ഫെയർ ഇല്ലാതെ ഇനി 'ഫെയർ ആൻഡ്​ ലൗലി'യെത്തും

ബംഗളൂരു: ഇരുണ്ട ചർമക്കാർക്കിടയിൽ തെറ്റായ സൗന്ദര്യ ധാരണകൾ പരത്തുന്നുവെന്ന ആക്ഷേപം ഉയർന്നതിന്​ പിന്നാലെ ആഗോള ഭീമൻമാരായ യൂനിലിവർ ​'ഫെയർ ആൻഡ്​ ലൗലി'യിലെ ഫെയർ എന്ന വാക്ക്​ ഉപേക്ഷിക്കുന്നു. ​ഫെയർ എന്ന വാക്ക്​ ഉൽപ്പന്നത്തി​െൻറ പേരിൽ ഉപയോഗിക്കുന്നത്​ നിർത്തും. പുതിയ പേരിന്​ റെഗുലേറ്ററി അതോറിറ്റിയുടെ അംഗീകാരം ലഭിക്കാൻ കാത്തിരിക്കുകയാണെന്നും ഹിന്ദുസ്​ഥാൻ യൂനിലിവർ അറിയിച്ചു. പുതിയ പേര്​ വെളിപ്പെടുത്തിയിട്ടില്ല.

'ഫെയർ' 'ലൈറ്റ്​' '​െവെറ്റ്​' തുടങ്ങിയ വാക്കുകൾ ഒഴിവാക്കാനാണ്​ നീക്കം. വാക്കുകളുടെ ഉപയോഗത്തിൽ വലിയ മാറ്റങ്ങൾ കൊണ്ടുവരുന്നതിനാണ്​ കമ്പനിയുടെ തീരുമാനം.

തൊലി നിറത്തെക്കുറിച്ചുള്ള പരാമർശങ്ങൾക്ക്​ സമൂഹമാധ്യമങ്ങളിൽ സൗന്ദര്യവർധക ഉൽപാദക കമ്പനികൾക്ക്​ വലിയതോതിൽ വിമർശനം നേരിടേണ്ടിവന്നിരുന്നു. ഫെയർ ആൻഡ്​ ലൗലിയുടെ തൊലിനിറത്തെക്കുറിച്ചുള്ള പരാമർശങ്ങൾക്കെതിരെയായിരുന്നു വിമർശനം. അമേരിക്കയിൽ പൊട്ടിപുറപ്പെട്ട ബ്ലാക്ക്​സ്​ ലൈവ്​സ്​ മാറ്റർ മൂവ്​മെൻറ്​ ഇതിനൊരു വഴിത്തിരിവാകുകയായിരുന്നു.

'ചർമ സംരക്ഷക വൈവിധ്യങ്ങളെ കൂടുതൽ ഉൾക്കൊള്ളുന്നു... ഇനി സൗന്ദര്യത്തി​െൻറ കൂടുതൽ വൈവിധ്യമാർന്ന ചിത്രീകരണമാകും' ഹിന്ദുസ്​ഥാൻ യൂനിലിവർ ചെയർമാൻ സജ്ഞീവ്​ മെഹ്​ത പറഞ്ഞു. സൗന്ദര്യ വർധക വസ്​തുക്കൾക്ക്​ ദശാബ്​ദങ്ങളായി വൻവിപണി കണ്ടെത്തിയിരുന്നത്​ ഏഷ്യയിലായിരുന്നു. ഇരുണ്ട നിറക്കാരോട്​ പുലർത്തിവരുന്ന വിവേചനപരമായ നീക്കമാണെന്നും ഇതിനെ വിലയിരുത്തിയിരുന്നു.