ഗൂഗിളിനും ഫേസ്​ബുക്കിനും നികുതി​ ചുമത്താനൊരുങ്ങി ബ്രിട്ടൻ

ലണ്ടൻ: ടെക്​ ഭീമൻമാരായ ഗൂഗിളിനും ഫേസ്​ബുക്കിനും നികുതി ചുമത്താനൊരുങ്ങി ബ്രിട്ടൻ. ഭീകരവാദവും ആക്രമണങ്ങളും പ്രോൽസാഹിപ്പിക്കുന്ന തരത്തിലുള്ള
ഉള്ളടക്കം പിൻവലിക്കാത്ത പക്ഷം നികുതി ചുമത്തുമെന്ന്​​ ബ്രിട്ടീഷ്​ സുരക്ഷാ മന്ത്രി ബെൻ വലൈസ്​ പറഞ്ഞു.

തീവ്രവാദ പ്രവർത്തനങ്ങൾ തടയാനും രാജ്യ സുരക്ഷക്കും വേണ്ടി സർകാർ​ ഉപയോക്​താക്കളുടെ വിവരങ്ങൾ ആവശ്യപ്പെട്ടാൽ നൽകാൻ മടിക്കുന്ന ടെക്​ ഭീമൻമാർ​ വിവരങ്ങൾ രാജ്യത്തിനും ജനങ്ങൾക്കുമെതിരായ രീതിയിൽ വിറ്റ്​ കാശാക്കുകയാണെന്ന്​ ബെൻ ആരോപിച്ചു. ലോണുകാർക്കും സോഫ്​റ്റ്​ പോൺ കമ്പനികൾക്കുമാണ്​ ഉപയോക്​താക്കളുടെ വിവരങ്ങൾ ഗൂഗിളും ഫേസ്​ബുക്കും പോലുള്ള കമ്പനികൾ വിൽകുന്നതെന്നും ബെൻ ആരോപിക്കുന്നു.

സ്വകാര്യ ലാഭത്തിന്​ വേണ്ടി പൊതു സുരക്ഷ വെച്ചുള്ള ഇത്തരം​ പ്രവർത്തികൾ കണ്ടില്ലെന്ന്​ നടിക്കാനാവില്ലെന്ന്​ ബെൻ വലൈസ്​ തുറന്നടിച്ചു. അതേ സമയം ഫേസ്​ബുക്ക്​ ഉദ്യോഗസ്​ഥൻ സിമോൻ മിൽനർ മന്ത്രിയുടെ ആരോപണങ്ങൾക്കെതിരെ രംഗത്ത്​ വന്നു. രാജ്യ സുരക്ഷക്കോ ജനങ്ങള​ുടെ സ്വകാര്യതക്കോ നിരക്കാത്ത പ്രവർത്തികൾ ചെയ്യില്ലെന്നും തീവ്രവാദ ഉള്ളടക്കങ്ങൾ കണ്ടെത്തി നീക്കം ചെയ്യാൻ ദശലക്ഷക്കണക്കിന്​ ഡോളർ ഫേസ്​ബുക്ക്​ നിക്ഷേപിച്ചിട്ടുണ്ടെന്നും മിൽനർ വ്യക്​തമാക്കി.