സ്​പേസ്​ എക്​സിന്‍റെ റോക്കറ്റ്​ അവശിഷ്ടം പതിച്ചത്​ കൃഷിയിടത്തിൽ; വീഴ്​ച്ചയുടെ ആഘാതത്തിൽ കുഴി രൂപപ്പെട്ടു

സാൻ ഫ്രാൻസിസ്​കോ: ഇലോൺ മസ്​കിന്‍റെ സ്​പേസ്​ എക്​സ്​ നിർമിച്ച റോക്കറ്റിന്‍റെ അവശിഷ്​ടങ്ങൾ അമേരിക്കയിലെ ഒരു കൃഷിയിടത്തിൽ പതിച്ചത്​ ഭീതി പടർത്തി. വീഴ്​ച്ചയുടെ ആഘാതത്തിൽ മണ്ണിൽ നാലിഞ്ച്​ ആഴത്തിലുള്ള കുഴിയും രൂപപ്പെട്ടിട്ടുണ്ട്​. സ്​പേസ്​ എക്​സിന്‍റെ ഫാൽക്കൺ 9 എന്ന റോക്കറ്റിന്‍റെ പ്രഷർ വെസ്സലാണ്​ വാഷിങ്​ടണിലെ ഗ്രാന്‍റ​്​ കൗണ്ടിയിലുള്ള കർഷകന്‍റെ ഫാമിലേക്ക്​ വീണത്​. അഞ്ചടി നീളമുള്ള വെസ്സൽ ഹീലിയം സംഭരിക്കാൻ ഉപയോഗിക്കുന്നതാണ്​.

പൊതുവേ റോക്കറ്റുകളിൽ നിന്ന്​ വേർപ്പെടുന്ന ഭാഗങ്ങൾ വർഷങ്ങളോളം ഭ്രമണപദത്തിൽ എങ്ങോ​ട്ടെന്നില്ലാതെ ഒഴുകിനടക്കുകയോ അല്ലെങ്കിൽ, ഭൂമിയിലേക്ക്​ തിരികെ പ്രവേശിച്ച്​ സമുദ്രത്തിലേക്ക്​ പതിക്കുകയോ ​ആണ്​ ചെയ്യുന്നത്​.

ഗ്രാന്‍റ്​ കൗണ്ടിയിലെ പൊലീസാണ്​​ വിചിത്രമായ സംഭവം മാധ്യമങ്ങളോട്​ വെളിപ്പെടുത്തിയത്​. അവിടെയുള്ള കർഷകൻ ഫാമിൽ പ്രഷർ വെസ്സൽ കണ്ടെത്തിയതോടെ പൊലീസിനെ വിവരമറിയിക്കുകയായിരുന്നു. ഫാമുടമയോ, ഞങ്ങളുടെ പൊലീസ്​ ഉദ്യോഗസ്ഥനോ ശാസ്​ത്രജ്ഞൻമാർ അല്ലായിരിക്കാം.. എന്നാൽ, കുറച്ച്​ ദിവസങ്ങൾക്ക്​ മുമ്പ്​ സംഭവിച്ച കാര്യങ്ങൾ പരിഗണിക്കു​േമ്പാൾ അത്​ ഫാൽക്കൺ 9 എന്ന റോക്കറ്റിന്‍റെ അവശിഷ്​ടങ്ങൾ ഭൂമിയിലേക്ക്​ എത്തിയത്​ തന്നെയാണെന്ന്​ ഞങ്ങൾക്ക്​ തോന്നി ഗ്രാന്‍റ്​ കൗണ്ടി പൊലീസിന്‍റെ വക്​താവ്​ കെയ്​ൽ ഫോർമാൻ മാധ്യമങ്ങളോട്​ പറഞ്ഞു.

പൊലീസ്​ പിന്നാലെ, ഇലോൺ മസ്​കിന്‍റെ സ്​പേസ്​ എക്​സിലേക്ക്​ വിളിച്ച്​ സംഭവം അറിയിച്ചിരുന്നു. അവർ അത്​ റോക്കറ്റിന്‍റെ അവശിഷ്​ടമാണെന്ന്​ സ്ഥിരീകരിക്കുകയും അത്​ വീണ്ടെടുക്കാനായി ജീവനക്കാരെ അയക്കുകയും ചെയ്​തു.