വർക്​ ഫ്രം ഹോം വിനയായെന്ന്​; ബ്രിട്ടനിൽ നെറ്റ്​വർക്​ തകരാറിൽ

ലണ്ടൻ: കോവിഡ്​ 19 വൈറസ്​ ഏറ്റവും കൂടുതൽ ബാധിച്ച രാജ്യങ്ങളിലൊന്നായ ബ്രിട്ടനിൽ സർവ മേഖലയിലും ശക്​തമായ നിയന്ത്രണങ്ങൾ തുടരവേ മൊബൈൽ നെറ്റ്​വർക്​ തകരാറിലായി. കൊറോണ വ്യാപനം തടയാൻ വിവിധ സ്ഥാപനങ്ങളിലെ ജീവനക്കാരോട്​ വീട്ടിൽ നിന്ന്​ ജോലി ചെയ്യാൻ പ്രധാനമന്ത്രി ബോറിസ്​ ജോൺസൺ നിർദേശിച്ചിരുന്നു. അതിന്​ പിന്നാലെ എല്ലായിടത്തും​ മൊബൈൽ നെറ്റ്​വർക്​ തകരാറിലായതായതായി ഉപഭോക്​താക്കൾ പരാതിയുന്നയിക്കുകയായിരുന്നു.

ആളുകൾ ഒരുമിച്ച്​ കൂടുന്നത്​ തടയുന്നതിനായി പല രാജ്യങ്ങളും ‘വർക്​ ഫ്രം ഹോം’ പ്രോത്സാഹിപ്പിക്കുകയാണ്​. മിക്ക ​െഎ.ടി കമ്പനികളും അതേറ്റെടുത്ത്​ തൊഴിലാളികളെ വീട്ടിലേക്ക്​ പറഞ്ഞയച്ചിട്ടുമുണ്ട്​. ഇതിനെ തുടർന്ന്​ ഇൻറർനെറ്റ്​ ട്രാഫിക്​ ക്രമാതീതമായി വർധിക്കുകയും​ മൊബൈൽ സേവനദാതാക്കളിൽ അത്​ കൂടുതൽ സമ്മർദമുണ്ടാക്കുന്നതായും റിപ്പോർട്ടുകളുണ്ടായിരുന്നു.

നേരത്തെ വിഡിയോ സ്​ട്രീമിങ്​ പ്ലാറ്റ്​ഫോമുകളായ നെറ്റ്​ഫ്ലിക്​സിനോടും ആമസോൺ പ്രൈമിനോട്​ അവരുടെ വിഡിയോ സ്​ട്രീമിങ്​ എച്ച്​.ഡി ക്വാളിറ്റിയിൽ നിന്നും സ്​റ്റാൻഡേർഡ്​ ഡെഫിനിഷനായി കുറക്കാൻ ഇന്ത്യയിൽ നിന്നടക്കം ആവശ്യമുയർന്നിരുന്നു. ബ്രിട്ടനിൽ നെറ്റ്​ഫ്ലിക്​സ്​ അവരുടെ വിഷ്വൽ ക്വാളിറ്റി കുറച്ചാണ്​ നിലവിൽ വിഡിയോകൾ പ്രദർശിപ്പിക്കുന്നത്​.

അതേസമയം, വീട്ടിൽ നിന്നും ജോലി ചെയ്യുന്നവർ മൂലമല്ല നെറ്റ്​വർകിന്​ തകരാർ വരുന്നതെന്ന് ബ്രിട്ടനിലെ​ മൊബൈൽ സേവനദാതാക്കർ അറിയിച്ചു. ഇ.ഇ, ത്രീ, ഒ2, വൊഡാഫോൺ തുടങ്ങിയ ഒാപറേറ്റർമാരാണ്​ നിലവിൽ നെറ്റ്​വർക്​ പ്രശ്​നം അനുഭവിക്കുന്നത്​. ഒ2 എന്ന കമ്പനിയാണ് നെറ്റ്​വർക്​​ തകരാറിന്​ കാരണമെന്ന്​ മറ്റ്​ കമ്പനികൾ ആരോപിച്ചിരുന്നു. എന്നാൽ ഒ2 അത്​ നിഷേധിച്ച്​ രംഗത്തെത്തി.

രാജ്യത്ത്​ മികച്ച നെറ്റ്​വർക്​ ഉറപ്പുവരുത്തേണ്ട സാഹചര്യത്തിൽ പരസ്​പരം പഴിചാരാതെ ഒരുമിച്ച്​ പണിയെടുത്ത്​ അത്​ പുനഃസ്ഥാപിക്കാൻ ശ്രമിക്കാമെന്ന്​ അവർ പ്രസ്​താവനയിൽ പറഞ്ഞു.