ഇല്ല, ബ്രാൻസൺ ബഹിരാകാശത്തേക്ക്​ പോയിട്ടില്ല, അത്​ ബഹിരാകാശമല്ല...! ഞെട്ടിക്കുന്ന വെളിപ്പെടുത്തലുമായി ശാസ്ത്രജ്ഞൻ

ശതകോടീശ്വരനും വെർജിൻ ഗലാക്റ്റിക് മേധാവിയുമായ റിച്ചാർഡ് ബ്രാൻസണിന്‍റെ നേതൃത്വത്തിൽ നടത്തിയ ബഹിരാകാശയാത്ര ലോകമെമ്പാടും വലിയ വാർത്താപ്രാധാന്യം നേടിയിരുന്നു. ആ യാത്ര ബഹിരാകാശ ടൂറിസം രംഗത്ത് വലിയ നാഴികല്ലായി മാറും എന്നാണ്​ വിലയിരുത്തപ്പെടുന്നത്​. വെർജിൻ ഗലാക്റ്റിക്കിന്‍റെ സ്പേസ് പ്ലെയിനായ വി.എസ്.എസ് യൂനിറ്റിയിലായിരുന്നു​ ബ്രാൻസണിന്‍റെ നേതൃത്വത്തിലുള്ള ആറംഗ സംഘം ദൗത്യം പൂർത്തീകരിച്ച് തിരികെ ലാൻഡ് ചെയ്തത്​. ആന്ധ്രയിലെ ഗുണ്ടൂരിൽ വേരുകളുള്ള ശിരിഷ ബാൻഡ്​ലയും സംഘത്തിലുണ്ടായിരുന്നു. അതോടെ ഇന്ത്യക്കാർക്കും ബ്രാൻസണിന്‍റെ ബഹിരാകാശ യാത്ര വലിയ അഭിമാനമായി മാറി.

എന്നാൽ, അമേരിക്കൻ ജ്യോതിശാസ്ത്രജ്ഞനും ശാസ്ത്ര പ്രചാരകനുമായ നീൽ ഡിഗ്രാസ് ടൈസണ്​ വെർജിൻ ഗലാറ്റിക്കി​െൻറ 'വിജയകരമായ ബഹിരാകാശ യാത്ര'യെ കുറിച്ച്​ വ്യത്യസ്​തമായ അഭിപ്രായമാണുള്ളത്​. സി.എൻ.എന്നുമായുള്ള അദ്ദേഹത്തി​െൻറ അഭിമുഖത്തിലാണ്​ ഞെട്ടിക്കുന്ന വെളിപ്പെടുത്തൽ അദ്ദേഹം നടത്തിയത്​. ശതകോടീശ്വരനായ ബ്രാൻസൺ ശരിക്കും ബഹിരാകാശത്തേക്ക്​ പോയിട്ടില്ലെന്നാണ്​ ടൈസൺ അവകാശപ്പെടുന്നത്​. ബഹിരാകാശ ടൂറിസം എന്ന സ്വപ്​നം യാഥാ​ർഥ്യമാക്കാൻ ശ്രമിക്കുന്ന ബ്രാൻസണ്​ അതിന്​ സാധിച്ചിട്ടില്ലെന്നും ഭ്രമണപദത്തിലേക്ക്​ (orbital) അദ്ദേഹത്തിന്​ എത്താൻ കഴിഞ്ഞിട്ടില്ലെന്നുമാണ്​ ടൈസൺ പറയുന്നത്​.

