എട്ട്​ ദിവസം കൊണ്ട്​ സൈക്കിളിൽ കശ്​മീർ -​ കന്യാകുമാരി യാത്ര; ലോക റെക്കോഡ്​ സ്​ഥാപിച്ച്​ 23കാരൻ

ഇച്ഛാശക്തിയും മനോധൈര്യവുമുള്ളവർക്ക്​ ഈ ലോകത്ത് അസാധ്യമായത്​ ഒന്നുമില്ലെന്ന്​ തെളിയിക്കുകയാണ്​ ആദിൽ തെലി എന്ന കശ്​മീരി യുവാവ്​. ഗിന്നസ്​ വേൾഡ്​ റെക്കോഡിലേക്കാണ്​​ ഈ 23കാരൻ സൈക്കിൾ ചവിട്ടിക്കയറിയത്​. കശ്​മീരിൽനിന്ന്​ കന്യാകുമാരിയിലേക്ക്​ എട്ട്​ ദിവസവും ഒരു മണിക്കൂറും 37 മിനുറ്റും കൊണ്ട്​​ ഇദ്ദേഹം സൈക്കിൾ ചവി​ട്ടിയെത്തി​. 17കാരനായ ഓം മഹാജൻ എട്ട്​ ദിവസം, 7 മണിക്കൂർ, 38 മിനുറ്റ്​ കൊണ്ട്​ തീർത്ത റെക്കോഡാണ്​ ആദിൽ മറികടന്നത്​. 2020 നവംബറിലായിരുന്നു ഓം മഹാജന്‍റെ റെക്കോർഡ്​ പ്രകടനം.

മുമ്പും ആദിൽ റെക്കോഡ്​ പ്രകടനം പുറത്തെടുത്തിട്ടുണ്ട്​. 440 കിലോമീറ്റർ ദൂരം വരുന്ന ശ്രീനഗർ-ലേ പാത 26 മണിക്കൂർ 30 മിനുറ്റ്​ കൊണ്ട്​ കീഴടക്കിയാണ്​​ റെക്കോർഡ് സ്​ഥാപിച്ചത്​​. ബുഡ്ഗാമിലെ നർബൽ ജില്ലയിൽ നിന്നുള്ള സൈക്ലിസ്റ്റാണ് ആദിൽ.

2021 മാർച്ച് 22 ന് ശ്രീനഗറിലെ ലാൽചൗക്കിൽനിന്ന്​ രാവിലെ ഏഴ്​ മണിക്കാണ്​ ആദിൽ കന്യാകുമാരി യാത്ര ആരംഭിച്ചത്​. എട്ട്​ ദിവസത്തിനുള്ളിൽ 3600 കിലോമീറ്ററാണ്​ പിന്നിട്ടത്​. ഇതിനായി മാസങ്ങളുടെ തയാറെടുപ്പുകളും കഠിനാധ്വാനവും എടുക്കേണ്ടി വന്നു. അമൃത്​സറിലായിരുന്നു‌ ആദിൽ‌ പരിശീലനം നേടിയത്​. യാത്രയിലുടനീളം ആദിലിനെ നയിക്കാൻ പരിശീലകൻ കൂടെയുണ്ടായിരുന്നു. ഡൽഹി, ആഗ്ര, ഗ്വാളിയർ, ഹൈദരാബാദ്, മധുര എന്നിവിടങ്ങളിലൂടെ സന്ദർശിച്ചാണ്​ ഇന്ത്യയുടെ തെക്കേ അറ്റത്ത്​ എത്തുന്നത്​.

ശ്രീനഗർ - ലേ യാത്ര ആദിലിനെ സംബന്ധിച്ചിടത്തോളം ജീവിതത്തിലെ വഴിത്തിരിവായിരുന്നു. കൂടുതൽ ലക്ഷ്യങ്ങൾ കൈപിടിയിലൊതുക്കാൻ ഇത്​ ഉത്തേജനം നൽകി. ലോക റെക്കോഡ് സ്​ഥാപിച്ചശേഷം ആദിൽ മാധ്യമങ്ങളെ കാണുകയും തന്‍റെ സ്പോൺസർമാർക്കും ഗൈഡുകൾക്കും അഭ്യുദയാകാംക്ഷികൾക്കും നന്ദി പറയുകയും ചെയ്​തു.

Never give up#cycling #motivation #passion #Adilteli pic.twitter.com/jZOAELMmfy

— Adil Teli (@ImAdilteli) February 7, 2021