വിവരചോർച്ച; അഞ്ച്​ ലക്ഷം സൂം അക്കൗണ്ട്​ വിവരങ്ങൾ വിൽപനക്ക്​

വീഡിയോ കോൺഫറൻസിങ്ങിന്​ ഉപയോഗിക്കുന്ന സൂം ആപിലെ അഞ്ച്​ ലക്ഷം ഉപയോക്​താക്കളുടെ വിവരങ്ങൾ ഡാർക്​ വെബിൽ വിൽ പനക്ക്​ വെച്ചതായി റിപ്പോർട്ട്​. ചില അക്കൗണ്ട്​ വിവരങ്ങൾ ചെറിയ വിലക്കും മറ്റ്​ ചിലത്​ സൗജന്യമായുമാണ്​ ​ഡാർക്​ വെബിലുള്ളത്​. ബ്ലീപ്പിങ്​ കംപ്യൂട്ടർ എന്ന സ്ഥാപനമാണ്​ വിവര ചോർച്ച പുറത്ത്​ വിട്ടത്​.

ഒരു അക്കൗണ്ട് സംബന്ധിച്ച​ വിവരത്തിന്​ 0.15 രൂപ മാത്രമാണ്​ ഹാക്കർമാർ ഈടാക്കുന്നത്​. ഉപയോക്​താക്കളുടെ ഇമെയിൽ, പാസ്​വേഡ്​, പേഴ്​സണൽ മീറ്റിങ്​ യു.ആർ.എൽ, ഹോസ്​റ്റ്​കീ എന്നിവയാണ്​ ചോർന്നത്​. ഇതിൽ 290 അക്കൗണ്ടുകൾ സർവകലാശാലകളുമായി ബന്ധപ്പെട്ടവയാണ്​. യൂനിവേഴ്​സിറ്റി ഓഫ്​ വെർമോണ്ട്​, ഡാർട്ട്​മൗത്ത്​, ലഫായേറ്റ, യൂനിവേഴ്​സിറ്റി ഓഫ്​ ​ഫ്ലോറിഡ, യൂനിവേഴ്​സിറ്റി ഓഫ്​ കോളറാഡോ എന്നീ സർവകലാശാലകളുടെ വിവരങ്ങളാണ്​ ചോർന്നത്​. സിറ്റിബാങ്ക്​ ഉൾപ്പടെയുള്ള ചില വൻകിട കോർപ്പറേറ്റ്​ സ്ഥാപനങ്ങളുടെ സൂം അക്കൗണ്ട്​ വിവരങ്ങളും ഹാക്കർമാർ ചോർത്തി.

ലോക്​ഡൗൺ കാരണം വീടുകളിലിരുന്ന്​ ജോലി ചെയ്യുന്നത്​ വർധിച്ചതോടെയാണ്​ നിരവധി പേർ​ സൂം ആപ്ലിക്കേഷൻ ഉപയോഗിക്കാൻ തുടങ്ങിയത്​. സൂം ഉപയോഗം കൂടി​യെങ്കിലും ഇതിൻെറ സുരക്ഷയെ സംബന്ധിച്ചുള്ള ആശങ്കകൾക്ക്​ പരിഹാരമായിരുന്നില്ല.