'എന്നോട്​ ക്ഷമിക്കണം... ആദ്യം തന്നെ പറയാം, അത്​ വെറും 'സബോർബിറ്റൽ' മാത്രമായിരുന്നു.. അലൻ ഷെപ്പേർഡിനൊപ്പം നാസ അത്​ 60 വർഷം മുമ്പ്​ തന്നെ സാധ്യമാക്കിയിട്ടുണ്ട്​. കേപ് കനാവറലിൽ നിന്ന് പറന്നുയർന്ന് അന്നവർ സമുദ്രത്തിൽ വന്നിറങ്ങുകയാണ്​ ചെയ്​തത്​. ഭ്രമണപഥത്തിലെത്താനായി അതിവേഗതയിൽ പോയിട്ടില്ലെങ്കിൽ നിങ്ങൾ വീഴുകയും ഭൂമിയിലേക്ക് പതിക്കുകയും ചെയ്യും. " -ടൈസൺ വ്യക്​തമാക്കി. "അതുകൊണ്ട്​ തന്നെ, നിങ്ങൾ വേണ്ടത്ര ഉയരത്തിലെത്തിയിട്ടുണ്ടോ...? നിങ്ങൾ ഭ്രമണപഥത്തിൽ പോയിട്ടുണ്ടോ..? യഥാർത്ഥത്തിൽ നിങ്ങൾ എവിടെയെങ്കിലും പോയിട്ടുണ്ടോ...? നിങ്ങൾക്ക്​ ചന്ദ്രനിലേക്കോ ചൊവ്വയിലേക്കോ അതിനപ്പുറത്തേക്കോ എത്താൻ സാധിച്ചിട്ടുണ്ടോ...? " - അദ്ദേഹം ചില ചോദ്യങ്ങളും ഉന്നയിച്ചു.

ത​െൻറ അവകാശവാദം സമർഥിക്കാനായി കൈയ്യിലൊരു ഗ്ലോബ്​ പിടിച്ച്​ ടൈസൺ വിശദീകരിക്കുകയും ചെയ്​തു. ഗ്ലോബിനെ ഭൂമിയായി സങ്കൽപ്പിക്കാൻ ആവശ്യപ്പെട്ട അദ്ദേഹം ആ ഭൂമിയുമായി ഒരു സെൻറീമീറ്റർ അകലത്തിലാണ്​ അന്താരാഷ്​ട്ര ബഹിരാകാശ നിലയവും ബഹിരാകാശ ഭ്രമണപഥവും സ്ഥിതിചെയ്യുന്നതെന്നും പറഞ്ഞു. അതുപോലെ ചന്ദ്രൻ 10 മീറ്റർ വരെ അകലെയാണെന്നും ചൂണ്ടിക്കാട്ടി. ഈ സ്കെയിൽ അനുസരിച്ച്, റിച്ചാർഡ് ബ്രാൻസൺ ഉപരിതലത്തിൽ നിന്ന് ഏകദേശം രണ്ട്​ മില്ലീമീറ്റർ വരെ മാത്രമാണ്​ ഉയർന്നതെന്നും, നീൽ ഡിഗ്രാസ് ടൈസൺ വ്യക്​തമാക്കി. അതുകൊണ്ട്​ തന്നെ അത്തരമൊരു യാത്ര നടത്തിയതിനെ 'ബഹിരാകാശ യാത്ര' എന്ന്​ വിളിക്കുന്നതിലുള്ള യുക്​തിയെന്താണ്​..? എന്നാണ്​ അദ്ദേഹം ചോദിക്കുന്നത്​.

"നിങ്ങൾക്ക് അതിനെ 'സ്പേസ്' എന്ന് വിളിക്കണോ.. കുഴപ്പമില്ല, കാരണം ശരാശരി മനുഷ്യർക്ക്​ മുമ്പ് അവിടെ എത്താൻ കഴിഞ്ഞിട്ട.., ഇത് നിങ്ങൾക്കുള്ള ആദ്യത്തെ അനുഭവം കൂടിയാണ്​. അതുകൊണ്ടാണ് ഭ്രമണപഥത്തിലെത്താൻ എട്ട് മിനിറ്റും ചന്ദ്രനിൽ എത്താൻ മൂന്ന് ദിവസവും എടുക്കുന്നത്. അതാണ്​ യഥാർത്ഥത്തിൽ ബഹിരാകാശ യാത്ര. അതിനാൽ എനിക്ക്​ അതിനെ 'ഓ, നമുക്ക് ബഹിരാകാശത്തേക്ക് പോകാം' എന്ന രീതിയിൽ കാണാൻ സാധിക്കില്ല. നിങ്ങൾക്ക് മുകളിൽ നിന്ന്​ ഭൂമിയുടെ മനോഹരമായ കാഴ്ച ലഭിക്കും. അത്ര തന്നെ''. -ടൈസൺ കൂട്ടിച്ചേർത്തു.