസോർട്ടിനെ ബന്ധിപ്പിക്കുന്ന റോഡ് ശൃംഖല പ്രധാന താഴ്വരയുടെ അരികിലൂടെ നിലവിലുള്ള ഭൂപ്രകൃതിയുടെ കാഴ്​ച മറക്കാതെയും ശബ്​ദമലിനീകരണം കുറച്ചുമാണ്​ ഒരുക്കിയിരിക്കുന്നത്​. സന്ദർശകർക്ക് ചുറ്റുമുള്ള മരുഭൂമിയിലെ പ്രകൃതിദൃശ്യങ്ങളിൽ പൂർണമായും മുഴുകാനുള്ള അവസരം നൽകും. മികച്ച ഹോട്ടൽ സൗകര്യങ്ങൾ ഉൾക്കൊള്ളുന്ന പദ്ധതിയിൽ ലോകോത്തര ഫിറ്റ്നസ് സെൻറർ, ഡൈവിങ്​ സ്പോട്ടുകൾ, തടാകങ്ങൾ എന്നിവയുണ്ടാകും. ദീർഘദൂരം നടക്കാനും മരുഭൂവാഹനങ്ങളിൽ ഉല്ലാസയാത്ര നടത്താനും മലമുകളിൽ നിന്ന്​ നക്ഷത്രങ്ങളെ വീക്ഷിക്കാനും സൗകര്യങ്ങളൊരുക്കുമെന്നും സി.ഇ.ഒ പറഞ്ഞു.