'ഹിന്ദി രാഷ്​ട്രീയം'ദക്ഷിണേന്ത്യൻ നേതാക്കളുടെ അവസരം തുലച്ചു -കുമാരസ്വാമി

ബംഗളൂരു: 'ഹിന്ദി രാഷ്ട്രീയവും' വിവേചനവുംമൂലം തെക്കിലെ രാഷ്ട്രീയ നേതാക്കൾക്ക് അവസരങ്ങൾ നഷ്ടപ്പെട്ടുവെന്ന് ജെഡി (എസ്) നേതാവ് എച്ച്ഡി കുമാരസ്വാമി. നിരവധി ദക്ഷിണേന്ത്യക്കാരെ പ്രധാനമന്ത്രിയാക്കുന്നതിൽ നിന്ന് തടഞ്ഞത്​ ഇതേ വിവേചനമാണെന്നും അദ്ദേഹം പറഞ്ഞു.

ഹിന്ദി സംസാരിക്കാൻ കഴിയാത്തതിനാൽ "അവൾ ഒരു ഇന്ത്യക്കാരിയാണോ"എന്ന് സി‌.ഐ‌.എസ്​.എഫ് ഉദ്യോഗസ്ഥർ ഡി‌.എം‌.കെ എം‌പി കനിമോഴിയോട് ചോദിച്ചതിൽ കടുത്ത അസ്വസ്ഥത പ്രകടിപ്പിച്ച കർണാടക മുൻ മുഖ്യമന്ത്രി ഭരണവർഗം തെക്കിനെ അവഗണിക്കുകയാണെന്നും ആരോപിച്ചു. ഒരാൾ ഇംഗ്ലീഷിലോ ഹിന്ദിയിലോ പരീക്ഷ എഴുതണം എന്ന കാരണത്താൽ നിരവധി കന്നഡിഗർക്ക്​ സർക്കാർ, പൊതുമേഖല സ്​ഥാപനങ്ങളിൽ ജോലി ലഭിക്കാനുള്ള അവസരം നിഷേധിക്കപ്പെട്ടുവെന്ന്​ കുമാരസ്വാമി നേരത്തെ ട്വീറ്റ്​ ചെയ്​തിരുന്നു.

'സഹോദരി കനിമോഴിയെ അപമാനിച്ചതിനെതിരെ ഞാൻ ശബ്ദം ഉയർത്തുന്നു. ഹിന്ദി രാഷ്ട്രീയവും വിവേചനവും തെക്കിൽ നിന്നുള്ള ധാരാളം രാഷ്ട്രീയ നേതാക്കൾക്ക്​ അവരുടെ അവസരങ്ങൾ തടഞ്ഞതിനെപറ്റി ഇ​പ്പോൾ ചർച്ച ചെയ്യുന്നത് ഉചിതമായിരിക്കും'-കുമാരസ്വാമി ത​െൻറ ട്വീറ്റിൽ കുറിച്ചു.

ഹിന്ദി രാഷ്ട്രീയം പല ദക്ഷിണേന്ത്യക്കാരെയും പ്രധാനമന്ത്രിയാക്കുന്നതിൽ നിന്ന് തടഞ്ഞു. എച്ച്.ഡി ദേവഗൗഡ, കരുണാനിധി, കാമരാജ് എന്നിവർ ഇതിൽ പ്രമുഖരാണ്​. ഈ തടസ്സം തകർക്കുന്നതിൽ ത​െൻറ പിതാവ് ദേവഗൗഡ വിജയിച്ചെങ്കിലും ഭാഷയുടെ പേരിൽ അദ്ദേഹത്തെ വിമർശിക്കുകയും പരിഹസിക്കുകയും ചെയ്ത നിരവധി സംഭവങ്ങളുണ്ടായിട്ടുണ്ടെന്നും കുമാരിസ്വാമി പറഞ്ഞു. രണ്ടുതവണ ലോക്സഭാ അംഗമായതിനാൽ തനിക്ക് സമാനമായ അനുഭവങ്ങൾ ഉണ്ടായിട്ടുണ്ട്​.

'ഭരണവർഗം തെക്കിനെ അവഹേളിക്കുന്നതിനും പുച്​ഛിക്കുന്നതിനും താൻ സാക്ഷിയായിട്ടുണ്ട്​. ഹിന്ദി രാഷ്ട്രീയക്കാർ എങ്ങനെ തന്ത്രങ്ങൾ മെനയുന്നുവെന്ന് ഞാൻ നേരിട്ട്​ കണ്ടിട്ടുണ്ട്​. അവരിൽ ഭൂരിഭാഗവും ഹിന്ദി ഇതര രാഷ്ട്രീയക്കാരെ ബഹുമാനിക്കുന്നില്ല'-അദ്ദേഹം കൂട്ടിച്ചേർത്തു.