മഴവില്ലഴകൊരുക്കി തൂവാനം

  • മൂന്നാറിലെ ചിന്നാർ വനത്തിലെ തൂവാനം വെള്ളച്ചാട്ടത്തിലേക്ക്​ ഒരു യാത്ര

മഴവില്ലിൻ അഴകുമായി തൂവാനം സഞ്ചാരികളെ വിളിക്കുന്നു

ഒരു യാത്ര പോകാം​. കാട്​ കഥ ചൊല്ലുന്ന, കാട്ടാർ പാട്ടുപാടുന്ന​ ചിന്നാർ വനത്തിലെ തൂവാനം വെള്ളച്ചാട്ടത്തിലേക്ക്​. സഹ്യ​​​​​െൻറ ഭംഗി ആസ്വദിച്ച്​, കാടിൻെറ മർമ്മരംകേട്ട്​, വനലാവണ്യത്തിലലിഞ്ഞൊരു യാത്ര. ചോലവനങ്ങളും പുൽമേടുകളും മാറിമാറി സഹയാത്രികരാകുന്നൊരു പ്രയാണം. ഒടുവിൽ സുന്ദരമായൊരു ഓർമ നൽകി മറയൂര്‍-മൂന്നാര്‍ മലനിരകളിലൂടെ പതഞ്ഞൊഴുകുന്ന തൂവാനം വെള്ളച്ചാട്ടത്തിനടുത്തുള്ള മരവീട്ടിലെ താമസവും.

ചിന്നാർ വന്യജീവി സങ്കേതത്തിനുള്ളിൽ പാമ്പാറിലാണ് വെള്ളച്ചാട്ടം. മറയൂർ–ഉദുമൽപേ​ട്ട സംസ്ഥാന പാതയിൽ നിന്ന് നാല്​ കിലോമീറ്റർ അകലെയാണ് വെള്ളച്ചാട്ടം സ്ഥിതി ചെയ്യുന്നത്. മൂന്നാർ വഴി പോകുന്നവർക്ക്​ അവിടുന്ന് രാജമല ചുറ്റി മറയൂരിലെ ചന്ദനമരങ്ങളും കണ്ട് ശർക്കരമധുരവും നുണഞ്ഞ്​ ചിന്നാറിലെത്താം. പാലക്കാട്​ വഴി വരുന്നവർ​ പൊള്ളാച്ചിയിലെ കാറ്റാടിപ്പാടവും അമരാവതി ഡാമും അതിനടുത്തുള്ള മുതല ഫാമുമൊക്കെ കണ്ട്​ ഉദുമൽപേട്ട വഴിയാണ്​ ചിന്നാറിലെത്തുക.  കരിമുട്ടി ഫോറസ്​റ്റ്​ സ്‌റ്റേഷന്​ കീഴിലെ ആലംപെട്ടി എക്കോ ഷോപ്പാണ്​ റിപ്പോർട്ടിങ്​ കേന്ദ്രം. വഴിയിൽ തന്നെ കാണാം   അങ്ങകലെ പതഞ്ഞൊഴുകുന്ന പാമ്പാറിൽ നിന്ന്​ 84 അടി താഴ്​ചയിലേക്ക്​ പതിക്കുന്ന തൂവാനം വെള്ളച്ചാട്ടത്തി​​​​​െൻറ വന്യഭംഗി.
ആലംപെട്ടിയിൽ നിന്ന്​ വെള്ളച്ചാട്ടം വരെയാണ്​ ട്രക്കിങ്ങുള്ളത്​. അതിനടുത്തുള്ള ലോഗ്​ ഹൗസിൽ താമസിക്കണമെങ്കിൽ നേരത്തേ ബുക്ക്​ ചെയ്യണം.

ഉന്മേഷം പകർന്ന്​ നറുനീണ്ടി ചായ
കോഴിക്കോട്​ നിന്ന്​ പാലക്കാട്​-പൊള്ളാച്ചി വഴി ആനമല ടൈഗർ റിസർവിലൂടെയായിരുന്നു ഞങ്ങളുടെ യാത്ര. തമിഴ്​നാട്​ പിന്നിട്ട്​ കേരള അതിർത്തി കടക്കു​േമ്പാഴുള്ള ചെക്​പോസ്​റ്റും അവിടുത്തെ ഇൻഫർമേഷൻ സ​​​​െൻററുമായിരുന്നു​​ ആദ്യ വിശ്രമ കേന്ദ്രം. ചിന്നാർ വന്യജീവി സ​​ങ്കേത​ത്തെ കുറിച്ചുള്ള വിവരങ്ങളും ക്ഷീണമകറ്റാനുള്ള ലഘു ഭക്ഷണ-പാനീയങ്ങളും ഇവിടെ ലഭ്യമാണ്​. അവിടെ നിന്ന്​ ആലംപെട്ടിയിലേക്ക്​ പോകുന്ന വഴിയിൽ തന്നെ മനം മയക്കുന്ന തൂവാനം വെള്ളച്ചാട്ടത്തിൻെറ വിസ്​മയക്കാഴ്​ചയും കണ്ടു. 

