അകലത്തിരുന്ന്​ നമ്മെ നിരീക്ഷിച്ച്​ അവരുണ്ട്​, അതും 29 ഗ്രഹങ്ങളിൽ- കൊതിപ്പിക്കുന്ന കണ്ടെത്തലുമായി ശാസ്​ത്രലോകം

വാഷിങ്​ടൺ: മനുഷ്യനെ എന്നും കൊതിപ്പിച്ച്​ ഏറെയായി അന്തരീക്ഷത്തിൽ പറന്നുനടക്കുന്നുണ്ട്​ പറക്കും തളിക​കളെ കുറിച്ചും അന്യഗ്രഹ ജീവികളെ കുറിച്ചുമുള്ള കേട്ടകഥകളും കണ്ട കാഴ്​ചകളും. അവയുടെ ആധികാരികത ഇനിയും സ്​ഥിരീകരിക്കാനായിട്ടില്ലെങ്കിലും പൂർണമായി തള്ളാനായിട്ടില്ലെന്ന്​ ശാസ്​ത്രലോകം പറയുന്നു.

ആകാശങ്ങളിലെവിടെയോ നമ്മെ പോലെ കഴിച്ചുകൂട്ടുന്നവരെ കുറിച്ച്​ ഭൂമിയിലിരുന്ന്​ മനുഷ്യൻ സ്വപ്​നം കാണു​ംപോലെ തിരിച്ച്​ നമ്മെ നിരീക്ഷിച്ച്​ അകലങ്ങളിൽ സമാന ജീവികളുണ്ടോ? അവർ മനുഷ്യരെ പോലെയാകുമോ അതോ മനുഷ്യർ തന്നെയാണോ? സൂര്യനു ​ചുറ്റും വലംവെക്കുന്ന ഭൂമിയുടെ കാഴ്​ചകളിൽ അവർ അഭിരമിക്കുന്നുണ്ടാകുമോ? ഊഴം വെച്ച്​ ഭൂമി കാണാനുള്ള അവരുടെ വരവാകുമോ പലയിടത്തായി കണ്ടെന്ന്​ പറയപ്പെടുന്ന പറക്കുംതളികകൾ?

ജീവ സാന്നിധ്യമുണ്ടാകാവുന്ന 1,715 നക്ഷത്ര വ്യവസ്​ഥകൾ (star systems) ഇതിനകം ശാസ്​ത്രജ്​ഞർ തിരിച്ചറിഞ്ഞിട്ടുണ്ട്​. അവയിൽ ഭൂമിയുടെ കാഴ്​ചകൾ ഏറ്റവും കൃത്യമായി പതിയാവുന്ന 46 നക്ഷത്രങ്ങളുണ്ടെന്നും വാനനിരീക്ഷകർ പറയുന്നു. മനുഷ്യ സാന്നിധ്യത്തി​െൻറ തെളിവുലഭിക്കാൻ അവയിലെ 29 ഉപഗ്രഹങ്ങളിലുള്ളവർക്ക്​​ സാധ്യത കൂടുതലാണെന്നാണ്​ കണക്കുകൂട്ടൽ. 336 പ്രകാശവർഷങ്ങൾക്കകത്ത് ഭൂമിയുടെ കാഴ്​ചകൾ പതിയാവുന്ന​ 2,034 നക്ഷത്രങ്ങളെയാണ്​ ഒപ്പിയെടുക്കാനായത്​. ഇതിൽ റോസ്​ 128 എന്നു പേരിട്ട നക്ഷത്രം 12 പ്രകാശവർഷം അകലെയാണ്​. അതിന്​ ഭൂമിയുടെ രണ്ടിരട്ടി വലിപ്പമുള്ള ഒരു ഗ്രഹവും തിരിച്ചറിഞ്ഞിട്ടുണ്ട്​. 2,000 വർഷമായി അതിന്​ ഭൂമിയെ കാണാൻ അവസരം പലതുകഴിഞ്ഞ​ുപോയി. 45 പ്രകാശവർഷം അകലെയുള്ള ട്രാപിസ്​റ്റ്​-1 എന്ന നക്ഷത്രത്തിന്​ ഏഴ്​ ഗ്രഹങ്ങളാണ്​ തിരിച്ചറിയാനായത്​.

സൗരയൂഥത്തിനുമപ്പുറത്തെ ആയിരക്കണക്കിന്​ ഗ്രഹങ്ങൾ ഇതിനകം തിരിച്ചറിഞ്ഞിട്ടുണ്ട്​. ഈ വർഷാവസാനം ബഹിരാകാശത്തേക്ക്​ കുതിക്കുന്ന നാസയുടെ ജെയിംസ്​ വെബ്​ സ്​പേസ്​ ദൂരദർശിനി ഈ വിഷയത്തിൽ കൂടുതൽ സഹായമാകുമെന്നാണ്​ കണക്കുകൂട്ടൽ.

പറക്കുംതളിക​കളെ കുറിച്ച്​ യു.എസ്​ സർക്കാർ വൈകാതെ റിപ്പോർട്ട്​ പ്രസിദ്ധീകരിക്കാനിരിക്കെയാണ്​ പുതിയ സുചനകൾ.