പറക്കുംതളികയിലേറി അന്യഗ്രഹ ജീവികൾ ഇപ്പോഴും വരുന്നുണ്ടോ? അന്വേഷണം സജീവമാക്കാൻ​ നാസ

കാലമേറെയായി അമേരിക്കക്കാരെ മാത്രമല്ല, ലോകത്തെ മുഴുവൻ മുനയിൽ നിർത്തുന്ന വിഷയമാണ്​ പറക്കും തളികകളും അവയിലേറി എത്തുന്ന അന്യഗ്രഹ ജീവികളും. ഇടവിട്ട്​ അവ നമ്മെ കാണാൻ വരാറുണ്ടെന്ന്​ വിശ്വസിക്കുന്നവരേറെ. അവരെ തൃപ്​തിപ്പെടുത്തുന്ന കഥക​ൾ പലതും ഇപ്പോഴും പ്രചരിക്കുന്നുണ്ട്​.

മഹാഭൂരിപക്ഷവും ശുദ്ധ നുണകളായ അപസർപ്പക കഥകൾ മാത്രമാണെന്ന്​ സ്​ഥിരീകരിക്കപ്പെട്ടതാണെങ്കിലും എല്ലാം അപ്പടി തള്ളാനായിട്ടില്ലെന്ന്​ പറയുന്നു,​ അമേരിക്കൻ ബഹിരാകാശ ഏജൻസി നാസ. സൈനിക വിമാനങ്ങൾ പറത്തിയ വൈമാനികർ കണ്ടതായി അറിയിച്ച റി​പ്പോർട്ടുകളെ സ്​ഥിരീകരിച്ചും നിഷേധിച്ചും ഉറപ്പു പറയാറായിട്ടില്ലെന്ന്​ അടുത്തിടെ മുതിർന്ന സംഘം അമേരിക്കൻ കോൺഗ്രസിനെ അറിയിച്ചിരുന്നു. വിഷയത്തിൽ കൂടുതൽ ആഴത്തിലുള്ള പഠനം നടത്തി സത്യം സ്​ഥിരീകരിക്കുമെന്ന്​ പുതുതായി ചുമതലയേറ്റ നാസ തലവൻ ബിൽ നെൽസണും വ്യക്​തമാക്കുന്നു.

അതിവേഗത്തിൽ സഞ്ചരിക്കുന്ന പറക്കും തളികകളെയാണ്​ ഇവർ കണ്ടിരുന്നത്​. ഭൂമി കാണാൻ അന്യഗ്രഹങ്ങളിൽനിന്ന്​ പറന്നിറങ്ങുന്ന വിരുന്നുകാരാകാമെന്നാണ്​ പ്രചാരണം. എന്നാൽ, പറക്കും തളികകൾ അന്യഗ്രഹ ജീവികളാണെന്ന്​ ഇപ്പോഴും താൻ വിശ്വസിക്കുന്നില്ലെന്നും​ പക്ഷേ, അന്തിമ തീരുമാനം പറയി​െല്ലന്നും നെൽസൺ പറയുന്നു. വിഷയത്തിൽ ഈ മാസം പെന്‍റഗൺ റിപ്പോർട്ട്​ പുറത്തുവിടുമെന്നാണ്​ സൂചന.

വിഷയത്തിൽ നാസ ഇതുവരെയും ഔദ്യോഗിക അന്വേഷണ സംഘത്തെ വെച്ചിട്ടില്ല. പക്ഷേ, മുൻനിര ഗവേഷകർക്ക്​ കൂടുതൽ പഠനം നടത്തി റിപ്പോർട്ട്​ സമർപിക്കാൻ അംഗീകാരവും നൽകിയിട്ടുണ്ട്​.

പതിറ്റാണ്ടുകളായി ലോകം പറക്കും തളികകൾക്കു പിന്നാലെയുണ്ട്​. 2004ൽ 'ടിക്​ ടാക്​' എന്ന പേരിൽ പ്രചരിക്കുന്ന വിഡിയോയിൽ അതിവേഗം ഒരു വസ്​തു ആകാശത്ത്​ കടന്നുപോകുന്നതിന്‍റെ ദൃശ്യങ്ങളുണ്ടായിരുന്നു. 2015ൽ നേവി സൂപർ ഹോണറ്റ്​ ജെറ്റ്​ വൈമാനികൻ കണ്ടതായും റിപ്പോർട്ട്​ വന്നു. കൂടുതൽ വൈമാനികരെ ഉദ്ധരിച്ച്​ 201ൽ ന്യൂയോർക്​ ടൈംസ്​ റി​േപ്പാർട്ട്​ പ്രസിദ്ധീകരിച്ചതോടെയാണ്​ അമേരിക്കയിൽ അന്വേഷണം ചൂടുപിടിക്കുന്നത്​.

ദേശീയ സുരക്ഷക്ക്​ ഭീഷണി കൂടി കണക്കിലെടുത്താണ്​ അമേരിക്ക ഈ വിഷയം ഗൗരവത്തോടെ പരിഗണിക്കുന്നത്​.