ക്രൈം വീഡിയോകൾ നീക്കം ചെയ്യാൻ ഫേസ്​ബുക്ക്​ 3,000 പേരെ നിയമിക്കുന്നു

കാലിഫോർണിയ: അക്രമം പ്രോൽസാഹിപ്പിക്കുന്ന  വീഡിയോകൾ നീക്കം ചെയ്യാൻ ഫേസ്​ബുക്ക്​ 3,000 പേരെ നിയമിക്കുന്നു. കൊലപാതകം, ആത്​മഹത്യ പോലുള്ള ദൃശങ്ങൾ ഉൾപ്പെടുന്ന വീഡിയോകൾ നീക്കം ചെയ്യാനാണ്​ ഫേസ്​ബുക്കി​​ൻറ പദ്ധതി. ഫേസ്​ബുക്ക്​ നടത്തുന്ന വലിയ നിയമനങ്ങളിലൊന്നാണ്​ ഇപ്പോഴത്തേത്​​.

വീഡിയോകൾ നീക്കം ചെയ്യുന്നതിനായി ആളുകളെ നിയമിക്കുന്ന വിവരം ഫേസ്​ബുക്ക്​ സി.ഇ.ഒ മാർക്ക്​ സക്കർബർഗാണ്​ ബുധനാഴ്​ച ഒൗദ്യോഗികമായി അറിയിച്ചത്​. ഫേസ്​ബുക്ക്​ ഉപയോഗിക്കുന്നവർക്ക്​ സുരക്ഷിതമായ അനുഭവം നൽകുകയെന്നതാണ്​ തങ്ങളുടെ ലക്ഷ്യമെന്നും സക്കർബർഗ്​ പറഞ്ഞു.

ഫേസ്​ബുക്ക്​ ലൈവ്​ വീഡി​യോ സേവനം ആരംഭിച്ചതിന്​ ശേഷം നിരവധി പരാതികളാണ് കമ്പനിക്കെതിരെ ഉയർന്നിരുന്നത്​. ഫേസ്​ബുക്കിൻറെ പുതിയ സേവനം ദുരപയോഗപ്പെടുത്തി നിരവധി പേർ കൊലപാതകം ഉൾപ്പടെയുള്ള ദൃശ്യങ്ങൾ ലൈവായി കാണിച്ചിരുന്നു. ഇതിനെതിരെ വിവിധ കോണുകളിൽ നിന്ന്​ വിമർശനങ്ങൾ ഉയർന്നിരുന്നു. ഇയൊരു പശ്​ചാത്തലത്തിലാണ്​ ഇത്തരം വീഡിയോകൾ നീക്കം ​ചെയ്യാൻ ഫേസ്​ബുക്ക്​ തീരുമാനമെടുത്തത്​.