നേരത്തേ ബുക്ക്​ ചെയ്​തിരുന്നതിനാൽ ആലംപെട്ടിയിൽ എല്ലാം ഒരുക്കിയിരുന്നു. വാച്ചർമാരായ നാഗരാജും ശിവയും വെള്ളച്ചാട്ടത്തിനടുത്തുള്ള ലോഗ്​ഹൗസി​ൽ വെച്ച്​ ഭക്ഷണമൊരുക്കാനുള്ള സാധനങ്ങളുമെടുത്ത്​ യാത്രക്ക്​ തയാറായി നിന്നിരുന്നു. തദ്ദേശീയരായ ആളുകൾക്ക് പരിശീലനം നൽകിയാണ് ഇവിടെ വാച്ചർമാരാക്കുന്നത്. ആലംപെട്ടിയിലെ ആവിപറക്കുന്ന നറുനീണ്ടി സർബത്ത്​ ചായ നൽകുന്ന ഉൻമേഷവുമായാണ്​ നാല്​ കിലോമീറ്ററോളം കാൽനടയായി പോകേണ്ട കാനനയാത്രക്ക്​ തുടക്കമിട്ടത്​.

വെട്ടിത്തെളിച്ച്​ വൃത്തിയാക്കിയ ഒറ്റയടിപ്പാതയിലൂടെ കയറ്റവും ഇറക്കവും വൻമരങ്ങളും പാറക്കെട്ടുകളും നിറഞ്ഞ ഭൂപ്രകൃതിയിലൂടെയാണ്​ നടത്തം. സ്വാഗതമോതുന്ന ഇലക്കൂട്ടങ്ങളെ തഴുകി, കാടിനോട്​ കിന്നാരം ചൊല്ലിയുള്ള യാത്രയിൽ ചാമ്പൽ മലയണ്ണാനും ഹനുമാൻ കുരങ്ങും മീൻ കൂമനുമൊക്കെ പുതിയ അതിഥികളെ കാണാനെത്തി. വമ്പൻ പാറക്കെട്ടി​ൻെറ വിശാലതക്കിടയിലൂടൊഴുകുന്ന കൂട്ടാറിലാണ്​ ആദ്യമെത്തിയത്​. 45ൽ കൂടുതൽ ഇനത്തിൽ പെട്ട ചിത്രശലഭവൈവിധ്യവും 60ഓളം ഇനം പക്ഷികളും ചിന്നാറിലുണ്ടെന്നാണ്​ കണക്ക്​. മണ്ണിൽ പതിഞ്ഞ കാൽപ്പാടുകൾ, പോകുന്ന വഴിയിൽ ആനയോ കാട്ടുപോത്തോ ഉണ്ടായേക്കാമെന്ന സൂചനയും നൽകി. അൽപം മുന്നോട്ട്​ നടന്നപ്പോൾ വഴികാട്ടി നാഗരാജ് ആനയുടെ സാന്നിധ്യമുണ്ടെന്ന അടയാളം നൽകി. നിശബ്​ദരായി പിന്തുടരാൻ ആംഗ്യംകാട്ടി നാഗരാജ്​ മുന്നിൽ നടന്നു. പക്ഷേ, ഉൾക്കാട്ടിലേക്ക്​ കടന്നതിനാൽ ഗജരാജ​െന ഒരു നോക്ക്​ കാണാൻ കഴിയുമെന്ന ആഗ്രഹം വിഫലമായെന്ന്​ മാത്രം.

തൂവാനം ഒരു പാലാഴി
പാതിവഴി പിന്നിട്ടപ്പോൾ അങ്ങകലെ തൂവാനം തുളുമ്പുന്ന ശബ്​ദം കേട്ടു. താഴേക്ക് നോക്കിയാൽ പാമ്പാറൊഴുകുന്നതും കാണാം. മുന്നോട്ട് പോകുംതോറും വെള്ളംപതഞ്ഞു വീഴുന്ന ശബ്​ദം ഉച്ചത്തിലായി. ലക്ഷ്യസ്​ഥാനം അടുത്തെന്ന്​ അറിഞ്ഞതോടെ നടത്തത്തിന്​ വേഗവും കൂടി. മായ കാഴ്ചകൾ കാണാൻ ഇനി പാമ്പാർ കടക്കണം. നാഗരാജി​​​​​െൻറ സഹായത്തോടെ പുഴ കടന്ന്​ കയറിയത്​ തൂവാനമൊരുക്കുന്ന വിസ്​മയ ഭംഗിയിലേക്കാണ്​. പാറക്കൂട്ടങ്ങൾക്കു മീതെ അലച്ചുവീണ് പ്രൗഡിയുടെ വെൺമ വിതറുന്ന തൂവാനത്തുള്ളികളുടെ കാഴ്​ച. കാടി​​​​​െൻറ മർമ്മരത്തെക്കാൾ ഉച്ചത്തിലായിരുന്നു തൂവാനസുന്ദരിയുടെ പൊട്ടിച്ചിരി.
‘തൂവാനം ഒരു പാലാഴി, പൂന്തിങ്കൾ നറു പൂന്തോണി
പൂന്തോണിയിലിക്കരെ വന്നാല്‍ അമ്പാടി കടവുണ്ട്
മായാലോകമുണ്ട്...’
എന്ന ‘സവിധം’ സിനിമയിലെ പാട്ടാണ്​ ഓർമ വന്നത്​.

ചിന്നാർ വഴിയേ പോകുമ്പോളൊക്കെ മോഹിപ്പിച്ചിരുന്ന വെള്ളച്ചാട്ടമിതാ കൈയെത്തും ദൂരത്ത്​. മറയൂർ–മൂന്നാർ മലനിരകൾക്കിടയിലൂടെ ഒഴുകുന്ന പാമ്പാർ തൂവെള്ള നിറത്തിൽ കുത്തിയൊഴുകുന്നതി​​​​​െൻറ ദൃശ്യചാരുതയാകാം വെള്ളച്ചാട്ടത്തിന് തൂവാനം എന്ന പേരിട്ടതെന്ന്​ തോന്നിപ്പോയി.
പുഴ കടന്നാൽ കുത്തനെയുള്ള കയറ്റം കയറിച്ചെല്ലുന്നത് കരിങ്കല്ലുകൊണ്ട് അതിർത്തി തീർത്ത ലോഗ് ഹൗസിലേക്കാണ്. വീടി​​​​​െൻറ വരാന്തയിലിരുന്ന്​ പതഞ്ഞൊഴുകുന്ന തൂവാനം വെള്ളച്ചാട്ടം ആവോളം ആസ്വദിക്കാം. വെള്ളം കുറവായതിനാൽ വെള്ളച്ചാട്ടത്തിൻെറ ഇടത്തേ അറ്റത്തുള്ള ചെറിയ ജലപാതത്തിൽ കുളിക്കാൻ കഴിഞ്ഞതോടെ ക്ഷീണമെല്ലാം പമ്പകടന്നു.  
രാത്രിയായി. നാഗ്​രാജും ശിവയും രാത്രി ഭക്ഷണമൊരുക്കുന്ന തിരക്കിലാണ്​. പൂർണ ചന്ദ്രൻ ഉദിച്ചുയർന്നതോടെ തൂവാനത്തി​​​​​െൻറ മാറ്റ്​ കൂടി. വെള്ളച്ചാട്ടത്തിൻെറ താരാട്ട്​ കേട്ട്​ മെല്ലെ ഉറക്കത്തിലേക്ക്​.

രാവിലെ വെള്ളച്ചാട്ടത്തി​​​​​െൻറ മുകളിലേക്ക്​ നടത്തിയ ട്രക്കിങും അവിസ്​മരണീയമായി. ഇളംവെയിൽ വീണപ്പോൾ വെള്ളവും വെളിച്ചവും ചേർന്ന്​ തീർത്ത മഴവില്ല്​ തൂവാനത്തിൻെറ അഴക്​ കൂട്ടി. കാടിറങ്ങു​േമ്പാൾ വെള്ളച്ചാട്ടത്തി​​​​​െൻറ ശബ്​ദം അകന്നകന്ന്​ പോകുന്നു. മറയൂരും പിന്നിട്ട്​ 45 കിലോമീറ്റർ അകലെയുള്ള മൂന്നാറിലൂടെ തേയിലത്തോട്ടങ്ങളും മലനിരകളും കണ്ട്​ മടങ്ങു​േമ്പാഴും കാട്ടിലെ കിളിക്കൊഞ്ചലുകളും പതഞ്ഞൊഴുകുന്ന കാട്ടരുവിയായിരുന്നു മനസ്​ നിറയെ...

 

വഴി

കൊച്ചി-മൂന്നാർ-മറയൂർ-ചിന്നാർ വഴി

കോട്ടയം-മൂന്നാർ-മറയൂർ-ചിന്നാർ വഴി

കോഴി​ക്കോട്​-പാലക്കാട്​-പൊള്ളാച്ചി-ഉദുമൽപേട്ട-ചിന്നാർ വഴി

ബുക്കിങിന് ഫോൺനമ്പർ - 04865 - 231587, 8301024187

 

 

 

 

 

 

 

 

ബുക്കിങ്​ വിവരങ്ങളും ട്രക്കിങ്​-താമസ റേറ്റുമടങ്ങുന്ന വെബ്​സൈറ്റ് ലിങ്ക്​
https://booking.munnarwildlife.com/product/thoovanam-log-house/

 

Loading...
COMMENTS